Read Hmong Njua Hauxeyas 12 Bible Online

Hauxeyas 12 - Hmong Njua bible

Hauxeyas 12

¹Txhua yaam kws cov Yixalayees ua thaus sawv ntxuv moog txug thaus tsaus ntuj yeej tsi muaj nqes dlaabtsi le, tsuas yog coj kev puamtsuaj lug xwb. Puab ntxeev sab hab ua limham heev zuj zug. Puab nrug cov Axilias coglug ua phoojywg hab nrug cov Iziv ua laag ua luam.”

²Tug TSWV muaj lug kom cov Yudas; nwg yuav rau txim rua cov Yixalayees lawv le tej kev txhum kws puab ua. Nwg yuav ua pauj tej kev txhum kws puab ua rov rua puab.

³Puab yawmkoob Yakhauj yeej nrug nwg tijlaug Exaus kws obtug yog mivnyuas ntxaib sis tawmtsaam thaus tseem nyob huv leej nam plaab lawm; thaus Yakhauj luj hlub lug, nwg tau nrug Vaajtswv sis qhau hab.

⁴Nwg qhau yeej ib tug timtswv ceebtsheej. Nwg tau quaj hab thov kuas foom koob moov rua nwg. Vaajtswv lug rua peb yawmkoob Yakhauj pum hab nrug nwg thaam nyob huv Npethees.

⁵Tug nuav yog tug TSWV kws yog Vaajtswv tug muaj Fwjchim Luj kawg nkaus, tug TSWV lub npe yeej yog lub npe kws tsimnyog suavdlawg pehawm.

⁶Yakhauj cov xeebntxwv, nwgnuav mej ca le ca sab rua mej tug Vaajtswv hab rov lug cuag nwg. Ua sab dlawb sab zoo hab ua sab ncaaj, hab ua sab ntev tog mej tug Vaajtswv.

⁷Tug TSWV has tas, “Cov Yixalayees lub sab tsi ncaaj ib yaam le cov Kana-aas hab ntaag; puab nyam muab raab teev tsi txwm lug luj ntxo cov tuabneeg kws tuaj yuav khoom ntawm puab.

⁸Puab has tas, ‘Peb npluanuj heev, peb muaj moo kawg nkaus. Txawm yog peb ua tsi ncaaj kuas peb npluanuj los yeej tsi muaj leejtwg has tau peb le.’

⁹Tabsis kuv yog tug TSWV, mej tug Vaajtswv kws tau coj mej tsiv nraag tebchaws Iziv lug, kuv yuav ua kuas mej rov moog nyob tsevntaub ib yaam le thaus mej nyob nraag taj suabpuam kws kuv lug cuag mej.

¹⁰“Kuv tau lug has rua cov cevlug ua rua puab pum ntau zaaj ywgtoog hab kuv kuas cov cevlug ntuag kuv tsaav tuabneeg ntau zag.

¹¹Tabsis puab tseem pe tej mlom huv Nkile-as hab, cov tuabneeg kws pe tej mlom ntawd yuav tuag taag. Puab caab tej txiv nyuj moog tua fij nyob huv Nkilenkas, tej thaaj ntawd yuav raug rhuav ua tej pawg pobzeb nyob rua huv tej taj nraag.”

¹²Peb yawmkoob Yakhauj tau tsiv moog rua tim Mexuputamias, nwg tau moog ua num rua ib tug txivneej hab yug tug txivneej ntawd paab yaaj kuas nwg tau quaspuj.

¹³Tug TSWV khaiv ib tug cevlug moog cawm tsaav tuabneeg Yixalayees kuas dlim ntawm txujkev ua qhev nraag tebchaws Iziv hab nwg tsomkwm puab.

¹⁴Cov Yixalayees ua rua tug TSWV chim heev; yeej tsimnyog ca puab tuag moog vim puab tej kev txhum. Tug TSWV yuav rau txim rua puab, vim tej kws puab ua rua nwg poob ntsejmuag ntawd.