Read Hmong Njua Amaus 6 Bible Online

Amaus 6 - Hmong Njua bible

Amaus 6

¹Kev txomnyem yuav lug raug mej cov kws nyob tso sab lug huv lub nroog Xi-oos hab mej cov kws nyob kaaj sab lug huv lub nroog Xamalis, mej cov kws yog tuabneeg tseemceeb ntawm tsaav tuabneeg Yixalayees, hab mej yog cov kws tsoom pejxeem ca sab rua.

²Mej ca le moog saib lub nroog Kalenes, ces tsua moog saib lub nroog Hamas kws luj heev hab nqeg moog saib cov Filitees lub nroog Nkas. Puas yog cov nroog nuav zoo tshaaj cov Yudas hab cov Yixalayees ob lub tebchaws? Puas yog puab tej nrim dlej nrim aav dlaav tshaaj mej le?

³Mej yeej tsi xaav pum nub kws muaj kev puamtsuaj, tabsis tej kws mej ua taabtom coj nub ntawd lug ze mej lawm.

⁴Kev puamtsuaj yuav lug raug mej cov kws tau zoo pw sau tej rooj kws pua ntaub tsuj ntaub npuag hab tua xyuas nyuj hab thaav yaaj noj xwb!

⁵Mej nyam sau tej nkauj tshab hu ib yaam le Daviv, hab hu nrug tej nkauj nogncaas.

⁶Mej haus tej taig cawv puv phwj yog hab muab tej roj tsw qaab kws kim kim lug pleev ua tsw qaab ntxag, tabsis mej tsi quavntsej thaus mej pum cov Yixalayees lub tebchaws raug kev puamtsuaj.

⁷Yog le ntawd mej yuav yog thawj paab kws raug luas nteg coj moog rua lwm tebchaws. Qhov kws mej muaj rooj noj rooj haus hab ua kev lomzem yuav tsi muaj ntxiv lawm.

⁸Tug TSWV kws yog Vaajtswv tug muaj Fwjchim Luj kawg nkaus tau coglug ruaj khov tseg has tas, “Kuv ntxub cov Yixalayees tej kev khaavtheeb, kuv ntxub puab tej vaaj tse kws ci ntsaa ab. Kuv yuav muab mej lub tuamceeb nroog hab txhua tsaav yaam kws nyob huv cob rua mej cov yeebncuab teg.”

⁹Txawm yog ib tse tuabneeg tshuav kaum leej txivneej xwb los puab yeej yuav tuag taag huv tuabsi.

¹⁰Tug tuag ntawd ib tug kwvtij kws saib kev paam tuag yuav tuaj coj tug tuag tawm huv tsev moog. Nwg yuav nug cov tuabneeg kws nyob huv lub tsev ntawd has tas, “Puas muaj lwm tug nrug mej nyob hab?” Ces puab yuav teb has tas, “Tsi muaj.” Ces tug kwvtij ntawd yuav has tas, “Ua tuabywv! Peb yuavtsum ceevfaaj tsi xob tuav tug TSWV lub npe le.”

¹¹Thaus tug TSWV tso ncauj lawm, tej tsev tsi has lub luj lub miv, yuav puamtsuaj taag.

¹²Neeg puas dlha tau tso saas ntwg sau tej roob tsuas? Puas muaj tuabneeg caab nyuj moog laij tau havtxwv? Tabsis mej muab txujkev ncaaj nceeg hloov moog ua tshuaj lom tuabneeg hab muab yaam zoo hloov ua yaam phem.

¹³Mej khaav has tas mej moog txeeb tau lub nroog Laudenpas. Mej khaav has tas, “Peb yeej muaj zug txaus kws moog txeeb tau lub nroog Kalena-ees lug ua peb tug.”

¹⁴Tug TSWV kws yog Vaajtswv tug muaj Fwjchim Luj kawg nkaus has tas, “Cov Yixalayees, kuv taabtom khaiv cov tubrog txawv tebchaws tuaj tua mej lub tebchaws. Puab yuav tsimtxom mej txij ntawm lub dlawm Hamas saab qaumteb moog txug nraag tug dlej Alanpas kws nyob saab qaabteb.”