Read Hmong Njua Hauxeyas 1 Bible Online

Hauxeyas 1 - Hmong Njua bible

Hauxeyas 1

¹Ntawm nuav yog tug TSWV cov lug has rua Npeelis tug tub Hauxeyas tam kws Yauxiyas, Yauthaas, Ahas hab Hexekiyas ua vaajntxwv kaav tebchaws Yudas hab Yehau-as tug tub Yelaunpau-aas ua vaajntxwv kaav tebchaws Yixalayees.

²Thawj zag kws tug TSWV has rua Hauxeyas, mas nwg has tas: “Koj ca le moog yuav quaspuj; koj tug quaspuj yuav tsi muab sab npuab koj, hab koj cov mivnyuas yuav coj ib yaam le nwg. Kuv tsaav tuabneeg tso kuv tseg, hab moog ua cov tuabneeg kws tsi muaj lub sab ncaaj rua kuv ib yaam le ntawd.”

³Yog le ntawd, Hauxeyas txhaj moog yuav Nkaumes kws yog Dinpelayees tug ntxhais ua quaspuj. Thaus obtug yug tau thawj tug tub lawm,

⁴tug TSWV has rua Hauxeyas has tas, “Koj tis nwg lub npe hu ua ‘Yexelees’ rua qhov tshuav tsi ntev lawm kuv yuav rau txim rua tug vaajntxwv kws kaav cov Yixalayees, vim nwg yawmkoob Yehus tau tua tuabneeg huv lub nroog Yexelees. Kuv yuav ua kuas Yehus caajceg vaajntxwv tuag tu noob nrho moog.

⁵Thaus txug lub sijhawm ntawd kuv yuav ua kuas cov tubrog Yixalayees raug puamtsuaj taag rua huv lub Vuaghaav Yexelees.”

⁶Tom qaab ntawd Nkaumes yug tau ib tug ntxhais. Tug TSWV has rua Hauxeyas has tas, “Koj tis nwg lub npe hu ua ‘Tsi hlub’, rua qhov kuv yuav tsi hlub cov Yixalayees lossis tsi zaam txim rua puab lawm.

⁷Tabsis kuv yuav hlub cov Yudas. Kuv yog tug TSWV kws yog puab tug Vaajtswv, kuv yuav cawm puab, tabsis tsi yog kuv siv ntaaj lossis neevnti, hab xub vug lossis neeg hab tubrog caij neeg lug cawm puab.”

⁸Thaus kws Nkaumes tug ntxhais tseg taug mig lawm, nwg rov suab mivnyuas hab yug tau ib tug tub.

⁹Tug TSWV has rua Hauxeyas has tas, “Koj tis nwg lub npe hu ua ‘Tsi Yog Kuv Tsaav Tuabneeg’ rua qhov cov Yixalayees tsi yog kuv tsaav tuabneeg hab kuv tsi yog puab tug Vaajtswv lawm.”

¹⁰Cov Yixalayees yuav coob ib yaam le tej xuabzeb ntawm ntug havtxwv kws tsi muaj leejtwg suav txheeb lossis luj tau. Nwgnuav Vaajtswv has rua puab tas, “Mej tsi yog kuv tsaav tuabneeg.” Tabsis muaj ib nub nwg yuav has rua puab tas, “Mej yog Vaajtswv tug kws muaj sa nyob moog ibtxhis cov mivnyuas!”

¹¹Cov Yudas hab cov Yixalayees yuav rov lug sis sau ua ke ua ib tsaav tuabneeg dlua. Puab yuav xaiv ib tug lug ua puab tug thawjcoj, puab yuav rov fuamvaam hab vaammeej dlua nyob huv puab lub tebchaws. Yuav muaj le ntawd tag, Yexelees nub yuav yog nub kws tseemceeb heev!