Read Hmong Njua Hauxeyas 7 Bible Online

Hauxeyas 7 - Hmong Njua bible

Hauxeyas 7

¹“Thaus kws kuv xaav khu kuv tsaav tuabneeg Yixalayees hab ua kuas puab rov vaammeej dlua los kuv tsuas pum tej kev phem kev qas kws puab ua xwb. Puab ib leeg dlaag ntxag ib leeg; puab tsoo luas tsev hab nyag luas khoom; puab fuab luas tug ntawm tej kev.

²Puab xaav tsi txug has tas, kuv yuav cim ntsoov tej kev phem kev qas kws puab ua, puab tej kev txhum nyob puagncig puab, hab kuv pum ntsoov tsi muaj ib yaam dlaabtsi roog tau le.”

³Tug TSWV has tas, “Tej pejxeem tuavhuv dlaag ntxag ua phem rua vaajntxwv hab nwg cov numtswv.

⁴Puab suavdlawg puavleej yog tuabneeg ntxeev sab hab tsi sis fwm. Puab tej kev ntxub kub ib yaam le lub qhovtxus kws luas rauv cub ncuav hab cig ntsaa thuav moog txug thaus ncuav sav tsi tsij tawg ntxiv le.

⁵Nub kws puab ua kevcai hawm vaajntxwv, puab muab cawv txhaus vaajntxwv hab nwg cov numtswv kuas qaug hab vwm cawv ua dlog ua dlig.

⁶Puab txujkev tuavhuv kub ib yaam le lub qhovtxus. Puab txujkev chim ntaiv fwv ib mos, ces thaus kaaj ntug puab txujkev chim txawm cig plawg ib yaam le tej nplaim tawg.

⁷“Vim puab txujkev chim kws kub heev ntawd, puab txhaj muab puab cov thawjcoj tua povtseg. Puab cov vaajntxwv raug tua ib tug dlhau ib tug, tabsis tsi muaj leejtwg tsaa ncauj thov kuv paab le.”

⁸Tug TSWV has tas, “Cov Yixalayees zoo ib yaam le lub ncuav kws muab cub sav txug nraab xwb. Puab ca sab kawg rua tej tsaav tuabneeg kws nyob puagncig puab.

⁹Puab tub tsi paub has tas, qhov kws puab tso sab rua cov tuabneeg txawv tebchaws ntawd ua rua puab tug zug ntaug zuj zug lawm. Vaajtswv tub teem nub kawg ca rua puab lawm, tabsis puab tsi paub le.

¹⁰Cov Yixalayees tej kev khaavtheeb rov kom puab lawm. Txawm yog tub muaj tej xwm nuav los puab tseem tsi kaam tig lug cuag tug TSWV kws yog puab tug Vaajtswv.

¹¹Cov Yixalayees lub sab ywjfaab ywjfwj ib yaam le tug nquab kws yaa moog yaa lug tsi paub yuav tsaws qhov twg; thawj zag puab moog thov cov Iziv paab, ces tom qaab ntawd puab tsuas moog thov cov Axilias paab!

¹²Tabsis kuv yuav nthuav vaag cuab puab ib yaam le cuab noog. Kuv yuav rau txim rua puab vim tej kev phem kev qas kws puab tau ua taag lug.

¹³“Puab raug puamtsuaj lawm! Puab tau ntxeev sab rua kuv hab tso kuv tseg. Puab yuav raug kev puamtsuaj. Kuv xaav cawm kuas puab dlim, tabsis puab tsi muaj nplooj sab pehawm kuv tag.

¹⁴Puab tsi muaj lub sab dlawb paug thov kuv tag, tabsis puab laam quaj tso cev dlaa xwb. Thaus puab thov kuv pub nplej hab cawv txiv maab rua puab, puab muab rag hlais puab tej nqaj to. Puab ntxeev sab rua kuv.

¹⁵Kuv yog tug cob qha puab hab txhawb kuas puab muaj zug los puab tseem ntxeev sab tawmtsaam kuv.

¹⁶Puab tso kuv tseg hab moog teev tug vaajtswv kws tsi muaj fwjchim dlaabtsi le. Kuv ca sab tsi tau rua puab ib yaam le tug qhaub neevnti kws tuag dluav lawm. Rua qhov puab cov thawjcoj khaavtheeb heev, puab yuav raug nav ntaaj tuag taag hab cov Iziv yuav luag puab plig.”