Read Hmong Njua Hauxeyas 2 Bible Online

Hauxeyas 2 - Hmong Njua bible

Hauxeyas 2

¹Yog le ntawd, ca le hu koj cov kwvtij Yixalayees has tas “Vaajtswv Tsaav Tuabneeg” hab “Cov Kws Tug TSWV Hlub.”

²“Kuv cov mivnyuas, mej ca le thov mej nam, txawm has tas nwg tsi yog kuv tug quaspuj hab kuv tsi yog nwg tug quasyawg los mej thov kuas nwg tso txujkev ua nkauj ua nraug hab ua namndlav tseg.

³Yog nwg tsi tso tej ntawd tseg, kuv yuav muab nwg tej rig tsho hle kuas nwg nyob labqaab ploog ib yaam le nub kws nwg yug lug. Kuv yuav ua kuas nwg qhuav ib yaam le lub tebchaws kws qhuav nkig nkuav, hab nwg yuav nqhes dlej tuag.

⁴Kuv yuav tsi hlub nwg cov mivnyuas, rua qhov puab yog tug namndlav kws tsi paub txaajmuag cov mivnyuas. Nwg tseem has tas, ‘Kuv yuav caum kuv cov hluas nraug moog, puab maam muab zaub mov, dlej haus, ntaub plaub yaaj, ntaub maag, roj txiv ntoo hab cawv txiv maab rua kuv.’ ”

⁶Yog le ntawd kuv yuav muab xuavpaug xov vaaj ncig nwg hab xov laajkaab thaiv nwg txuj hauv kev.

⁷Nwg yuav caum nwg cov hluas nraug qaab, tabsis nwg caum tsi cuag puab. Nwg yuav moog nrhav puab, tabsis nrhav tsi tau. Ces nwg yuav has tas, “Kuv yuav rov moog nrug kuv thawj tug quasyawg nyob, yaav taag lug kuv lub neej yeej zoo tshaaj taamsim nuav lawm ntau.”

⁸Nwg yuav tsi kaam leeg has tas tej nplej, tej cawv txiv maab, tej roj txiv ntoo hab taagnrho tej nyaj tej kub kws nwg pheej coj moog fij rua Npa-aas ntawd yog kuv muab rua nwg.

⁹Yog le ntawd thaus txug caij sau qoob kuv yuav muab tej nplej hab tej cawv txiv maab kws kuv muab pub rua nwg lawm coj rov lug, hab kuv yuav muab tej ntaub plaub yaaj hab tej ntaub maag kws kuv muab rua nwg xaws ua rig tsho naav coj rov lug huv tuabsi.

¹⁰Kuv yuav muab nwg hle labqaab taabmeeg nwg tej hluas nraug, hab yuav tsi muaj leejtwg muaj cuabkaav cawm tau nwg kuas dlim ntawm kuv txhais teg.

¹¹Kuv yuav ua kuas nwg tej rooj noj rooj haus kws naj xyoo hab naj hli ua, tej kevcai nub Xanpataus hab tej rooj noj haus kws nwg teem tseg ntawd kuas tu nrho moog.

¹²Kuv yuav muab tej txiv maab hab txiv ncuav pas kws nwg khaav has tas, yog nwg cov hluas nraug muab them nwg, rua qhov nwg nrug puab ua nkauj ua nraug, ua kuas puamtsuaj taag huv tuabsi. Kuv yuav muab nwg tej vaaj txiv maab hab txiv ncuav pas ua kuas qhuav ib yaam le mojsaab qhua, tej tsaj qus yuav lug muab ua kuas puamtsuaj taag.

¹³Kuv yuav rau txim rua nwg vim nwg tsi ncu qaab kuv lawm, nwg tau moog hlawv tshuaj tsw qaab rua Npa-aas, hab coj saw nyaj saw kub moog caum nwg cov hluas nraug qaab. Tug TSWV yog tug has le ntawd.

¹⁴Yog le ntawd, kuv yuav coj nwg moog tso rua tom taj suabpuam dlua; kuv has lug mog lug muas rua nwg, txhaj coj tau nwg rov lug.

¹⁵Kuv yuav muab nwg tej vaaj txiv maab rov qaab rua nwg hab muab lub Haav Covnyom hloov ua lub roojloog kws ca sab tau. Nwg yuav teb kuv tej lug ib yaam le thaus nwg tseem hluas kws nwg nyavnyuas lug nraag tebchaws Iziv lug.

¹⁶Nwg yuav rov hu kuv ua nwg tug quasyawg. Nwg yuav tsi hu kuv ua nwg tug Npa-aas ntxiv lawm.

¹⁷Kuv yuav tsi pub nwg has txug Npa-aas lub npe ib zag le lawm.

¹⁸Lub sijhawm ntawd kuv yuav coglug rua tej tsaj qus hab tej noog kuas tsi xob lug tum kuv tsaav tuabneeg. Kuv yuav tshem tej cuabyeej ua rog tawm huv lub tebchaws moog kuas taag, tsi has tej ntaaj, hab tej neevnti; kuv yuav ca kuv tsaav tuabneeg nyob kaaj sab lug hab muaj kev thaajyeeb.

¹⁹Yixalayees, kuv yuav yuav koj ua kuv tug quaspuj; Kuv yuav ua ncaaj hab muab sab npuab koj; Kuv yuav hlub hab mov tshua koj hab yuav koj ua kuv tug moog ibtxhis le.

²⁰Kuv yuav ua lawv le kuv tej lug cog tseg hab yuav koj ua kuv tug, hab koj yuav leeg yuav kuv ua koj tug TSWV.

²¹Lub sijhawm ntawd, kuv yuav teb kuv tsaav tuabneeg Yixalayees tej lug thov. Kuv yuav tso naag lug rua huv lub nplajteb nuav, ces lub nplajteb yuav tuaj qoobloo, txiv maab hab txiv ntoo roj.

²³Kuv yuav tsaa kuv tsaav tuabneeg rua huv lub tebchaws ntawd hab ua kuas puab vaammeej. Kuv yuav hlub cov tuabneeg kws muaj lub npe hu has tas, “Tsi Hlub,” hab hlub cov tuabneeg kws hu has tas, “Tsi Yog Kuv Tsaav Tuabneeg,” kuv yuav has tas, “Mej yog kuv tsaav tuabneeg.” Hab puab yuav teb has tas, “Koj yog peb tug Vaajtswv.”