Read Hmong Njua Yaunas 3 Bible Online

Yaunas 3 - Hmong Njua bible

Yaunas 3

¹Tug TSWV rov has rua Yaunas has tas:

²“Koj ca le moog rua peg lub nroog Nineves kws yog lub nroog luj, hab moog qha rua puab lawv le tej lug kws kuv tub qha rua koj lawm.”

³Yog le ntawd Yaunas txhaj noog tug TSWV lug hab moog rua peg lub nroog Nineves kws yog lub nroog luj heev, moog kutaw peb nub txhaj le dlhau.

⁴Yaunas sawv kev moog rua peg lub nroog. Thaus kws nwg moog tau ib nub lawm, nwg tshaajtawm has tas, “Tshuav plaub caug nub sau nuav xwb lub nroog Nineves yuav raug puamtsuaj.”

⁵Cov tuabneeg kws nyob huv lub nroog Nineves txawm ntseeg Vaajtswv tej lug. Yog le ntawd, puab txhaj txav txim sab kuas txhua tug ua kevcai yoo mov, tsi has tej numtswv, tej tubqhe hab tug hlub tug yau muab ntaub tsaaj lug npua, qha has tas puab tub tso txujkev txhum tseg lawm.

⁶Thaus tug vaajntxwv kws kaav lub nroog Nineves nov dlheev txug tej lug ntawd, nwg txawm nqeg sau nwg lub zwmtxwv lug, hle nwg lub tsho ntev tseg, muab ntaub tsaaj lug npua hab moog nyob huv qhov tshauv.

⁷Nwg tshaajtawm rua tsoom pejxeem huv lub nroog Nineves has tas, “Ntawm nuav yog vaajntxwv hab nwg cov numtswv tej lug saamfwm rua suavdlawg, tsi pub leejtwg noj ib yaam dlaabtsi, tsi has txhua tug tuabneeg, txhua tug nyuj hab txhua tug yaaj huv tuabsi.

⁸Txhua tug tuabneeg hab txhua tug tsaj yuavtsum npua ntaub tsaaj. Txhua tug yuavtsum thov Vaajtswv kuas kawg sab kawg ntsws hab tso tej kev phem kev qas huv tuabsi tseg.

⁹Tej zag Vaajtswv yuav hloov sab, tej zag nwg yuav tsi chim rua peb, hab peb yuav tsi tuag.”

¹⁰Vaajtswv pum tej kws puab tau ua ntawd, nwg pum puab tso puab tej kev txhum tseg lawm tag. Yog le ntawd, Vaajtswv txhaj hloov sab hab tsi rau txim rua puab lawv le kws nwg tau has tseg.