Read Hmong Njua Hauxeyas 9 Bible Online

Hauxeyas 9 - Hmong Njua bible

Hauxeyas 9

¹Cov Yixalayees, mej ca le tseg tsi xob ua rooj noj rooj haus ib yaam le tej tuabneeg tsi fwm Vaajtswv ua. Mej tau tso mej tug Vaajtswv tseg hab tsi muab sab npuab nwg lawm. Mej muab mej muag rua Npa-aas thoob tebchaws ib yaam le tej namndlav, hab mej txaus sab rua tej nplej kws mej xaav has tas yog nwg muab them rua mej!

²Tabsis tshuav tsi ntev mej yuav tsi muaj nplej hab roj txiv ntoo txaus rua mej noj, hab tsi muaj cawv txiv maab rua mej haus lawm.

³Cov Yixalayees yuav tsi nyob huv tug TSWV lub tebchaws lawm, tabsis puab yuav tau rov moog nyob nraag tebchaws Iziv hab yuav tau noj tej zaub mov kws tsi huv nyob peg tebchaws Axilias.

⁴Thaus puab moog nyob huv lwm tsaav tuabneeg tej tebchaws, puab yuav tsi muab cawv txiv maab lossis tsaj tuaj fij rua tug TSWV lawm. Txhua tug kws noj puab tej zaub mov ntawd yuav ua rua nwg tsi huv ib yaam le noj tej zaub mov huv tsev paam tuag. Tej zaub mov ntawd tsuas yog cov tuabneeg kws tshaib plaab noj xwb. Tej zaub mov ntawd tsi muaj ib yaam kws yuav zoo coj moog fij rua huv tug TSWV lub Tuamtsev le.

⁵Thaus txug lub sijhawm kws teem tseg ua kevcai hawm tug TSWV, puab yuav ua le caag?

⁶Thaus txug nub kws kev puamtsuaj lug ti, tej tuabneeg yuav tawg tsiv moog nyob ua saab ua sua, cov Iziv yuav sau puab lug ua ke, coj puab moog log rua huv Meefis. Puab tej txhaab nyaj hab tej vaaj tse yuav tuaj nroj tsuag hab tuaj xuavpaug ntxhuv nyo.

⁷Tub txug lub sijhawm kws puab raug txim hab lub sijhawm kws puab yuav sau puab tej kev txhum. Thaus muaj le ntawd cov Yixalayees yuav paub! Mej has tas, “Tug cev Vaajtswv lug nuav ruag kawg nkaus le! Tug tuabneeg kws Vaajtswv tshoov sab ntawd vwm lawm.” Mej ntxub kuv heev, vim mej ua txhum luj kawg le.

⁸Vaajtswv tau khaiv kuv ua ib tug cev Vaajtswv lug, lug ntuag nwg tsaav tuabneeg Yixalayees. Tabsis txhua qhov kws kuv moog, mej cuab hlua tog kuv kev ib yaam le cuab noog. Huv Vaajtswv lub tebchaws los tej tuabneeg tseem ua yeebncuab rua cov cevlug.

⁹Puab ua phem ua qas ib yaam le thaus kws puab nyob huv Nkinpe-as. Vaajtswv yuav cim ntsoov tej kev txhum kws puab ua hab rau txim rua puab vim tej kws puab ua ntawd.

¹⁰Tug TSWV has tas, “Thaus chivthawj kws kuv nrhav tau cov Yixalayees zoo ib yaam le kuv pum tsob txiv maab kws tuaj huv taj suabpuam. Thaus chivthawj kws kuv pum mej cov yawmkoob zoo ib yaam le kuv pum thawj phaum txiv ncuav pas kws sav thaus txug caij. Tabsis thaus puab lug txug ntawm lub Roob Pe-aus puab txawm pib pe Npa-aas hab tsi ntev puab txawm moog ua phem ua qas ib yaam le tej vaajtswv kws puab nyam pe ntawd lawm.

¹¹Cov Yixalayees lub fwjchim yuav pluj moog ib yaam le tug noog yaa, puab yuav tsi muaj tubki; puab tej quaspuj yuav tsi xeeb tub hab tsi yug mivnyuas lawm.

¹²Txawm yog puab muaj taug mivnyuas los kuv yuav coj huv tuabsi moog tsi tseg ib tug muaj sa nyob le. Thaus kuv tso tsaav tuabneeg nuav tseg lawm, puab yuav raug kev txomnyem luj kawg nkaus.”

¹³Tug TSWV, kuv tub pum luas caum puab cov mivnyuas hab muab tua lawm.

¹⁴Kuv yuav thov kuas koj ua le caag rua cov tuabneeg nuav? Thov koj ua rua puab tej quaspuj kuas muaj tsi taug mivnyuas hab ua kuas puab tsi muaj mig pub puab tej mivnyuas!

¹⁵Tug TSWV has tas, “Puab chiv ua kev txhum nyob huv lub nroog Nkilenkaas. Kuv txhaj pib ntxub puab thaus ntawd lug. Hab vim yog tej kev phem kev qas kws puab ua ntawd, kuv txhaj yuav muab puab ntab tawm huv kuv lub tebchaws moog. Kuv yuav tsi hlub puab ntxiv lawm; puab cov thawjcoj puavleej ntxeev sab tawmtsaam kuv.

¹⁶Cov Yixalayees zoo ib yaam le tsob ntoo kws tej caag tub qhuav taag hab tsi txi txiv lawm. Puab yuav tsi muaj mivnyuas, txawm yog puab muaj los kuv yuav muab tej mivnyuas kws puab hlub heev tua povtseg huv tuabsi.”

¹⁷Tug Vaajtswv kws kuv pehawm yuav tso nwg tsaav tuabneeg tseg, vim puab tsi noog nwg lug. Puab yuav ua tuabneeg poob tebchaws moog nyob xyaw luas lwm tsaav tuabneeg.