Read Hmong Njua Yau-Ees 3 Bible Online

Yau-Ees 3 - Hmong Njua bible

Yau-Ees 3

¹Tug TSWV has tas, “Thaus txug lub sijhawm ntawd, kuv yuav rov txhim khu lub tebchaws Yudas hab lub nroog Yeluxalees kuas vaammeej.

²Kuv yuav sau txhua tsaav tuabneeg tuaj ua ke hab coj puab moog rua huv lub Haav Txav Txim. Kuv yuav txav txim rua puab nyob huv lub haav ntawd lawv le tej kws puab ua rua kuv tsaav tuabneeg lawm. Puab ua rua cov Yixalayees tawg moog nyob ua saab ua sua rua lwm tebchaws, hab muab kuv lub tebchaws Yixalayees faib rua puab.

³Puab rhu ntawv saib leejtwg tau cov tuabneeg kws raug nteg ntawd. Puab muab tej tub hab tej ntxhais muag moog ua luas qhev; kuas tau nyaj moog them tej namndlav hab yuav cawv haus.

⁴“Tiles, Xidoos hab lub tebchaws Filitees, mej pheej ua dlaabtsi rua kuv? Puas yog mej yuav ua phem pauj kuv? Yog mej ua le ntawd kuv yuav ua pauj rua mej taamsim nuav ntaag!

⁵Mej muab kuv tej nyaj, tej kub hab nqaa kuv tej khoom kws muaj nqes moog tso rua huv mej tej tuamtsev lawm.

⁶Mej coj cov tuabneeg huv tebchaws Yudas hab huv lub nroog Yeluxalees moog muag rua cov tuabneeg Kilis, kuas puab moog nyob dleb puab lub tebchaws.

⁷Nwgnuav kuv yuav coj puab tawm huv tej tebchaws kws mej coj puab moog muag ntawd rov lug. Kuv yuav ua rua mej ib yaam le mej tau ua rua puab lawm.

⁸Kuv yuav ca luas coj mej tej tub hab tej ntxhais moog muag rua cov tuabneeg Yudas; cov Yudas yuav muab mej tej tub tej ntxhais muag moog rua cov tuabneeg Xanpees kws nyob dleb heev. Kuv yog tug TSWV kws has le ntawd.

⁹“Ca le has qha rua txhua tsaav tuabneeg le nuav: ‘Mej ca le npaaj moog ua rog; txhij mej cov tubrog kws txawj ntaus rog tuaj; sau taagnrho mej cov tubrog tuaj hab sawv kev moog!

¹⁰Ca le muab mej tej khais laij teb lug ntaus ua ntaaj; hab muab mej tej lag hlais nplej lug ntaus ua muv. Txawm yog tug kws tsi muaj zug le los yuavtsum tau moog ntaus rog.

¹¹Mej txhua tsaav tuabneeg kws nyob ibncig ntawm nuav, ca le tuaj sis sau rua huv lub vuaghaav.’ ” Tug TSWV, thov koj ca le tso koj cov tubrog tuaj tawmtsaam puab!

¹²“Txhua tsaav tuabneeg yuavtsum npaaj kuas txhij tuaj rua huv lub Haav Txav Txim. Kuv kws yog tug TSWV yuav nyob quastsawg qhov ntawd txav txim rua txhua tsaav tuabneeg kws nyob ibncig ntawd.

¹³Puab yog cov tuabneeg kws ua phem heev; ca le muab puab hlais ib yaam le hlais nplej; ca le muab puab tsuam ib yaam le tsuam txiv maab, kuas cov kua ndlwg si laim.”

¹⁴Thaus muaj ntau txheeb ntau vaam leej tuabneeg tuaj rua huv lub Haav Txav Txim lawm; ces nub kws tug TSWV teem tseg tub lug yuav txug.

¹⁵Lub nub hab lub hli yuav tsaus dlub ncab, hab tej nubqub yuav tsi ci lawm.

¹⁶Tug TSWV nthe nqho sau lub Roob Xi-oos tuaj; nwg lub suab nrov ntxhe ntwg huv lub nroog Yeluxalees, lub nplajteb hab lub ntuj tseeg nkawg; tabsis nwg yuav tsomkwm nwg tsaav tuabneeg.

¹⁷“Cov Yixalayees, mej yuavtsum paub has tas, kuv yog tug TSWV kws yog mej tug Vaajtswv; kuv nyob sau lub Roob Xi-oos kws yog kuv lub roob dlawbhuv. Yeluxalees yuav yog lub nroog kws dlawbhuv; tej tuabneeg txawv tebchaws yuav ntaus tsi yeej ib zag le lawm.

¹⁸Thaus txug lub sijhawm ntawd luas yuav cog txiv maab puv nkaus sau tej roob, hab yuav pum nyuj noj zaub nplawg nta sau tej roob; tebchaws Yudas yuav muaj dlej nplua mag haus tsi taag. Muaj ib tug dlej yuav ndlwg huv tug TSWV lub Tuamtsev moog ywg lub Haav Akaxias.

¹⁹“Tebchaws Iziv yuav ua taj suabpuam; hab tebchaws Edoos yuav puamtsuaj taag, rua qhov puab tau tuaj tua lub tebchaws Yudas hab tua tej tuabneeg kws tsi muaj txim.

²⁰Kuv yuav sawv cev cov tuabneeg kws raug tua tuag chaw ua pauj puab cov yeebncuab, kuv yuav tsi tseg cov tuabneeg ua txhum ib tug le; tabsis lub tebchaws Yudas hab lub nroog Yeluxalees yuav muaj tuabneeg nyob moog ibtxhis; hab kuv kws yog tug TSWV, yuav nyob sau lub Roob Xi-oos.”