Read Hmong Njua Amaus 2 Bible Online

Amaus 2 - Hmong Njua bible

Amaus 2

¹Tug TSWV has tas, “Cov tuabneeg Mau-am ua txhum taag los rov ua txhum dlua hab, tub yog vim le nuav kuv yuav rau txim rua puab. Puab saib vaajntxwv Edoos cov pobtxhaa tsi muaj nqes, puab txhaj muab hlawv ua tshauv taag lawm.

²Kuv yuav tso suavtawg lug hlawv lub tebchaws Mau-am hab lub nroog Keli-aus tej yeej tubrog kuas kub nyab taag. Cov tuabneeg Mau-am yuav tuag taag rua huv tshaav rog thaus sis ntaus sis tua ntxhuv quas nyo hab thaus tej tubrog tshuab xyu hab qw ntshu nrooj.

³Kuv yuav tua tug thawj kws kaav lub tebchaws Mau-am hab cov thawjcoj huv lub tebchaws ntawd povtseg huv tuabsi.”

⁴Tug TSWV has tas, “Cov tuabneeg Yudas ua txhum taag los rov ua txhum dlua hab, tub yog vim le nuav kuv yuav rau txim rua puab. Puab thuam kuv tej lug qha hab tsi ua lawv le kuv tej Kevcai. Tej vaajtswv cuav kws puab cov yawmkoob ibtxwm teev ua rua puab yuam kev lawm.

⁵Yog le ntawd kuv yuav tso suavtawg lug hlawv cov Yudas hab lub nroog Yeluxalees tej yeej tubrog kuas kub nyab taag.”

⁶Tug TSWV has tas, “Cov tuabneeg Yixalayees ua txhum taag los rov ua txhum dlua hab, tub yog vim le nuav kuv yuav rau txim rua puab. Puab muab cov tuabneeg ncaaj nceeg kws tshuav puab nqe muag moog ua luas qhev, cov tuabneeg ntawd txomnyem heev, txawm yog tuab nkawm khau khab xwb los puab tub tsi muaj nyaj them.

⁷Puab quab yuam caij tsuj cov tuabneeg kws tsi muaj chaw vaamkhom hab muab cov tuabneeg txomnyem thawb ntag rua ib caag. Ob txiv tub moog ntxag ib tug nkauj qhe ua rua luas saib tsi taug kuv lub npe kws dlawbhuv.

⁸Txhua qhov kws tuabneeg moog pehawm puavleej muaj tuabneeg pw rawv sau tej khaub dluag kws puab moog muab ntawm cov tuabneeg txomnyem kws tshuav puab nqe lug yuam nqe ca. Puab moog muab cov tuabneeg ntawd tej cawv txiv maab lug haus huv puab tug Vaajtswv lub Tuamtsev.

⁹“Kuv tsaav tuabneeg, tub yog vim kuv tseem hlub tshua mej, kuv txhaj ua rua cov tuabneeg Amaules raug kev puamtsuaj taag, puab yog cov tuabneeg kws tej txivneej sab ib yaam le tej ntoo cab hab tawv npaum nkaus le tej ntoo qheb ntaag.

¹⁰Kuv coj mej tawm nraag tebchaws Iziv lug hab coj mej ncig moog ncig lug nraag taj suabpuam tau plaub caug xyoo hab kuv muab cov Amaules lub tebchaws rua mej ua mej tug.

¹¹Kuv tau xaiv mej cov tub qee leej lug ua cov cevlug hab cov tub hluas qee leej lug ua cov Naxis. Cov Yixalayees, tej nuav puas yog lug tseeb tag? Kuv yog tug TSWV tej lug nuav yog kuv has.

¹²Tabsis mej yuam kuas cov Naxis haus cawv hab txwv tsi pub cov cevlug qha kuv tej lug.

¹³Nwgnuav kuv yuav muab mej tsuj ntag rua huv aav hab mej yuav ntsaaj ib yaam le lub tsheb kws ntim nplej puv nkaus kws ndlog nrov qij qej ntaag.

¹⁴Cov tuabneeg kws dlha ceev yuav tsiv tsi dlim; cov tuabneeg kws muaj zug heev tug zug yuav ntaug, hab cov tubrog yuav tsi muaj peevxwm cawm tau puab txujsa.

¹⁵Cov tuabneeg tua neevnti yuav sawv tsi taug khov ntawm puab qhov chaw, cov tuabneeg dlha ceev yuav dlha tsi taug, hab cov kws caij neeg puab yuav tsiv tsi dlim le.

¹⁶Thaus txug nub ntawd, cov tubrog kws sab tawv heev yuav muab puab tej cuabyeej tso tseg hab tsiv lawm xwb.” Tug TSWV yog tug kws has le ntawd.