Read Hmong Njua Hauxeyas 10 Bible Online

Hauxeyas 10 - Hmong Njua bible

Hauxeyas 10

¹Cov Yixalayees zoo ib yaam le tsob txiv maab kws txi txiv ncw heev. Puab vaammeej npaum twg, puab yimfuab teeb thaaj ntau npaum ntawd. Puab lub tebchaws ua tau qoobloo ntau npaum twg, puab yimfuab teeb ncej zeb ntau npaum ntawd rua puab pe.

²Cov tuabneeg kws muaj lub sab dlaag ntxag, yuav raug kev txomnyem, vim puab tej kev txhum ntawd. Vaajtswv yuav rhuav puab tej thaaj hab tsoo puab tej ncej zeb kuas puamtsuaj taag.

³Tsi ntev cov tuabneeg nuav yuav has tas, “Peb tsi muaj vaajntxwv, rua qhov peb tsi fwm tug TSWV. Txawm yog peb muaj vaajntxwv los nwg yuav ua tau dlaabtsi rua peb?”

⁴Puab has lug ua dlog ua dlig tsi muaj hauvpaug hauvntsis, puab coglug dlaag. Puab muab kev ncaaj nceeg hloov ua kev tsi ncaaj nceeg ib yaam le tsob tshuaj kuab tu nyuv kws luj hlub huv dlaim teb kws luas laij ca lawm.

⁵Cov tuabneeg kws nyob huv lub nroog Xamalis yuav ntshai hab quaj ntsuag tug mlom txiv nyuj kws yog muab kub nchuav ua nyob huv lub nroog Npethees. Puab hab cov povthawj kws pe tug mlom ntawd yuav quaj ntsuag. Puab yuav tsaa suab quaj thaus luas muab tej kub kws vuam tug mlom ntawd tev taag lawm.

⁶Luas yuav coj tug mlom ntawd moog pub rua cov Axilias tug vaajntxwv kws muaj fwjchim luj. Yixalayees yuav poob ntsejmuag hab txaajmuag, vim nwg ua lawv le luas tej lug haub ntxag.

⁷Yixalayees tug vaajntxwv yuav raug luas caab moog ib yaam le dlaim nplais ntoo kws dlej tshoob lawm.

⁸Tej tsev teev mlom kws nyob sau roob huv lub nroog Avees kws cov Yixalayees pheej moog pe mlom yuav raug puamtsuaj taag. Xuavpaug hab nroj yuav tuaj laum puab tej thaaj. Tej tuabneeg yuav thov tej roob has tas, “Thov npug peb lauj!” Hab thov tej pov roob has tas, “Thov txhub peb lauj”.

⁹Tug TSWV has tas, “Txij thaus cov Yixalayees ua txhum rua kuv huv lub nroog Nkinpe-as lug, puab yeej tsi tso txujkev txhum kws puab ua ntawd tseg le. Yog le ntawd yuav muaj kev tsuv kev rog tuaj tua puab huv lub nroog Nkinpe-as.

¹⁰Kuv yuav tawmtsaam cov tuabneeg ua txhum nuav hab rau txim rua puab. Ntau tsaav tuabneeg yuav sis sau ua ke tuaj tua puab hab puab yuav raug txim, rua qhov puab tau ua txhum ntau heev.

¹¹“Yaav taag lug, cov Yixalayees zoo ib yaam le tug xyuas nyuj kws tub cob tau hab tog rawv coj moog tsuj nplej lawm xwb. Tabsis kuv txav txim sab muab tug quabtwg khuam rua nwg lub cejdlaab kws ntug ntoob kuas nwg ua num nyaav dlua qhov qub. Kuv kuas Yudas hai raab khais hab kuas Yixalayees hai lub zuag haiv.

¹²Kuv has tas, ‘Mej ca le moog laij dlua dlaim teb tshab rua mej cog kev ncaaj nceeg, hab sau tej koob moov kws kuv muab rua txhua tug kws muab sab npuab kuv. Tub txug lub sijhawm kws mej lug cuag kuv kws yog mej tug TSWV lawm, kuv yuav lug hab laub koob moov rua mej.’

¹³Tabsis mej tsi ua le ntawd, mej tseb kev phem hab sau kev tsi ncaaj nceeg nkaus xwb. Mej tej kev dlaag tub tawg paaj txi txiv rua mej noj lawm. “Vim mej ca sab rua mej tej tsheb neeg hab mej cov tubrog kws coob heev,

¹⁴txhaj yuav muaj tsuv muaj rog tuaj tua mej tsaav tuabneeg, hab taagnrho mej tej chaw faajxwm yuav puamtsuaj taag. Mas yuav zoo ib yaam le nub kws Vaajntxwv Salemaas tuaj tua lub nroog Npethanpees, tej quaspuj hab cov mivnyuas raug luas muab tsuj tuag taag.

¹⁵Tej xwm zoo le ntawd yuav lug raug mej cov tuabneeg kws nyob huv lub nroog Npethees, vim tej kev phem kev qas kws mej ua taag lug lawm. Thaus pib sis tua xwb, cov Yixalayees tug vaajntxwv tub raug tua tuag lawm.”