Read Hmong Njua Teev Npe 10 Bible Online

Teev Npe 10 - Hmong Njua bible

Teev Npe 10

¹Tug TSWV has rua Mauxes has tas,

²“Muab nyaj ntaus ua ob lub xyu tau tshuab hu cov tuabneeg tuaj txoos ua ke hab kuas suavdlawg lauj lub yeej.

³Yog thaus twg tshuab ob lub suab xyu nrov ntev ntev, ces yog hu taagnrho cov pejxeem sis sau tuaj cuag koj rua ntawm tug TSWV lub Tsevntaub sis ntsib lub qhovrooj.

⁴Tabsis yog thaus twg nov tshuab ib lub suab xyu nrov ntev ntev, ces yog hu txhua xeem cov thawjcoj tuaj cuag koj.

⁵Thaus twg tshuab lub suab xyu nrov tuab tuab lu, ces yog txhib xeem kws nyob saab nubtuaj kuas ca le sawv kev tawm moog ua ntej.

⁶Thaus rov tshuab dlua zag ob, ces yog txhib kuas xeem kws nyob saab qaabteb sawv kev tawm moog. Yog tshuab lub suab kws tsi nrov ntev, ces yog tshuab txhib kuas suavdlawg lauj lub yeej,

⁷tabsis yog tshuab hu kuas cov pejxeem tuaj txoos ua ke, yuavtsum tshuab lub suab nrov ntev ntev.

⁸Cov kws tshuab xyu yuavtsum ca rua cov povthawj kws yog Aloos cov tub ua cov tshuab xwb. “Ntawm nuav yog txuj kaab ke tswjfwm kws yuavtsum coj moog ibtxhis tsi kawg.

⁹Thaus muaj kev tsuv kev rog huv mej lub tebchaws kws yog muaj yeebncuab tuaj tua mej, mej yuavtsum tshuab xyu kws yog lub suab sis tua. Kuv yog tug TSWV kws yog mej tug Vaajtswv, kuv yuav paab mej hab cawm kuas mej dlim ntawm mej cov yeebncuab.

¹⁰Nub kws mej muaj kev zoo sab kws yog ua kevcai Hli Xab hab ua lwm yaam kevcai kws mej teem tseg, mej ca le tshuab ob lub xyu thaus mej taabtom hlawv tej khoom fij hab fij mej tej khoom ua kev sis raug zoo. Ces kuv yuav paab mej, kuv yog tug TSWV kws yog mej tug Vaajtswv.”

¹¹Lub ob hlis nub neeg nkaum, xyoo ob kws txwm nkaus rua thaus cov Yixalayees tsiv nraag tebchaws Iziv lug, ces tauv fuab kws roog rawv sau tug TSWV lub Tsevntaub sis ntsib txawm tshem,

¹²hab cov Yixalayees pib sawv kev tawm nraag taj suabpuam Xinais lug. Ces tauv fuab lug nreg rua ntawm lub taj mojsaab qhua Palaas.

¹³Puab pib sawv kev tawm moog thawj zag lawv le tug TSWV tau saamfwm rua Mauxes,

¹⁴hab txhua zag kws puab tshais chaw, yuavtsum ca xeem Yudas moog ua ntej; puab moog ib paab quas ib paab kws yog Aminadas tug tub Nasoos ua tug thawjcoj.

¹⁵Zuag tug tub Nethanees ua tug coj xeem Ixakhas,

¹⁶hab Heloos tug tub Eli-as ua tug coj xeem Xenpuloos.

¹⁷Ces maam muab lub Tsevntaub sis ntsib txu rua cov Nkesoos hab Melalis kwv sawv kev tawm moog.

¹⁸Txuas ntawd moog yog cov kws nyob huv qaab xeem Lunpees tug chij sawv kev tawm moog, puab moog ib paab quas ib paab kws yog Sede-us tug tub Elixus ua tug thawjcoj.

¹⁹Xulisadais tug tub Selumiyees ua tug coj xeem Xime-oos,

²⁰hab Deyees tug tub Eli-axas ua tug coj xeem Khas.

²¹Ces xeem Levis kws yog cuab Kauhas maam kwv tej khoom dlawbhuv sawv kev tawm moog. Thaus kws puab moog txug rua ntawm lub yeej tshab lawm, puab yuavtsum rov tsaa lub Tsevntaub sis ntsib dlua.

²²Paab kws sawv kev tuaj tom qaab yog cov kws nyob huv xeem Efalayees tug qaab chij, puab moog ib paab quas ib paab kws yog Anpihus tug tub Elisamas ua tug thawjcoj.

²³Pedaxes tug tub Nkamaliyees ua tug coj xeem Manaxes,

²⁴hab Nkide-aunis tug tub Anpidaas ua tug coj xeem Npeenyamees.

²⁵Thaus kawg yog paab kws nyob huv xeem Daas tug qaab chij sawv kev tawm moog ua cov thaiv tom qaab txhua xeem huv tuabsi, puab moog ib paab quas ib paab kws yog Amisadais tug tub Ahi-exes ua tug thawjcoj.

²⁶Aunkilas tug tub Pankiyees ua tug coj xeem Aseles,

²⁷hab Enas tug tub Ahilas ua tug coj xeem Nathalis.

²⁸Ntawm nuav yog has txug zaaj kws cov Yixalayees lauj lub Tsevntaub sis ntsib hab rov tsaa dlua, hab puab sawv kev ib paab quas ib paab tawm moog.

²⁹Mauxes has rua nwg quaspuj tug nug Haunpas kws yog Yethoos tug tub kws yog tuabneeg Midias has tas, “Taamsim nuav peb taabtom sawv kev moog rua thaaj chaw kws tug TSWV tau coglug yuav muab pub rua peb. Nwg tau coglug tseg lawm yuav pub kuas cov Yixalayees muaj kev vaammeej, koj ca le nrug peb moog, hab peb yuav ca koj nrug peb nyob huv peb lub tebchaws.”

³⁰Haunpas teb has tas, “Kuv tsi moog, kuv yuav rov qaab moog nrug kuv tsaav tuabneeg nyob huv kuv lub tebchaws.”

³¹Mauxes has rua Haunpas has tas, “Thov koj tsi xob tso peb tseg, koj tub paub tej chaw kws peb tsuam yeej nyob huv taj suabpuam Xinais nuav, hab koj tub yog tug qha peb ntaag.

³²Yog koj nrug peb moog, peb yuav muab tej kws tug TSWV pub rua peb pub rua koj hab.”

³³Thaus puab taug kev tau peb nub tom Xinais kws yog lub roob dlawbhuv lug cov kws kwv lub Phijxaab kws ntim Vaajtswv tej lug cog tseg moog ua puab ntej hab nrhav chaw rua puab tsuam yeej su.

³⁴Txhua zag kws puab tshais chaw, tug TSWV tauv fuab yeej roog rawv puab taag nub.

³⁵Yog thaus twg cov tuabneeg kws kwv lub Phijxaab kws ntim Vaajtswv tej lug cog tseg sawv kev moog, Mauxes has tas, “Tug TSWV, koj ca le sawv; thov ua kuas koj cov yeebncuab tawg ri sua moog hab muab cov tuabneeg kws ntxub koj ntab tsiv tawm moog!”

³⁶Hab yog thaus twg cov tuabneeg kws kwv lub phijxaab nreg lawm, Mauxes yuavtsum has tas, “Tug TSWV, thov koj tig lug cuag tsaav tuabneeg Yixalayees kws coob heev suav tsi txheeb nuav dlua.”