Read Hmong Njua Amaus 9 Bible Online

Amaus 9 - Hmong Njua bible

Amaus 9

¹Kuv pum tug TSWV sawv ntawm lub thaaj ib saab. Nwg saamfwm has tas, “Ca le siv zug tsoo lub Tuamtsev tej hauv ncej kuas tej taw ntsaa ua zug koog. Tsoo kuas tej ntawd tawg taag hab ca tej ntawd poob moog tsoo tej tuabneeg taubhau. Kuv yuav tua cov tuabneeg kws seem txhua tug kuas tuag taag rua huv tshaav rog. Yuav tsi pub leejtwg tsiv dlhau; tsi pub ib tug twg tsiv tau dlim le.

²Txawm yog puab yuav khawb puab txujkev moog txug rua huv tub tuag teb los kuv yuav nteg puab rov lug. Txawm yog puab yuav nce moog txug sau ntuj los kuv yuav coj puab nqeg rov lug.

³Yog puab tsiv moog nkaum sau ncov roob Kalemees los kuv yuav nrhav kuas tau hab nteg puab lug. Yog puab tsiv moog nkaum huv qaab thu havtxwv los kuv yuav has kuas tug tsaj nyaum huv havtxwv moog tum puab.

⁴Yog puab raug puab cov yeebncuab nteg coj moog lawm los kuv yuav has kuas puab cov yeebncuab muab puab tua huv tuabsi. Kuv tub txav txim sab lawm has tas, kuv yuav ua kuas puab raug kev puamtsuaj taag hab yuav tsi paab puab ib zag ntxiv le lawm.”

⁵Tug TSWV kws kaav ib puas tsaav yaam kws muaj Fwjchim Luj kawg nkaus, nwg kov lub nplajteb, lub nplajteb qeeg ua zug koog; txhua tug kws nyob huv lub nplajteb yuav quaj ntsuag. Lub nplajteb yuav nphau pis nphwv saus pis zog ib yaam le tug Dlej Niles.

⁶Tug TSWV tsim nwg lub tsev rua sau ntuj ceebtsheej, nwg tsim nruab ntug zoo le lub kaus roog lub nplajteb. Nwg hu kuas dlej tawm huv havtxwv tuaj hab muab laub rua lub nplajteb. Nwg lub npe hu ua tug TSWV!

⁷Tug TSWV has tas, “Cov Yixalayees, kuv xaav txug cov tuabneeg Sudaas ib yaam le kuv xaav txug mej. Kuv coj cov tuabneeg Filitees huv koog povtxwv Keletes hab cov Xilias huv tebchaws Kis lug, ib yaam le kuv coj mej nraag tebchaws Iziv lug hab ntaag.

⁸Kuv kws yog tug TSWV kws kaav ib puas tsaav yaam, kuv saib ntsoov lub tebchaws Yixalayees kws puv nkaus txujkev txhum, hab kuv yuav ua kuas nwg raug kev puamtsuaj taag huv lub nplajteb nuav moog. Tabsis kuv yuav tsi ua kuas Yakhauj cov xeebntxwv raug puamtsuaj.

⁹“Kuv yuav tso ncauj hab tshau cov Yixalayees ib yaam le luas muab tshaus tshau nplej. Kuv yuav muab puab xyaw txhua tsaav tuabneeg txhaj tshem tau cov tuabneeg kws tsi muaj nqes povtseg.

¹⁰Cov tuabneeg txhum kws nyob xyaw kuv tsaav tuabneeg yuav raug tua tuag taag rua huv tshaav rog, puab yog cov kws has tas, ‘Vaajtswv yuav tsi ca kev phem lug raug peb ib zag le.’ ”

¹¹Tug TSWV has tas, “Thaus txug nub ntawd kuv yuav rov txhim khu Daviv lub tebchaws kws zoo ib yaam le lub tsev kws tub puag taag lawm. Kuv yuav txhim khu tej ntsaa yeej dlua tshab. Kuv yuav rov khu hab ua kuas zoo ib yaam le lub qub thaus u.

¹²Cov Yixalayees yuav ntaus yeej cov tuabneeg kws seem nyob huv lub tebchaws Edoos hab txhua tsaav tuabneeg kws thaus u yog kuv tsaav tuabneeg ib zag lug lawm.” Tug TSWV kws ua kuas muaj tej nuav tshwmsim yog tug has le ntawd.

¹³Tug TSWV has tas, “Nub ntawd tub lug yuav txug, thaus ntawd tej qoobloo yuav sav sai heev hab sau tsi yeej, hab tej txiv maab los yuav sav sai heev, tsuam kua txiv maab los tub tsuam tsi yeej. Cawv qaab zib yuav nrug sau tej hauv roob lug, hab tej cawv ntawd yuav ndlwg laub lug sau tej pov roob.

¹⁴Kuv yuav coj kuv tsaav tuabneeg rov lug nyob rua huv puab lub tebchaws. Puab yuav rov txhim khu puab tej nroog kws puag taag lawm rua puab nyob; puab yuav xov vaaj cog txiv maab txhaj tau cawv txiv maab haus; puab yuav xov vaaj cog txiv ntoo txhaj tau txiv ntoo noj.

¹⁵Kuv yuav ca puab nyob huv lub tebchaws kws kuv muab pub rua puab ua puab tug lawm, hab kuv yuav tsi muab puab ntab tawm ib zag ntxiv le lawm.” Tug TSWV kws yog mej tug Vaajtswv has le ntawd.