Read Hmong Njua Yau-Ees 2 Bible Online

Yau-Ees 2 - Hmong Njua bible

Yau-Ees 2

¹Mej ca le nyob sau Vaajtswv lub Roob Dlawbhuv tshuab xyu ceebtoom rua suavdlawg. Cov Yudas, mej ca le ntshai ua ib ce tshee nyo! Rua qhov tub yuav txug nub kws tug TSWV teem tseg.

²Nub ntawd ntuj yuav tsaus ndlais teb yuav tsaus nti; fuab laum nkaus, ntuj tsaus dlub ncab, cov tubrog kooj ntawd nas tsaam tsaus nti tuaj ib yaam le dluab ntxoov ntxoo roog tej roob. Yeej tsi tau muaj dlua ib yaam zoo le nuav hlo le, hab yuav tsi muaj ib zag zoo le nuav ntxiv lawm.

³Puab noj tej nroj tsuag hab qoobloo taag dlu lug ib yaam le suavtawg kub. Lub tebchaws nuav zoo ib yaam le lub Vaaj Edees nyob tom puab hauv ntej, tabsis tom puab qaab, aav lab ploog ib yaam le taj suabpuam. Tsi muaj ib yaam dlaabtsi yuav tsiv dlim ntawm puab le.

⁴Puab lub cev zoo ib yaam le neeg lub; puab dlha ib yaam le tej neeg kws caij moog ntaus rog.

⁵Thaus puab dlha moog rua sau tej roob, mas nrov npaum le tej tsheb neeg nrov; hab nrov nroo ntwg ib yaam le suavtawg kub tej nroj tsuag qhuav. Puab sawv ua tsheej kaab coob ib yaam le cov tubrog kws npaaj nrooj yuav ntaus rog.

⁶Puab moog txug qhov twg, txhua tug tuabneeg ntshai ua ntsejmuag thumxem taag.

⁷Cov kooj ntawd mos tsaus nti tuaj ib yaam le paab tubrog; puab nce tej ntsaa yeej ib yaam le tej tubrog. Puab too hauv li nas tsaam moog rua tom hauv ntej tsi tig saib qaab,

⁸lossis ib tug tsi txeeb ib tug ntej le. Puab nas luas tej yeej tuaj, tsi muaj leejtwg tiv tau le.

⁹Puab txeem tuaj rua huv nroog, puab dlha hlaa tej ntsaa yeej tuaj; puab nce pis hlo moog rua sau tej tsev hab nkaag ntawm tej qhovrais moog ib yaam le tej tubsaab.

¹⁰Thaus puab taug kev tuaj, lub nplajteb ua zug koog, lub ntuj tseeg nkawg. Lub nub hab lub hli ca le tsaus dlub ncab, hab tej nubqub los ca le tsi ci lawm.

¹¹Tug TSWV nthe nqho nwg cov tubrog, cov tubrog kws noog lug muaj coob hab muaj zug kawg le. Nub kws tug TSWV teem ca yog nub kws suavdlawg yuav ntshai kawg nkaus! Leejtwg tseem yuav dlim tau?

¹²Tug TSWV has tas, “Txawm yog le ntawd los nwgnuav mej ca le tso plhuav tej kev txhum ntawd tseg, hab tig rov lug cuag kuv ntawm mej lub sab dlawb paug, ca le yoo mov, quaj ntsuag hab tu sab.

¹³Mej yuavtsum ua rua luas pum has tas mej nyuaj sab tag; tsi yog laam dlua mej tej rig tsho xwb.” Ca le rov lug cuag tug TSWV kws yog mej tug Vaajtswv. Nwg muaj lub sab dlawb sab zoo hab puv npo txujkev hlub; Nwg muaj lub sab ntev hab ua lawv le nwg tej lug cog tseg; Nwg zoo sab yuav zaam txim hab tsi rau txim rua mej.

¹⁴Tej zag tug TSWV kws yog mej tug Vaajtswv, yuav hloov sab hab foom koob moov kuas mej muaj qoobloo nplua mag, ces mej yuav muaj qoobloo hab cawv txiv maab fij rua tug TSWV.

¹⁵Ca le tshuab xyu sau Roob Xi-oos; hu suavdlawg tuaj ua ke hab ua kevcai yoo mov!

¹⁶Ca le hu kuas cov pejxeem tuaj ua ke; kuas puab txhua tug npaaj tuaj koom lub rooj saablaaj tseemceeb; coj cov laug, cov mivnyuas yau hab cov mivnyuas mog tuaj huv tuabsi. Txawm yog tej nam txiv kws sis yuav tshab los puab yuavtsum tawm huv puab tej tsev tuaj moog koom.

¹⁷Cov povthawj kws tu tug TSWV ntawm lub thaaj hab ntawm txujkev kws moog rua huv lub Tuamtsev kem nruab nraab, ca le quaj hab thov Vaajtswv has tas: “Tug TSWV, thov hlub koj tsaav tuabneeg. Thov tsi xob ca lwm tsaav tuabneeg txobthuam peb, saib tsi taug peb hab has tas, ‘Mej tug Vaajtswv nyob qhov twg?’ ”

¹⁸Tom qaab ntawd tug TSWV rov hlub nwg lub tebchaws hab taabncuab nwg tsaav tuabneeg.

¹⁹Nwg teb puab tej lug thov has tas, “Nwgnuav kuv yuav pub kuas mej muaj nplej, cawv txiv maab, hab roj txiv ntoo, ces mej yuav txaus sab heev. Lwm tsaav tuabneeg yuav tsi txobthuam mej ntxiv lawm.

²⁰Kuv yuav lawv cov tubrog kooj kws tuaj peg qaumteb tuaj kuas tawm moog; hab yuav ntab ibtxha moog rua tom taj suabpuam. Kuv yuav puav paab kws ua ntej moog rua huv Havtxwv Tuag, hab kuv yuav puav paab tom tom qaab moog rua huv Havtxwv Meditelanees. Puab tej cev tuag yuav tsw lwj ntxag. Kuv yuav ua kuas puab puamtsuaj taag, vim tej kws puab tau ua rua mej lawm.

²¹“Tej laj teb, mej tsi xob ntshai, tabsis ca le xyivfaab hab zoo sab rua tej kws tug TSWV tau ua paab mej lawm.

²²Tej tsaj txhu, tsi xob ntshai, tej tshaav zaub los tub rov hlaav ntsuab xab, tej ntoo los rov tawg paaj txi txiv, hab tej txiv maab txiv ncuav pas los muaj nplua mag lawm.

²³“Cov tuabneeg huv Xi-oos, ca le zoo sab, zoo sab rua tej kws tug TSWV kws yog mej tug Vaajtswv tub paab mej lawm; nwg tso naag lug kuas txaus rua lub caij ntuj naag; Nwg tso naag ntuj tsaug hab naag ntuj tshab lug rua mej ib yaam le yaav thaus u.

²⁴Yuav muaj nplej puv nkaus huv mej tej tshaav nplej; hab tej rhawv tsuam txiv maab yuav muaj cawv txiv maab hab roj txiv ntoo puv phwj yog.

²⁵Ntau xyoo kws taag lug, kooj txomfaav noj mej tej qoobloo taag lawm, tabsis nwgnuav kuv yuav them rov qaab rua mej, kuv yog tug kws tso cov tubrog nuav tuaj tawmtsaam mej ntaag.

²⁶Nwgnuav mej yuav muaj noj muaj haus nplua mag hab txaus mej sab, mej yuav qhuas tug TSWV kws yog mej tug Vaajtswv, tug kws ua tej num zoo heev paab mej; kuv tsaav tuabneeg yuav tsi raug luas txobthuam ntxiv lawm.

²⁷Cov Yixalayees, mej yuav paub has tas, kuv nrug nraim mej hab kuv yog tug TSWV kws yog mej tug Vaajtswv, tsi muaj dlua lwm tug lawm. Kuv tsaav tuabneeg yuav tsi raug luas txobthuam ntxiv lawm.”

²⁸“Tom qaab ntawd kuv yuav pub kuv tug ntsujplig lug rua txhua tug: mej tej tub hab tej ntxhais yuav qha kuv txujlug; mej cov laug yuav ua npau suav; hab mej cov tub hluas yuav pum tej zaaj ywgtoog.

²⁹Thaus txug lub sijhawm ntawd, kuv yuav pub kuv tug ntsujplig rua tej tubkhai, tsi has quaspuj lossis txivneej.

³⁰“Thaus txug nub ntawd, kuv yuav ua tej yaam cim qha rua sau nruab ntug hab huv nplajteb; yuav muaj ntshaav nrug, suavtawg hab paa tawg nchu auv nab.

³¹Ua ntej nub tseemceeb hab tej kev txhawj ntshai kws tug TSWV teem ca ntawd lug txug, lub nub yuav tsaus hab lub hli yuav lab ib yaam le ntshaav.

³²Tabsis txhua tug kws thov tug TSWV paab yuav dlim, lawv le tug TSWV tau has tseg lawm tas, ‘Muaj qee leej kws nyob huv Yeluxalees yuav tsiv dlim; cov tuabneeg kws kuv xaiv lawm txhaj yuav muaj sa nyob xwb.’ ”