Read Hmong Njua Hauxeyas 5 Bible Online

Hauxeyas 5 - Hmong Njua bible

Hauxeyas 5

¹“Cov povthawj, mej ca le noog! Cov Yixalayees, mej ca le ua tuab zoo noog! Cov kws yog vaajntxwv caajceg, mej ca le noog! Tsimnyog mej txav txim ncaaj nceeg tabsis mej tsi ua. Yog le ntawd, mej yuav raug txim. Mej yog rooj ntaa npuj kws caws tog nyob huv lub nroog Mixepas, yog lub vaag kws nthuav rua sau lub Roob Tanpaus,

²hab yog lub qhov kws tub heev huv lub nroog Akaxias. Kuv yuav rau txim rua mej txhua tug huv tuabsi.

³Kuv paub Yixalayees lub sab, nwg yeej tsiv tsi dlhau kuv le. Nwg yeej tsi muaj lub sab ncaaj, hab nwg cov tuabneeg yeej tsi tsimnyog pehawm kuv.”

⁴Tej kev phem kev qas kws cov tuabneeg ua ntawd thaiv puab txuj hauv kev tsi pub puab lug cuag tau puab tug Vaajtswv. Puab lub sab xib rua kev pe dlaab pe mlom, puab txhaj tsi leeg yuav tug TSWV.

⁵Cov Yixalayees tej kev khaavtheeb rov kom puab. Puab tej kev txhum ua rua puab qaug, hab cov Yudas nrug puab qaug ib yaam nkaus.

⁶Puab coj puab tej yaaj hab nyuj moog tua fij rua tug TSWV, tabsis tej ntawd paab tsi tau puab dlaabtsi le. Puab nrhav tsi tau tug TSWV, rua qhov nwg tub tso puab tseg lawm.

⁷Puab tsi muab sab npuab tug TSWV; puab tej mivnyuas tsi yog tug TSWV mivnyuas. Yog le ntawd tshuav tsi ntev, puab hab puab tej laj tej teb yuav raug puamtsuaj taag.

⁸Ca le tshuab xyu huv lub nroog Nkinpe-as! Ca le tshuab xyu ceebtoom huv lub nroog Lamas! Ca le qw ntshu nrooj huv lub nroog Npethavees! Cov Npeenyamees ca le moog ntaus rog!

⁹Nub rau txim tub lug yuav txug, cov Yixalayees yuav raug puamtsuaj. Cov Yixalayees, yeej yuav muaj tej xwm nuav lug tag tag le!

¹⁰Tug TSWV has tas, “Kuv chim rua cov Yudas, rua qhov puab cov thawjcoj tau txhij tubrog tuaj tua cov Yixalayees hab txeeb puab lub tebchaws. Qhov ntawd yog le ntawd kuv yuav rau txim nyaav rua puab ib yaam le dlej nyaab.

¹¹Cov Yixalayees raug tsimtxom; luas txeeb tau puab lub tebchaws lawm, rua qhov puab pheej moog thov cov tuabneeg kws paab tsi tau tuaj paab puab xwb.

¹²Kuv yuav tso kev puamtsuaj lug rua cov Yixalayees hab yuav ua kuas cov Yudas puag ntsoog moog.

¹³“Thaus cov Yixalayees pum has tas puab raug mob saab heev, hab thaus cov Yudas pum puab tej qhov txhaab, ces cov Yixalayees txhaj moog thov cov Axilias tug vaajntxwv kws muaj fwjchim luj tuaj paab puab. Tabsis nwg tsi muaj cuabkaav cawm tau puab lossis khu tau puab tej qhov txhaab zoo.

¹⁴Kuv yuav tawmtsaam cov Yixalayees hab cov Yudas ib yaam le tug tsuv ntxhuav. Kuv yuav muab puab dlua ua tej dlaim povtseg. Thaus kuv hai puab moog povtseg, tsi muaj leejtwg yuav muaj cuabkaav cawm tau puab le.

¹⁵“Vim kuv tsaav tuabneeg tej kev txhum, kuv yuav muab puab tso tseg moog txug thaus kws puab txomnyem txaus, hab puab tig rov lug cuag kuv tsaiv. Tej zag thaus puab raug kev txomnyem le ntawd, puab yuav tig rov lug nrhav kuv.”