Read Hmong Njua Amaus 8 Bible Online

Amaus 8 - Hmong Njua bible

Amaus 8

¹Tug TSWV kws kaav ib puas tsaav yaam rov ua rua kuv pum dlua ib zaaj ywgtoog. Kuv pum ib tawb txiv ntoo.

²Tug TSWV nug kuv has tas, “Amaus, koj pum dlaabtsi?” Kuv teb has tas, “Kuv pum ib tawb txiv ntoo.” Tug TSWV has rua kuv tas, “Lub sijhawm kawg tub lug txug kuv tsaav tuabneeg Yixalayees lawm. Kuv yuav tsi hloov sab ib zag ntxiv le lawm, kuv yuav rau txim rua puab xwb.

³Thaus txug nub ntawd tej suab hu nkauj huv vaajntxwv lub loog yuav hloov ua suab quaj suab nyav. Yuav muaj tuabneeg tuag nyob txhua qhov. Luas yuav coj puab moog povtseg ntsag tu lawm xwb.”

⁴Mej cov kws caij tsuj cov tuabneeg txomnyem hab tuavhuv ua kuas cov tuabneeg pluag kws nyob huv lub tebchaws puamtsuaj, mej ca le noog.

⁵Mej xaav tuabywv huv sab has tas, “Peb laaj tog nub dlawbhuv dlhau kawg le, peb yuav rawm muag peb tej qoobloo. Thaus twg nub Xanpataus maam le dlhau, kuas peb txhaj tau muag peb tej qoobloo? Ces peb muab muag kuas kim kim, txhobtxwm luj kuas tsi puv hab khu peb tej teev lug luj ntxo cov tuabneeg kws tuaj yuav peb tej qoob.

⁶Peb muab peb tej nplej kws tsi puv muag ua nqe kim kim. Peb moog nrhav yuav tug tuabneeg pluag kws tshuav luas nqe lug ua qhev, txawm yog ib nkawm khau khab xwb los nwg tub them tsi taug luas.”

⁷Tug TSWV kws yog cov Yixalayees tug Vaajtswv tau coglug has tas, “Kuv yuav cim ntsoov tej kev phem kws puab ua ntawd ca.

⁸Yog le ntawd aav yuav qeeg, hab lub tebchaws yuav cu ua zug koog; lub tebchaws yuav fuam hab nphau nphwv ib yaam le tug dlej Niles. Ces txhua tug tuabneeg kws nyob huv lub tebchaws yuav quaj ntsuag.

⁹Thaus txug lub sijhawm ntawd kuv yuav ua kuas lub nub poob thaus taav su, hab thaus nruab nub lub nplajteb yuav tsaus nti. Kuv yog tug TSWV kws kaav ib puas tsaav yaam has le ntawd.

¹⁰Kuv yuav muab mej tej rooj noj rooj haus hloov moog ua nteeg pluj nteeg tuag hab muab tej nkauj kws mej hu ua kev zoo sab hloov moog ua suab quaj suab nyav. Kuv yuav ua kuas mej muab mej tej plaubhau chais hab muab ntaub tsaaj lug naav, hab mej yuav zoo ib yaam le tej nam txiv kws quaj nyav obtug tuab tug tub kws tuag lawm. Nub ntawd yuav yog nub kawg kws lwj sab tshaaj plawg.

¹¹“Thaus txug lub sijhawm ntawd, kuv yuav tso kev tshaib nqhes lug rua lub tebchaws. Tej tuabneeg yuav tshaib nqhes heev, tabsis tsi yog tshaib mov; puab yuav nqhes heev tabsis tsi yog nqhes dlej. Puab yuav tshaib hab nqhes tug TSWV tej lug. Kuv yog tug TSWV kws kaav ib puas tsaav yaam has le ntawd.

¹²Tej tuabneeg yuav taug kev ntawm Havtxwv Tuag moog txug rua tom Havtxwv Meditelanees hab ncig saab qaumteb moog txug rua saab nubtuaj. Puab yuav nrhav tug TSWV Txujlug rua txhua qhov chaw, tabsis puab yuav nrhav tsi tau le.

¹³Nub ntawd tej tub hluas hab ntxhais hluas kws muaj zug khov kho los yuav qaug zug heev vim txujkev tshaib nqhes.

¹⁴Cov tuabneeg kws twv ntxhas tej mlom huv lub nroog Xamalis has tas, ‘Muaj cov Daas tug vaajtswv’, lossis ‘muaj cov Npesenpas tug vaajtswv’, cov tuabneeg ntawd yuav qaug hab tsi sawv rov lug ib zag le lawm.”