Read Hmong Njua Yau-Ees 1 Bible Online

Yau-Ees 1 - Hmong Njua bible

Yau-Ees 1

¹Ntawm nuav yog tug TSWV cov lug kws has rua Pethuyees tug tub Yau-ees.

²Mej cov tuabneeg laug ca le ua tuab zoo noog; Txhua tug kws nyob huv tebchaws Yudas, mej ca le noog. Puas tau muaj tej yaam zoo le nuav tshwmsim lug rua mej tam lossis mej cov yawmkoob tam?

³Ca le pav tej nuav qha rua mej cov mivnyuas; ces puab maam le pav qha rua puab tej mivnyuas, puab ib tam yuav pav qha rua ib tam moog le.

⁴Kooj txomfaav ib paab taag ib paab tuaj, nyob puv nkaus ntawm tej qoobloo; yaam twg kws ib paab kooj noj tsi taag, mas lwm paab kooj lug muab khee noj kuas taag.

⁵Cov tuabneeg qaug cawv, mej ca le sawv hab quaj; cov tuabneeg quav cawv, mej ca le tsaa suab hlo quaj; rua qhov tej txiv maab kws yuav ca ua cawv tshab tub puamtsuaj taag lawm.

⁶Ib paab tubrog kooj yaa tsaus nti tuaj tawmtsaam peb lub tebchaws; puab muaj zug heev hab coob kawg nkaus suav tsi txheeb le; puab tej nav ntse npaum nkaus le nav tsuv ntxhuav.

⁷Puab muab peb tej vaaj txiv maab noj taag dlu lug hab noj peb tej ntoo txiv ncuav pas taag huv tuabsi. Puab noj tej nplooj, hab kaws tej tawv, tsuas tshuav tej kaav nyob dlawb paug ca xwb.

⁸Tej pejxeem, mej ca le quaj ib yaam le tug hluas nkauj quaj tug hluas nraug kws nwg taabtom yuav moog yuav ua nwg tug quasyawg, tabsis tug hluas nraug ntawd ca le tuag lawm.

⁹Tsi muaj nplej lossis cawv txiv maab coj moog fij rua huv lub Tuamtsev; cov povthawj quaj ntsuag vim tsi muaj tuabneeg nqaa khoom tuaj fij rua tug TSWV lawm.

¹⁰Tej teb aav lab ploog ca; tej aav qhuav nkig nkuav; rua qhov tej qoobloo puamtsuaj taag, tej txiv maab hab tej txiv ntoo roj los qhuav ntsws taag.

¹¹Cov tuabneeg ua laj ua teb, mej ca le tu sab; cov tuabneeg kws tu tej vaaj txiv maab, mej ca le tsaa suab quaj, rua qhov tej qeb, tej nplej hab tej qoobloo tub puamtsuaj taag lawm.

¹²Tej txiv maab hab txiv ncuav pas qhuav hab ntsws; Tej txiv ntoo puavleej qhuav hab tuag taag. Tej tuabneeg suavdlawg nyob nyuaj sab ntsuav.

¹³Mej cov povthawj kws fij khoom ntawm lub thaaj, ca le npua ntaub tsaaj hab quaj! Ca le moog rua huv lub Tuamtsev hab quaj ib mos kaaj ntug! Rua qhov tsi muaj nplej lossis cawv txiv maab fij rua mej tug Vaajtswv lawm.

¹⁴Ca le has kuas suavdlawg yoo mov, ca le hu suavdlawg tuaj ua ke! Ca le hu cov thawjcoj hab taagnrho cov Yudas tuaj rua huv tug TSWV kws yog mej tug Vaajtswv lub Tuamtsev, hab thov nwg paab.

¹⁵Tub yuav txug nub kws Tug TSWV teem ca, yog nub kws tug muaj fwjchim luj kawg nkaus yuav ua kuas ib puas tsaav yaam raug puamtsuaj. Nub ntawd yog nub kws suavdlawg yuav ntshai kawg nkaus le!

¹⁶Peb saib ntsoov peb tej qoobloo raug puamtsuaj taag tsi muaj kev zoo sab nyob huv Vaajtswv lub Tuamtsev lawm.

¹⁷Tej noob qoob lwj taag rua huv tej aav qhuav, tsi muaj qoobloo sau lug rua huv txhaab; yog le ntawd tej txhaab txhaj pob puag taag.

¹⁸Tej nyuj qaug zuj zig, rua qhov tsi muaj zaub rua nyuj noj le lawm; tej yaaj los tsi muaj zaub noj ib yaam nkaus.

¹⁹Tug TSWV, kuv tsaa ncauj thov koj, vim tej nroj tsuag hab tej ntoo tuag taag, ib yaam le suavtawg plhov.

²⁰Txawm yog tej tsaj qus los puavleej tsaa suab quaj thov koj paab; rua qhov tej haav dlej qhuav taag lawm.