Read Hmong Njua Hauxeyas 14 Bible Online

Hauxeyas 14 - Hmong Njua bible

Hauxeyas 14

¹Cov Yixalayees, mej ca le rov lug cuag tug TSWV kws yog mej tug Vaajtswv. Mej txujkev txhum ua rua mej dlawm hab qaug lawm.

²Mej ca le rov lug cuag tug TSWV hab tsaa ncauj thov nwg has tas, “Thov zaam peb tej kev txhum hab noog peb tej lug thov, peb yuav ua koj tsaug lawv le peb tau coglug tseg lawm.

³Cov Axilias yeej paab tsi tau peb, hab tej neeg kws caij moog ntaus rog yeej tiv thaiv tsi tau peb. Peb yuav tsi hu peb tej mlom has tas, puab yog peb tug Vaajtswv ib zag ntxiv lawm. Tug TSWV, koj yeej taabncuab cov tuabneeg kws tsi pum qaab moog cuag leejtwg le lawm.”

⁴Tug TSWV has tas, “Kuv yuav coj kuv tsaav tuabneeg rov qaab lug cuag kuv dlua. Kuv yuav hlub puab kuas kawg kuv lub sab lub ntsws; kuv yuav tsi chim rua puab ntxiv lawm.

⁵Kuv yuav ua kuas cov Yixalayees zoo ib yaam le thaaj aav qhuav kws tau dlej naag. Puab yuav tawg paaj ib yaam le tej paaj ntoos kws tawg tshab tshab; puab nrhau caag ntsa aav tub ib yaam le tej ntoo peg Lenpanoos.

⁶Puab yuav caj sa hab hlaav dlua kaug tshab; hab yuav zoo nkauj npaum nkaus le tej ntoo roj. Puab yuav tsw qaab ib yaam le tej ntoo cab peg Lenpanoos.

⁷Kuv yuav tau tsomkwm puab dlua ib zag ntxiv, puab yuav cog qoobloo hab yuav txi ncw ib yaam le tsob txiv maab. Puab yuav nto moo lug ib yaam le tej cawv txiv maab peg Lenpanoos.

⁸Cov Yixalayees yuav tsi quavntsej tej mlom ntxiv lawm; kuv yuav teb puab tej lug thov hab tsomkwm puab. Kuv yuav ua dluab ntxoo roog puab ib yaam le tsob ntoo kws nplooj ntsuab thaws xyoo; kuv yog lub hauvpaug koob moov rua puab.”

⁹Thov kuas txhua tug kws txawj ntse totaub txug tej lug kws sau tseg nuav, hab muab khaws nkaus ca rua nruab sab. Tug TSWV txujkev yeej yog txuj tseeb, hab cov tuabneeg ncaaj nceeg kws taug txujkev nuav yuav tau txujsa, tabsis cov tuabneeg txhum yuav dlawm hab qaug vim puab tsi noog tej lug nuav.