Read Hmong Njua Amaus 4 Bible Online

Amaus 4 - Hmong Njua bible

Amaus 4

¹Ca le noog, cov quaspuj huv lub nroog Xamalis, mej ua tuab zoo noog tej lug nuav, mej rog ib yaam le cov nyuj kws luas pub zaub rua noj zoo heev peg tebchaws Npasaas, mej tsimtxom cov tuabneeg txomnyem, quab yuam cov tuabneeg pluag, hab mej yuam kuas mej cov quasyawg laub cawv lug rua mej haus!

²Tug TSWV kws kaav ib puas tsaav yaam yog tug dlawbhuv, nwg tau coglug tseg has tas, “Thaus txug nub ntawd luas yuav muab nqailauj lug nqai mej cejdlaab caab moog; mej txhua tug yuav zoo ib yaam le tug ntseg kws maag nuv.

³Luas yuav caab mej tawm huv tej qhov ntsaa yeej tawg moog, hab muab mej pov rua saab nrau.”

⁴Tug TSWV kws kaav ib puas tsaav yaam has tas, “Cov Yixalayees, mej ca le moog ua kev txhum tom qhov chaw dlawbhuv kws nyob huv Npethees. Yog mej pheej yuav ua kev txhum xwb! Mej ca le moog rua huv lub nroog Nkilenkaas hab ua kev txhum kuas kawg sab kawg ntsws! Ca le naj taagkig caab tsaj moog tua ua khoom fij, hab nqaa mej tej ib feem kaum moog fij peb nub ib zag.

⁵Ca le moog muab mej tej ncuav tuaj fij ua Vaajtswv tsaug hab ca le khaav tej kws mej muab tshaaj coj tuaj ua khoom fij! Mej yeej yog cov tuabneeg kws nyam ua le ntawd.

⁶“Kuv yog tug tso tej kev tshaib kev nqhes lug rua mej txhua lub nroog, tabsis mej tseem tsi tig rov lug cuag kuv.

⁷Kuv tsi tso naag lug ywg mej tej qoobloo thaus mej tej laj tej teb qhuav heev. Kuv tso naag lug rua qee lub nroog xwb, tabsis dlua le tej kuv tsi tso, hab kuv tso naag lug rua qee thaaj teb xwb, tabsis dlua le tej aav yuav qhuav nkig nkuav.

⁸Tej tuabneeg nqhes dlej qaug zuj zig, cov tuabneeg kws nyob huv ob peb lub nroog sau nthwv tuaj rua huv lub nroog kws puab ca sab has tas, puab yuav nrhav tau dlej haus, tabsis qhov ntawd kuj tsi muaj dlej txaus haus hab. Txawm le ntawd los mej tseem tsi tig rov lug cuag kuv.

⁹“Kuv tso cua tuaj ntsawj mej tej qoobloo qhuav taag. Kuv tso kooj lug noj mej tej vaaj txiv maab, mej tej txiv ncuav pas hab mej tej txiv ntoo roj taag huv tuabsi. Txawm le ntawd los mej tseem tsi tig rov lug cuag kuv.

¹⁰“Kuv tso sub tawg sub ntshaa lug rua mej ib yaam le kuv tso lug rua lub tebchaws Iziv. Kuv tua mej cov tub hluas tuag taag rua huv tshaav rog hab caab mej tej neeg moog taag; kuv ua kuas mej tau na tej tuabneeg kws tuag tej kua lwj huv mej tej yeej. Txawm le ntawd los mej tseem tsi tig rov lug cuag kuv.”

¹¹Tug Tswv has tas, “Kuv tub ua rua mej cov ibtxha raug puamtsuaj ib yaam le kuv ua rua lub nroog Xaudoos hab lub nroog Kaumaulas; mej cov kws seem zoo ib yaam le dlaim tawg kws thau huv qhovcub lug. Txawm le ntawd los mej tseem tsi tig rov lug cuag kuv le.

¹²‘Yog le ntawd, cov Yixalayees, kuv yuav rau txim rua mej. Mej ca le npaaj tog, rua qhov kuv yuav txav txim rua mej.’ ”

¹³Vaajtswv yog tug kws tsim tej toj roob hauv peg hab tej cua. Nwg qha nwg tej kev xaav rua tuabneeg paub. Nwg hloov nruab nub moog ua mo ntuj. Nwg moog kev sau lub nplajteb qhov chaw sab. Nwg lub npe hu ua tug TSWV kws yog Vaajtswv tug muaj Fwjchim Luj kawg nkaus!