Read Hmong Njua Teev Npe 1 Bible Online

Teev Npe 1 - Hmong Njua bible

Teev Npe 1

¹Tau ob xyoos tom qaab kws cov Yixalayees tsiv nraag tebchaws Iziv lug, thaus lub ob hlis ntuj nub xab ib, tug TSWV has rua Mauxes huv tug TSWV lub Tsevntaub sis ntsib nraag taj suabpuam Xinais has tas,

²“Aloos meb ca le sau cov Yixalayees npe lawv le tej cuab kwvtij hab tej tsev tuabneeg. Sau taagnrho txhua tug txivneej

³kws noobnyoog neeg nkaum xyoo rov sau kws ua taug tubrog lawm tej npe.

⁴Kuas ib cuab kwvtij twg tsaa ib tug lug ua tug thawj ntawm txhua xeem lug ua tug paab koj.”

⁵Ntawm nuav yog cov txivneej kws yog thawjcoj ntawm puab tej xeem kws raug xaiv ntawm tej paab tej pawg tuaj ua teg num nuav: [Xeem] — [Tug Thawjcoj Xeem] Lunpees yog Sede-us — tug tub Elixus Xime-oos yog Xulisadais — tug tub Selumiyees Yudas yog Aminadas — tug tub Nasoos Ixakhas yog Zuag — tug tub Nethanees Xenpuloos yog Heloos — tug tub Eli-as Efalayees yog Amihus — tug tub Elisamas Manaxes yog Pedaxes — tug tub Nkamaliyees Npeenyamees yog Nkide-aunis — tug tub Anpidaas Daas yog Amisadais — tug tub Ahi-exes Aseles yog Aukhalas — tug tub Pankiyees Khas yog Deyees — tug tub Eli-axas Nathalis yog Enas — tug tub Ahilas

¹⁷Mauxes hab Aloos coj kaum ob leeg txivneej nuav moog ua cov paab obtug,

¹⁸nub xab ib lub ob hlis ntuj, puab hu taagnrho txhua xeem hab txhua tsev tuabneeg tuaj txoos ua ke sau puab tej npe. Taagnrho cov tub hluas kws noobnyoog neeg nkaum xyoo rov sau puavleej muab sau npe hab suav tseg,

¹⁹lawv le tug TSWV tau saamfwm tseg. Yog le ntawd, Mauxes txhaj sau cov pejxeem npe nyob tom taj suabpuam Xinais.

²⁰Cov Lunpees caajceg kws yog Yakhauj tug tub hlub tsev tuabneeg, taagnrho cov txivneej kws noobnyoog neeg nkaum xyoo rov sau kws ua taug tubrog, sau npe lawv le puab caajceg.

²¹Xeem Lunpees, suav tau plaub caug rau txheeb tsib puas leej.

²²Xeem Xime-oos, taagnrho cov txivneej kws noobnyoog neeg nkaum xyoo rov sau kws ua taug tubrog, sau npe lawv le puab caajceg.

²³Xeem Xime-oos, suav tau tsib caug cuaj txheeb peb puas leej.

²⁴Cov Khas, taagnrho cov txivneej kws noobnyoog neeg nkaum xyoo rov sau kws ua taug tubrog, sau npe lawv le puab caajceg.

²⁵Xeem Khas, suav tau plaub caug tsib txheeb rau pua tsib caug leej.

²⁶Cov Yudas, taagnrho cov txivneej kws noobnyoog neeg nkaum xyoo rov sau kws ua taug tubrog, sau npe lawv le puab caajceg.

²⁷Xeem Yudas, suav tau xyaa caum plaub txheeb rau pua leej.

²⁸Cov Ixakhas, taagnrho cov txivneej kws noobnyoog neeg nkaum xyoo rov sau kws ua taug tubrog, sau npe lawv le puab caajceg.

²⁹Xeem Ixakhas, suav tau tsib caug plaub txheeb plaub puas leej.

³⁰Cov Xenpuloos, taagnrho cov txivneej kws noobnyoog neeg nkaum xyoo rov sau kws ua taug tubrog, sau npe lawv le puab caajceg.

³¹Xeem Xenpuloos, suav tau tsib caug xyaa txheeb plaub puas leej.

³²Cov Yauxej, taagnrho cov txivneej kws noobnyoog neeg nkaum xyoo rov sau kws ua taug tubrog, sau npe lawv le puab caajceg.

³³Xeem Efalayees, suav tau plaub caug txheeb tsib puas leej.

³⁴Cov Manaxes, taagnrho cov txivneej kws noobnyoog neeg nkaum xyoo rov sau kws ua taug tubrog, sau npe lawv le puab caajceg.

³⁵Xeem Manaxes, suav tau peb caug ob txheeb ob puas leej.

³⁶Cov Npeenyamees, taagnrho cov txivneej kws noobnyoog neeg nkaum xyoo rov sau kws ua taug tubrog, sau npe lawv le puab caajceg.

³⁷Xeem Npeenyamees, suav tau peb caug tsib txheeb plaub puas leej.

³⁸Cov Daas, taagnrho cov txivneej kws noobnyoog neeg nkaum xyoo rov sau kws ua taug tubrog, sau npe lawv le puab caajceg.

³⁹Cov Daas, suav tau rau caum ob txheeb xyaa pua leej.

⁴⁰Cov Aseles, taagnrho cov txivneej kws noobnyoog neeg nkaum xyoo rov sau kws ua taug tubrog, sau npe lawv le puab caajceg.

⁴¹Xeem Aseles, suav tau plaub caug ib txheeb tsib puas leej.

⁴²Cov Nathalis, taagnrho cov txivneej kws noobnyoog neeg nkaum xyoo rov sau kws ua taug tubrog, sau npe lawv le puab caajceg.

⁴³Xeem Nathalis, suav tau tsib caug peb txheeb plaub puas leej.

⁴⁴Taagnrho cov txivneej nuav puavleej yog cov kws Mauxes, Aloos hab cov Yixalayees kaum ob tug thawjcoj paab obtug suav, puab nyag ua tug sawv cev ntawm nyag xeem.

⁴⁵Cov Yixalayees kws noobnyoog neeg nkaum xyoo lossis laug dlua ntawd kws ua taug tubrog puavleej tuaj sau npe lawv le nwg caajceg.

⁴⁶Puab suav taagnrho tau rau pua peb txheeb tsib puas tsib caug leej.

⁴⁷Tsi tau suav cov Levis npe nrug kaum ob xeem nuav,

⁴⁸rua qhov tug TSWV has rua Mauxes has tas,

⁴⁹“Thaus koj sau cov txivneej kws ua taug tubrog npe, koj tsi xob suav cov Levis npe rua huv.

⁵⁰Tabsis koj tsaa cov Levis ua cov kwv lub Tsevntaub kws yog qhov chaw kws nrug kuv sis ntsib hab tej khoom kws nyob huv, puab yog cov tsaa lub tsevntaub, hab tsaa puab tej tsev nyob ncig lub tsevntaub ntawd.

⁵¹Yog thaus twg mej tshais chaw tawm huv mej lub yeej moog, cov Levis yog cov kws muab lub Tsevntaub txu hab thaus mej moog nyob dlua lub yeej tshab, cov Levis yog cov kws tsaa lub tsevntaub ntawd. Lwm tug kws txaav lug ze lub Tsevntaub yuav raug tua tuag.

⁵²Dlua le cov Yixalayees yuavtsum tsaa puab tej tsevntaub lawv le puab tej paab ntawd, txhua tug txivneej yuavtsum nyob huv nwg lub yeej hab huv qaab puab tug chij.

⁵³Tabsis cov Levis yuavtsum tsaa puab tej tsevntaub nyob ncig lub Tsevntaub sis ntsib hab ua cov zuv lub tsevntaub sis ntsib, kuas tsi xob muaj leejtwg tuaj ze rua ntawm lub Tsevntaub hab ua rua kuv chim rua cov Yixalayees.”

⁵⁴Yog le ntawd, cov Yixalayees txhaj ua txhua yaam lawv le tug TSWV tau saamfwm rua Mauxes lawm.