Read Hmong Njua Amaus 5 Bible Online

Amaus 5 - Hmong Njua bible

Amaus 5

¹Cov Yixalayees, mej ca le noog zaaj nkauj quaj ntsuag kws kuv hu rua mej nuav:

²Tug nkaujxwb Yixalayees tub qaug lawm hab yuav tsi sawv le! Nwg yuav pw huv aav moog le hab tsi muaj leejtwg yuav tsaa nwg sawv.

³Tug TSWV kws kaav ib puas tsaav yaam has tas, “Ib lub nroog huv tebchaws Yixalayees xaa ib txheeb leej tubrog tawm moog ntaus rog, tabsis tsuas tshuav ib puas leej rov lug xwb; muaj dlua ib lub nroog xaa ib puas leej tubrog tawm moog, tabsis tsuas tshuav kaum leej rov lug xwb.”

⁴Tug TSWV has rua cov Yixalayees tas, “Mej ca le lug cuag kuv, mej txhaj yuav muaj sa ua neej nyob.

⁵Tsi xob moog pehawm kuv huv Npesenpas. Tsi xob moog nrhav kuv huv Npethees, nyob peg Npethees tsi muaj dlaabtsi le. Tsi xob moog peg lub nroog Nkilenkas, nwg cov tuabneeg tub raug nteg coj moog rua lwm tebchaws lawm.”

⁶Mej ca le moog cuag tug TSWV, mej txhaj yuav muaj sa ua neej nyob. Yog mej tsi moog cuag nwg, nwg yuav sau zog cov Yixalayees moog ib yaam le suavtawg kub. Suavtawg yuav kub cov tuabneeg kws nyob huv lub nroog Npethees, hab yuav tsi muaj leejtwg tua tau tej suavtawg ntawd le.

⁷Mej cov kws muab txujkev ncaaj nceeg hloov ua kev ab kev dlaw hab muab txujkev tseeb tso tseg, mej raug puamtsuaj lawm lauj!.

⁸Tug TSWV tsim tej nubqub Peleyas hab Auliyoos. Nwg muab mo ntuj hloov ua nruab nub hab muab nruab nub hloov ua mo ntuj. Nwg hu kuas dlej tawm huv havtxwv tuaj hab muab laub rua lub nplajteb. Nwg lub npe hu ua Tug TSWV.

⁹Nwg tso tej kev puamtsuaj lug rua cov tuabneeg kws muaj fwjchim hab puab tej ntsaa yeej kws khov heev.

¹⁰Mej ntxub txhua tug kws coj ncaaj hab has lug tseeb nyob huv tsev tu plaub.

¹¹Mej tsimtxom cov tuabneeg pluag hab nyag puab tej qoobloo. Yog le ntawd mej yuav tsi tau nyob huv tej tsev pobzeb zoo zoo kws mej ua, hab tsi tau haus tej kuas txiv maab kws mej cog.

¹²Kuv paub mej muaj txim luj hab mej tau ua txhum ntau heev. Mej tsimtxom cov tuabneeg ua zoo, mej yuav luas tej nyaj xab hab txwv tsi pub luas txav txim ncaaj nceeg rua cov tuabneeg pluag.

¹³Yog le ntawd, nwgnuav yog lub sijhawm kws muaj kev phem kev qas heev, cov tuabneeg txawj ntse txhaj nyob tuabywv tsi ua dlaabtsi le!

¹⁴Mej yuavtsum xyum ua zoo tsi xob ua phem, mej txhaj muaj sa ua neej nyob. Tug TSWV kws yog Vaajtswv tug muaj Fwjchim Luj kawg nkaus txhaj yuav nrug mej nyob ib yaam le mej tau khaav has tas, nwg nrug nraim mej nyob.

¹⁵Mej yuavtsum ntxub txujkev ua phem, nyam txujkev ua zoo; hab mej yuavtsum has tej lug tseeb nyob huv tsev tu plaub. Tej zag tug TSWV yuav hlub cov tuabneeg kws tseem nyob huv lub tebchaws nuav.

¹⁶Yog le ntawd tug TSWV kws muaj Fwjchim Luj kawg nkaus, tug kws kaav ib puas tsaav yaam has tas, “Nyob rua huv tej nroog yuav muaj tuabneeg quaj ntsuag lawv tej kev. Txawm yog tej tub qoob tub loo los luas yuav hu tuaj nyav tej tuag nrug cov tuabneeg kws luas ndlav tuaj nyav tej tuag.

¹⁷Yuav muaj tuabneeg quaj nyav ntshu nrooj huv tej vaaj txiv maab. Tej nuav yuav tshwm tuaj, rua qhov kuv yuav lug txav txim rua mej.” Tug TSWV yog tug kws has le ntawd.

¹⁸Mej cov kws xaav pum tug TSWV nub yuav raug kev puamtsuaj lauj! Nub ntawd yuav muaj dlaabtsi zoo rua mej? Vim nub ntawd yog nub kws yuav tsaus ntuj nti rua mej, tsi yog nub kws ci rua mej pum kev.

¹⁹Nub ntawd yuav zoo ib yaam le tug tuabneeg kws tsiv tsuv ntxhuav moog ntsib dlais! Lossis zoo ib yaam le tug tuabneeg kws lug txug tsev, muab teg ntha rua tim phaab ntsaa txawm raug naab tum.

²⁰Tug TSWV nub yuav coj kev tsaus ntuj lug tsi yog coj kev kaaj lug; nub ntawd yuav yog nub kws tsaus ntuj nti, tsi muaj qhov kaaj hlo le.

²¹Tug TSWV has tas, “Kuv ntxub mej tej kev ua rooj noj rooj haus ntawd heev; kuv saib tsi taug tej ntawd le lawm.

²²Thaus mej coj tej tsaj tuaj tua hlawv ua khoom fij hab coj tej qoobloo tuaj fij rua kuv, kuv yuav tsi txais yuav; hab kuv yuav tsi txais tej tsaj kws mej txaav rog rog coj tuaj tua fij rua kuv ntawd.

²³Ca le tseg tsi xob hu nkauj nrov nrov lawm; kuv tsi xaav nov mej tej suab nkauj nogncaas nrov.

²⁴Tabsis ca txujkev ncaaj nceeg ndlwg ib yaam le dlej ndlwg hab ca txujkev tseeb ndlwg ib yaam le tug dlej ndlwg tsi paub nqhuab.

²⁵“Cov Yixalayees, thaus kuv coj mej kev tau plaub caug xyoo nraag taj suabpuam, kuv tsi tau has kuas mej muab tsaj tuaj tua theej txhoj hab ua khoom fij rua kuv le.

²⁶Tabsis nwgnuav, vim mej tau pe tug mlom Sakus kws yog mej tug vaajntxwv, hab pe lub Nubqub Kaivaas kws yog mej tug vaajtswv, mej yuavtsum coj tej mlom ntawd nrug mej moog,

²⁷thaus kuv muab mej ntab moog nyob huv lub tebchaws kws dlhau ntawm lub nroog Damaxes moog lawm.” Tug TSWV kws muaj npe hu ua Vaajtswv tug kws muaj Fwjchim Luj kawg nkaus has le ntawd.