Read Hmong Njua Daniyees 8 Bible Online

Daniyees 8 - Hmong Njua bible

Daniyees 8

¹Daniyees has tas, Thaus kws Npeesaxas ua vaajntxwv tau peb xyoos lawm, kuv rov ua dlua ib zaaj ywgtoog kws yog zaaj ob.

²Kuv ua ywgtoog pum has tas, kuv nyob huv lub nroog Xuxas kws muaj ntsaa yeej thaiv puagncig, hab nyob huv lub tebchaws Elames. Kuv moog sawv ze ze ntawm tug Dlej Ulais.

³Thaus kuv tsaa qhovmuag saib, kuv txawm pum ib tug laug yaaj sawv ntawm ntug dlej, nwg tuaj ob tug kub ntev heev. Nwg tug kub kws tuaj tom qaab ntev dlua tug kub kws xub tuaj.

⁴Kuv pum tug laug yaaj ntawd yom kub moog rua saab nubpoob saab peg hab saab nraag. Tsi muaj ib tug tsaj kws yuav cheem tau nwg lossis tsiv dlim ntawd nwg le. Nwg ua lawv le nwg lub sab, nwg txhaj khaavtheeb heev.

⁵Thaus kws kuv taabtom ua tuab zoo muab zaaj nuav coj lug xaav saib yog le caag, txawm muaj ib tug laug tshis dlha ceev heev saab nubtuaj tuaj, zoo le nwg tej teg taw tub tsi chwv aav le. Tug laug tshis ntawd muaj ib tug kub khov kho tuaj ntawm nwg lub hauvplaj.

⁶Thaus tug laug tshis tuaj yuav txug ntawm tug laug yaaj kws kuv pum sawv ntawm ntug dlej, tug tshis txawm dlha ncaaj nraim moog nrau tug laug yaaj.

⁷Kuv saib ntsoov tug laug tshis nrau tug laug yaaj ntawd. Tug laug tshis npautawg heev, nwg siv zug nrau ua rua tug laug yaaj ob tug kub luv ntho lawm. Tug laug yaaj tsi muaj zug hab kov tsi yeej. Tug laug tshis txhaj nrau ua rua tug laug yaaj qaug dlaa luam rua huv aav. Tug laug tshis muab tug laug yaaj tsuj nthi tsi muaj leejtwg paab cawm tau tug laug yaaj dlim le.

⁸Tug laug tshis txawm khaavtheeb heev zuj zug, tabsis thaus nwg khaav heev ntawd, nwg tug kub txawm luv ntho lawm. Ces txawm tuaj dlua plaub tug kub khov kho le tug qub. Hab cov kub ntawd nyag lem nyag moog rua ib qho.

⁹Muaj ib tug kub miv miv txawm ncau huv plaub tug kub ntawd ib tug tuaj. Tug kub ntawd nthuav nwg lub fwjchim moog rua saab qaabteb, saab nubtuaj, hab moog rua huv lub tebchaws kws Vaajtswv tau Coglug Tseg yuav muab pub rua nwg tsaav tuabneeg Yixalayees nyob.

¹⁰Nwg muaj zug zuj zug, hab nwg yuav ntaus cov tubrog qaum ntuj hab tej nubqub. Nwg muab tej nubqub qee ntsauv pov lug rua huv aav hab muab tsuj nthi tseg.

¹¹Nwg tseem kwvnyom tug thawj tubrog kws kaav cov tubrog qaum ntuj tej lug. Nwg txwv tsi pub leejtwg tua tsaj fij rua tug thawj tubrog qaum ntuj ntawd. Hab nwg ua rua lub Tuamtsev puamtsuaj taag.

¹²Suavdlawg pheej ua kev txhum ntawm lub Tuamtsev, puab tsi tua tsaj hlawv ua khoom fij lawv le yaav taag lug kws puab naj nub ua, hab puab tso Vaajtswv txuj Kevcai kws yog txuj tseemceeb tseg. Tug kub nuav ua tau ib puas tsaav yaam taagnrho.

¹³Kuv nov ob tug timtswv sis thaam, muaj ib tug has rua ib tug has tas, “Thaus twg tej xwm kws has huv zaaj ywgtoog nuav maam le dlua moog? Tej tuabneeg naj nub ua kev phem kev qas, yuav naj nub tua tsaj theej txhoj moog ntev le caag? Luas yuav tsuj cov tubrog qaum ntuj hab lub Tuamtsev moog txug nub twg?”

¹⁴Ob tug timtswv ntawd muaj ib tug teb has tas, “Yuav muaj le nuav moog kuas txug ib txheeb ib puas tsib caug nub hab lub sijhawm ntawd, yuav tsi muaj tuabneeg tua tsaj fij lawm, tsi has thaus sawv ntxuv lossis thaus yaav tsaus ntuj. Tom qaab ntawd puab yuav rov lug khu Vaajtswv lub Tuamtsev dlua tshab.”

¹⁵Daniyees has tas, “Thaus kuv pum tej ntawd, kuv ua tuab zoo saib kuas totaub. Taamsim ntawd txawm muaj ib tug zoo le tug tuabneeg lug sawv ntawm kuv hauv ntej,

¹⁶hab kuv nov ib lub suab hu saab ntug Dlej Ulais tim u tuaj has tas, ‘Khali-ees, koj ca le txhais tej kws nwg pum ntawd lub ntsab rua nwg paub.’ ”

¹⁷Khali-ees txawm lug sawv ntawm kuv ib saab, kuv ntshai heev hab kuv ca le qaug rua huv aav. Tug timtswv ntawd has rua kuv tas, “Tub noobneej, kuas koj totaub has tas, zaaj ywgtoog kws koj pum ntawd yog qha txug lub sijhawm kws nplajteb kawg.”

¹⁸Thaus tug timtswv taabtom has lug, kuv ca le tsi ncu qaab hlas lawm, tabsis tug timtswv ntawd lug tsaa kuv sawv hab fwj kuv lub cev.

¹⁹Nwg has rua kuv tas, “Kuv qha rua koj paub has tas, thaus kws Vaajtswv chim heev lawm yuav zoo le caag. Zaaj ywgtoog nuav yog qha txug lub sijhawm kws ib puas tsaav yaam kawg.

²⁰“Tug laug yaaj kws koj pum muaj ob tub kub ntawd, pev txug lub tebchaws Medes hab lub tebchaws Pawxias.

²¹Tug laug tshis pev txug lub tebchaws Kilis, hab tug kub kws tuaj ntawm nwg hauvplaj, yog pev txug tsaav tuabneeg Kilis thawj tug vaajntxwv.

²²Plaub tug kub kws tuaj ntawm thawj tug kub kws luv lawm qhov chaw, yog pev txug plaub lub tebchaws kws tawg tawm ntawm thawj lub tebchaws, tabsis yuav tsi muaj zug npaum le thawj lub tebchaws lawm.

²³“Lub sijhawm kws plaub lub tebchaws ntawd yuav kawg, cov tuabneeg kws nyob huv tub ua kev phem kev qas txaus raug txim lawm. Thaus ntawd yuav muaj ib tug sawv lug ua vaajntxwv, tabsis nwg yuav tawv ncauj, ua nruj ua tsiv hab dlaag ntxag suavdlawg.

²⁴Tug vaajntxwv nuav muaj fwjchim luj heev zuj zug tuaj, tabsis lub sijhawm ntawd tsi yog nwg tug zug ua tau. Nwg yuav ua rua suavdlawg raug kev puamtsuaj luj kawg nkaus, hab nwg yuav ua tau ib puas tsaav yaam tav taagnrho. Nwg yuav ua rua cov tuabneeg kws muaj fwjchim hab Vaajtswv tsaav tuabneeg kuas raug kev puamtsuaj.

²⁵Vim nwg muaj lub tswvyim kws phem heev, nwg yuav ua ib puas tsaav yaam ntxag kuas nwg tau kaav tebchaws. Nwg yuav khaavtheeb heev hab nwg yuav rhuav kuas tuabneeg coob tug puamtsuaj tsi muaj leejtwg nwm txug le. Txawm yog tug Vaajntxwv ntawm tej vaajntxwv los nwg yeej tsi ntshai le. Tabsis lub fwjchim kws tsi yog tuabneeg lub yuav ua rua nwg raug kev puamtsuaj.

²⁶Zaaj ywgtoog kws has txug tej tsaj kws tuabneeg muab tua hlawv fij thaus sawv ntxuv hab thaus tsaus ntuj kws kuv qha rua koj paub nuav yuav tav, tabsis koj yuavtsum npog zaaj nuav ca tsi xob qha rua leejtwg paub, rua qhov tseem tshuav ntev maam le txug lub sijhawm kws muaj lawv le zaaj ywgtoog nuav.”

²⁷Daniyees has tas, “Kuv qaug zug hab mob tau ntau nub, kuv maam le sawv taug moog ua tej num kws vaajntxwv muab cob rua kuv ua. Zaaj ywgtoog ntawd ua rua kuv xaav tsi thoob hab kuv tsi totaub hlo le.”