Read Hmong Njua Amaus 7 Bible Online

Amaus 7 - Hmong Njua bible

Amaus 7

¹Tug TSWV kws kaav ib puas tsaav yaam ua rua kuv pum ib zaaj ywgtoog. Thaus luas hlais tej zaub nyuj kws yog vaajntxwv tug taag lawm; kuv pum tug TSWV tso ib cov kooj coob heev lug noj tej zaub nyuj kws taabtom pib hlaav zum zawg tuaj.

²Nyob rua huv zaaj ywgtoog ntawd, kuv pum kooj muab txhua yaam nroj tsuag kws ntsuab mog nyoos huv lub tebchaws noj taag dlu lug, ces kuv txhaj has rua tug TSWV tas, “Tug TSWV kws kaav ib puas tsaav yaam, thov koj zaam txim rua koj tsaav tuabneeg! Puab yuav ua le caag ua neej nyob? Rua qhov puab tseem yau hab tsi muaj zug le.”

³Tug TSWV hloov sab hab has tas, “Kuv yuav tsi pub tej kws koj pum nuav tshwmsim.”

⁴Tug TSWV kws kaav ib puas tsaav yaam rov ua rua kuv pum dlua ib zaaj ywgtoog. Kuv pum tug TSWV npaaj suavtawg lug rau txim rua nwg tsaav tuabneeg. Cov suavtawg ntawd tub kub lub nam havtxwv huv nruab tivtxwv hab pib kub thooj aav nuav lawm.

⁵Ces kuv has tas, “Tug TSWV kws kaav ib puas tsaav yaam, thov koj ca le tsum! Koj tsaav tuabneeg yuav ua le caag ua neej nyob? Rua qhov puab tseem yau hab tsi muaj zug le!”

⁶Tug TSWV rov hloov dlua sab hab has tas, “Tej nuav los yuav tsi pub kuas tshwmsim ib yaam nkaus.”

⁷Tug TSWV rov ua rua kuv pum dlua ib zaaj ywgtoog. Kuv pum tug TSWV sawv ntawm ib saab ntsaa yeej kws luas siv txuj hlua ntsuag qhov kws luas ua tav lawm; hab nwg tuav rawv txuj hlua ntawm nwg txhais teg.

⁸Nwg nug kuv has tas, “Amaus, koj pum dlaabtsi?” Kuv teb has tas, “Kuv pum ib txuj hlua.” Ces nwg has tas, “Kuv siv txuj hlua nuav qha rua kuv tsaav tuabneeg paub has tas, puab zoo ib yaam le tej ntsaa yeej kws tsi siv txuj hlua ntsuag kuas ncaaj. Kuv yuav tsi hloov sab ib zag ntxiv le lawm, kuv yeej yuav rau txim rua puab.

⁹Qhov chaw kws Ixaj cov xeebntxwv pehawm kuv yuav raug puamtsuaj. Cov Yixalayees qhov chaw dlawbhuv los yuav muab tso tseg nphob xuav ca. Kuv yuav ua kuas Vaajntxwv Yelaunpau-aas cov xeebntxwv raug nav ntaaj nav rag tuag tu noob nrho moog.”

¹⁰Amaxiyas kws yog tug povthawj nyob huv Npethees tau tso xuv moog rua Vaajntxwv Yelaunpau-aas kws kaav tebchaws Yixalayees has tas, “Amaus taabtom tuav tswvyim haub ntxag cov pejxeem kuas ntxeev sab rua koj. Tej lug kws nwg qha ntawd yuav rhuav lub tebchaws nuav kuas puamtsuaj.

¹¹Nwg has le nuav: ‘Yelaunpau-aas yuav tuag rua huv tshaav rog hab cov Yixalayees yuav raug luas nteg coj tawm huv puab lub tebchaws moog rua lwm tebchaws.’ ”

¹²Ces Amaxiyas txawm has rua Amaus tas, “Yawm cevlug, txaus lawm lauj! Koj ca le rov qaab moog rua nraag tebchaws Yudas hab qhuab qha nyob nraag. Ca puab them nqe zug rua koj.

¹³Tsi xob qhuab qha huv lub nroog Npethees nuav ib zag ntxiv lawm. Rua qhov ntawm nuav yog vaajntxwv qhov chaw pehawm kws yog lub tebchaws nuav lub Tuamtsev.”

¹⁴Amaus teb has tas, “Kuv tsi yog tug cev Vaajtswv lug kws yuav nqe zug. Kuv yog ib tug tuabneeg yug tsaj hab kuv tu tej txiv ncuav pas xwb.

¹⁵Tabsis tug TSWV tau coj kuv tawm ntawm kuv teg num yug yaaj, hab has kuas kuv tuaj cevlug rua nwg tsaav tuabneeg Yixalayees xwb.

¹⁶Yog le ntawd, nwgnuav koj ca le noog tej lug kws tug TSWV has. Koj has kuas kuv tseg tsi xob cev Vaajtswv lug, hab tseg tsi xob qhuab qha tshev cov tuabneeg Yixalayees lawm.

¹⁷Yog le ntawd Amaxiyas, tug TSWV has rua koj tas, ‘Koj tug quaspuj yuav moog ua namndlav nyob huv nroog, hab koj cov mivnyuas yuav raug tua tuag taag rua huv tshaav rog. Yuav muab koj lub tebchaws faib rua luas, hab koj yuav moog tuag rua huv lwm tsaav tuabneeg kws tsi ntseeg Vaajtswv lub tebchaws. Hab tsaav tuabneeg Yixalayees yuav raug luas coj tawm huv puab lub tebchaws moog nyob rua lwm tebchaws.’ ”