Read Hmong Njua Hauxeyas 6 Bible Online

Hauxeyas 6 - Hmong Njua bible

Hauxeyas 6

¹Tej tuabneeg has tas, “Peb ca le rov moog cuag tug TSWV! Nwg tau ua rua peb raug mob, tabsis nwg yuav khu peb tej mob kuas zoo; nwg tau ua rua peb tej nqaj to, tabsis nwg yuav qhwv peb tej qhov txhaab puas yog?

²Ob peb nub sau nuav nwg yuav muab peb hloov dlua tshab hab peb yuav tau moog nrug nwg nyob.

³Ca peb xyum tag kuas paub tug TSWV. Nwg yuav lug cuag peb ib yaam le qhov kaaj ntug kws naj taagkig muaj hab ib yaam le kob naag tshab kws naj xyoo lug rua huv lub nplajteb.”

⁴Tabsis tug TSWV has tas, “Cov Yudas hab cov Yixalayees, kuv ua dlaabtsi rua mej? Mej hlub kuv ib yaam le cov fuab tsaus ib plag thaus sawv ntxuv hab ib yaam le tej lwg dlej kws tshaav ntuj tuaj zab ces qhuav taag lawm xwb.

⁵Tub yog vim le ntawd, kuv txhaj khaiv kuv cov cevlug lug qha kuv tej kev txav txim hab kev puamtsuaj rua mej. Mej tub pum tseeb hab paub meej tej kws kuv xaav tau ntawm mej lawm.

⁶Kuv xaav tau mej txujkev hlub kws tsi paub kawg, tsi yog xaav tau tej tsaj kws mej coj tuaj tua fij rua kuv. Kuv xaav kuas kuv tsaav tuabneeg paub kuv tseeb dlua le kws ca puab coj khoom tuaj fij rua kuv.

⁷“Tabsis thaus puab lug txug rua ntawm lub nroog Adaas xwb; puab tub rhuav kuv tej lug cog tseg lawm.

⁸Nkile-as yog lub nroog kws cov tuabneeg ua phem ua qas hab tua tuabneeg nyob puv nkaus.

⁹Cov povthawj zoo ib yaam le tej tubsaab kws tog rawv ua limham rua tej tuabneeg taug kev, puab tua tuabneeg lawv txujkev kws moog rua ntawm qhov chaw dlawbhuv huv Sekhees, hab txhua yaam kev phem nuav yog puab txhobtxwm ua xwb.

¹⁰Kuv pum muaj ib yaam kws phem heev nyob huv cov Yixalayees: Qhov ntawd yog kuv tsaav tuabneeg moog pe mlom ua rua puab tsi huv lawm.

¹¹“Has rua mej cov Yudas paub tas, kuv tub teem caij yuav rau txim rua mej lawv le tej kev txhum kws mej naj nub ua ntawd lawm.