Read Hmong Njua Yaunas 4 Bible Online

Yaunas 4 - Hmong Njua bible

Yaunas 4

¹Yaunas tsi txaus sab rua tej nuav hab nwg chim kawg le.

²Yog le ntawd Yaunas txhaj thov Vaajtswv has tas, “Tug TSWV, thaus kuv yuav sawv kev huv tsev tuaj, kuv puas tau has rua koj ua ntej tas, koj yeej yuav ua le nuav? Tub yog vim le nuav kuv txhaj nrhav kev tsiv moog rua tim tebchaws Xapees. Kuv paub koj yog tug Vaajtswv kws muaj kev hlub, sab ntev, sab dlawb sab zoo, npaaj rawv tog hloov sab hab tsi rau txim.

³Tug TSWV, taamsim nuav thov koj ca le rhu kuv txujsa moog, rua qhov yog kuv tuag yuav zoo dlua le kuv ua neej nyob.”

⁴Tug TSWV teb has tas, “Puas tsimnyog koj chim npaum le ko?”

⁵Yaunas tawm huv lub nroog moog rua saab nubtuaj hab nwg moog su rua tid. Nwg ua tau ib lub tsev pheebsuab rua nwg nraim ntxoo tog saib puas muaj xwm dlaabtsi tshwmsim rua lub nroog Nineves.

⁶Tug TSWV kws yog Vaajtswv ua ib tsob ntoo tuaj ua dluab ntxoov ntxoo rua Yaunas nraim tshaav, hab ua rua Yaunas zoo sab kawg le. Yaunas txaus sab heev rua tsob ntoo ntawd.

⁷Tabsis nub tom qaab thaus kaaj ntug txoog, Vaajtswv kuas ib tug kaab lug noj tsob ntoo ntawd, tsob ntoo ca le ntsws hab tuag lawm.

⁸Thaus lub nub tawm tuaj, Vaajtswv tso ib cov cua kub heev ntsawj saab nubtuaj tuaj, hab tshaav ntuj zab Yaunas taubhau ua rua nwg tsaug muas. Yog le ntawd Yaunas txhaj xaav has tas, kheev laam yog nwg tuag lawm. Nwg txhaj has tas, “Ca kuv tuag moog yuav zoo dlua le kuv ua neej nyob.”

⁹Tabsis Vaajtswv has rua Yaunas has tas, “Puas tsimnyog koj chim rua tsob ntoo nuav?” Yaunas teb has tas, “Yeej tsimnyog kuv chim kawg le, kuv chim tshuav tuag lawm xwb.”

¹⁰Tug TSWV has rua Yaunas has tas, “Ib mos xwb tsob ntoo nuav hlub tuaj, hab ib mos xwb tsob ntoo nuav tuag lawm; koj tub tsi tau siv dlaag siv zug cog tsob ntoo nuav hab koj tub tsi tau ua kuas nwg luj hlub tuaj, koj tub khauvxwm tsob ntoo nuav taag npaum.

¹¹Yog le ntawd kuv yimfuab khauvxwm lub nroog Nineves kws yog lub nroog luj ntawd. Dlua le ntawd tseem muaj tej mivnyuas yau kws tsi paub qaabhau dlaabtsi coob tshaaj ib puas neeg nkaum txheeb leej nyob huv lub nroog ntawd, hab tseem muaj tej tsaj txhu coob ua npoj ntwg nyob huv.”