Read Hmong Njua Hauxeyas 11 Bible Online

Hauxeyas 11 - Hmong Njua bible

Hauxeyas 11

¹Tug TSWV has tas, “Thaus Yixalayees tseem yog mivnyuas yau, kuv hlub nwg heev, hab kuv hu nwg tawm nraag tebchaws Iziv lug ua kuv tug tub.

²Tabsis yog kuv yimfuab hu nwg, nwg yimfuab tsiv ntawm kuv moog dleb npaum ntawd. Kuv tsaav tuabneeg tua tsaj fij rua Npa-aas; puab hlawv tshuaj tsw qaab rua tej mlom.

³Kuv yog tug kws qha cov Yixalayees moog kev. Kuv tsaws kuv tsaav tuabneeg lug puag rua ntawm kuv ob txhais npaab, tabsis puab tsi paub has tas kuv yog tug kws tu puab hlub le.

⁴Kuv ua tuab zoo nqug puab lug cuag kuv hab kuv hlub puab kawg. Kuv tsaws hlo puab lug puag npuab kuv lub plhu; kuv khoov moog tu puab hab pub mov rua puab noj.

⁵“Puab tsi kaam tig rov lug cuag kuv; yog le ntawd puab yuavtsum tau rov moog rua nraag tebchaws Iziv, hab tsaav tuabneeg Axilias yuav tswjfwm puab.

⁶Yuav muaj tsuv muaj rog tuaj tua puab tej nroog hab tsoo tej roojvaag kuas pob puag taag. Luas yuav ua kuas kuv tsaav tuabneeg raug puamtsuaj taag, vim puab xaav has tas tej kws puab ua yeej zoo heev lawm.

⁷Puab tawv ncauj hab puab tsiv tawm ntawm kuv moog. Puab yuav tsaa suab hlo quaj vim tug quabtwg kws puab kwv, tabsis yuav tsi muaj leejtwg muab tug quabtwg ntawd tshem ntawm puab moog le.

⁸“Yixalayees, kuv yuav ua le caag tso taug koj? Kuv yuav ua le caag txhaj tso taug koj tseg? Kuv puas khuv ua kuas koj puamtsuaj ib yaam le kuv ua rua lub nroog Amas lossis ua rua koj ib yaam le kuv ua rua lub nroog Xenpauyees? Kuv lub sab yeej tsi kheev kuv ua le ntawd! Rua qhov kuv hlub koj heev.

⁹Thaus kuv chim kuv yuav tsi rau txim rua koj; kuv yuav tsi ua kuas cov Yixalayees raug puamtsuaj ib zag ntxiv le lawm. Rua qhov kuv yog Vaajtswv, kuv tsi yog noobneej. Kuv yog tug Dlawbhuv, kuv nrug mej nyob. Kuv yuav tsi lug cuag mej ua tug npautawg tsawv.

¹⁰“Thaus kuv nyooj lawg ib yaam le tug tsuv ntxhuav rua kuv tsaav tuabneeg tej yeebncuab, kuv tsaav tuabneeg yuav lawv kuv qaab. Puab yuav maaj ceev nrooj tim saab nubpoob rov lug cuag kuv.

¹¹Puab yuav dlha ceev npaum nkaus le tej noog yaa nraag tebchaws Iziv lug, hab ceev npaum nkaus le nquab yaa peg tebchaws Axilias lug. Kuv yuav coj puab rov lug nyob huv puab tej vaaj tse dlua. Kuv yog tug TSWV kws has le ntawd.”

¹²Tug TSWV has tas, “Cov Yixalayees has lug dlaag hab ntxeev sab puagncig kuv, hab cov Yudas tseem ntxeev sab tsi tseg rua kuv kws yog Vaajtswv tug kws dlawbhuv hab ncaaj nceeg.