Read Hmong Njua Amaus 3 Bible Online

Amaus 3 - Hmong Njua bible

Amaus 3

¹Cov Yixalayees, mej yog tsaav tuabneeg kws tug TSWV coj tawm nraag tebchaws Iziv lug: Mej ca le noog tej lug kws tug TSWV has txug mej.

²“Txhua tsaav tuabneeg kws nyob huv lub nplajteb nuav, tsuas yog mej tsaav tuabneeg nkaus xwb, kuv txhaj paub hab hlub. Mej tau ua txhum luj heev kuv yuav rau txim rua mej.”

³Ob tug txivneej kws tsi tau sis thaam hum ua ntej, puas yuav taug kev moog ua ke tau?

⁴Yog tsuv ntxhuav tum tsi tau tsaj, nwg puas yuav nyooj huv haav zoov tuaj? Yog thaav tsuv ntxhuav tum tsi tau ib yaam dlaabtsi, nwg puas yuav nyooj huv nwg lub qhov tuaj?

⁵Yog tsi rau sua noog puas yuav maag ntxab? Yog tsi muaj ib yaam dlaabtsi moog phaav rooj ntxab, ntxab puas yuav txhais?

⁶Tej suab raaj suab xyu kws tshuab txhij tubrog huv nroog yuav tsi ua rua cov pejxeem ntshai los? Yog tug TSWV tsi pub kuas muaj kev puamtsuaj lug raug lub nroog yuav ua le caag muaj tau?

⁷Tug TSWV kws kaav ib puas tsaav yaam yuav ua ib yaam dlaabtsi, nwg yeej xub qha rua nwg cov tubkhai kws yog cov cevlug paub ua ntej nwg maam ua.

⁸Thaus tsuv ntxhuav nyooj puas muaj leejtwg tawv tsi ntshai? Thaus tug TSWV kws kaav ib puas tsaav yaam has lawm, puas yuav muaj leejtwg npog tsi kaam qha nwg tej lug?

⁹Ca le has rua cov tuabneeg kws nyob huv tej loog huv tebchaws Iziv hab huv lub nroog Asedaus has tas: “Ca le moog sis sau rua peg cov pov roob kws nyob puagncig lub nroog Xamalis, suavdlawg yuav pum tej xwm phem hab tej kev nruj tsiv kws cov tuabneeg huv lub nroog ntawd ua.”

¹⁰Tug TSWV has tas, “Cov tuabneeg nuav txeeb hab coj luas tej khoom lug tso puv nkaus rua huv puab tej vaaj tse. Puab tsi paub yuav ua tuabneeg ncaaj nceeg le.

¹¹Yog vim le ntawd yeebncuab yuav tuaj vij puab lub tebchaws, muab puab tej ntsaa yeej rhuav kuas puamtsuaj hab fuab puab tej cuabtaam.”

¹²Tug TSWV has tas, “Thaus tsuv ntxhuav tum ib tug yaaj noj, ntshai tug tswv yaaj tsuas txeeb tau ob txhais kutaw lossis ib saab pobntseg xwb. Ib yaam nkaus le ntawd, cov tuabneeg Xamalis kws pw dlaa luj luam sau tej rooj kws pua ntaub tsuj ntaub npuag tsuas muaj qee leej txhaj tsiv dlim xwb.”

¹³Tug TSWV kws yog Vaajtswv tug kws muaj Fwjchim Luj kawg nkaus has tas, “Mej ca le ua tuab zoo noog hab has rua Yakhauj cov xeebntxwv tas,

¹⁴Nub kws kuv rau txim rua tsaav tuabneeg Yixalayees vim puab tej kev txhum, kuv yuav rhuav tej thaaj kws nyob huv lub nroog Npethees kuas puamtsuaj. Tej thaaj txhua ceg kaum yuav tawg taag hab poob rua huv aav.

¹⁵Kuv yuav rhuav tej tsev kws tuabneeg tuaj su thaus lub caij ntuj no hab lub caij ntuj suv. Tej tsev kws muab kaug ntxhw ua yuav pob taag ua tsheej pawg; txhua lub tsev luj los yuav raug rhuav kuas puamtsuaj taag.”