Read Hmong Njua Teev Npe 11 Bible Online

Teev Npe 11 - Hmong Njua bible

Teev Npe 11

¹Nwgnuav cov pejxeem ywg puab tej kev txomnyem rua tug TSWV. Thaus tug TSWV nov puab tej lug ywg, nwg chim rua puab heev nwg txhaj tso suavtawg lug hlawv puab, hab puab tej tsev kub nyab taag ib tog yeej.

²Cov pejxeem txhaj quaj moog thov Mauxes paab; Mauxes txhaj thov tug TSWV ces suavtawg txawm tuag taag lawm.

³Yog le ntawd, txhaj muab qhov chaw ntawd tis npe hu ua Tanpelas, rua qhov tug TSWV tso suavtawg lug kub puab.

⁴Muaj cov tuabneeg txawv tebchaws nrug cov Yixalayees taug kev lug. Puab tshaib hab nqhes nqaj heev, cov Yixalayees txawm ywg has tas, “Kheev laam yog peb muaj nqaj noj xwb lauj!

⁵Thaus peb nyob nraag tebchaws Iziv peb xaav muab taagnrho tej ntseg huv dlej lug ua zaub noj los yeej tau, peb yeej tsi tau them nyaj le. Peb puas ncu qaab has tas, tej dlib ntsuab, dlib lab, tej dlog raaj, dlog ntug hauvpaug hab tej qej, peb puavleej muaj huv tuabsi?

⁶Tabsis nwgnuav peb tsi muaj zug le lawm, rua qhov peb tsi muaj ib lub mov noj, tsuas yog naj nub noj cov manas nuav xwb!”

⁷(Manas zoo le cov noob zaub txhwb kws dlaaj lig.

⁸Mo ntuj thaus ntsu lwg lawv tej ntug yeej, manas txawm poob sau ntuj lug khov rua ntawm cov lwg ntawd, hab thaus kaaj ntug suavdlawg moog khaws coj lug zum lossis tuav ua moov, puab muab cub kuas sav maam le muab puab ua ncuav. Cov manas ntawd qaab ib yaam le tej moov nplej pleev roj txiv ntoo kws luas cub ua mov noj ntaag.)

¹⁰Mauxes pum cov pejxeem tawm tuaj sawv ua tej paab tej pawg ywg zum zawg ntawm puab tej qhovrooj tsevntaub. Nwg nyuaj sab kawg le, rua qhov tug TSWV chim heev rua puab,

¹¹hab nwg has rua tug TSWV has tas, “Vim le caag koj txhaj ua nruj ua tsiv rua kuv? Vim le caag koj tsi txaus sab rua kuv? Vim le caag koj txhaj tsaa kuv ua tug saib cov tuabneeg nuav?

¹²Kuv tsi yog tug kws tsim puab lossis tso puab lug yug ua tuabneeg los sav! Vim le caag koj txhaj kuas kuv tu puab hab muab puab puag rua huv xubndlag ib yaam le puab tseem yog mivnyuas mog, hab kuas kuv coj puab moog kuas txug lub tebchaws kws koj tau coglug tseg rua puab cov yawmkoob lawm?

¹³Kuv yuav moog nrhav nqaj qhov twg txhaj yuav txaus cov tuabneeg nuav noj? Puab pheej kuas kuv muab nqaj rua puab noj.

¹⁴Cov tuabneeg nuav ua lub nraa nyaav heev rua kuv, kuv nreg tsi taug puab lawm.

¹⁵Yog koj pheej yuav sim kuv le nuav, thov koj ca le muab kuv tua povtseg taamsim nuav, kuas kuv txhaj tsi tau tiv koj tej kev nruj tsiv nuav ntxiv lawm.”

¹⁶Tug TSWV has rua Mauxes has tas, “Hu cov Yixalayees xyaa caum leej txivneej tuaj cuag kuv, puab yog cov kws koj yeej paub has tas yuav ua taug thawjcoj coj cov pejxeem hab ibtxwm tswjfwm puab. Kuas puab tuaj rua ntawm kuv lub Tsevntaub sis ntsib, hab has kuas puab nrug koj sawv rua ntawd.

¹⁷Kuv yuav lug nrug koj thaam, hab kuv yuav muab tug ntsujplig kws kuv muab rua koj faib rua puab. Ces puab txhaj paab tau koj ua num rua cov tuabneeg nuav, hab tsi xob ca koj ib leeg ua xwb.

¹⁸Koj ca le qha rua cov pejxeem has tas, ‘Ua kevcai ntxuav kuas mej huv npaaj rua pigkig; mej txhaj yuav tau nqaj noj. Tug TSWV nov mej tej suab ywg has tas xaav tau nqaj noj hab thaus mej nyob nraag tebchaws Iziv mej yeej tau zoo dlua le lug nyob ntawm nuav. Nwgnuav tug TSWV yuav muab nqaj rua mej, hab mej yuav tau nqaj noj.

¹⁹Mej yuav muaj nqaj noj tsi yog muaj noj ib ob nub lossis tsib rau nub lossis kaum nub lossis neeg nkaum nub xwb,

²⁰tabsis mej yuav muaj noj tsheej hli, moog txug thaus kws nqaj tawm huv mej qhovntswg lug, hab moog txug thaus kws mej dlhuav tej nqaj ntawd. Tej nuav yuav tshwmsim tuaj, rua qhov mej tso tug TSWV kws nrug mej nyob tseg hab tau quaj rua nwg has tas, Vim le caag peb txhaj tawm nraag tebchaws Iziv lug?’ ”

²¹Mauxes has rua tug TSWV has tas, “Cov tuabneeg kws kuv coj lug nuav muaj rau pua txheeb leej, koj has tas yuav muab nqaj rua puab noj kuas txaus tsheej hli nua los?

²²Muab nyuj hab muab yaaj qhov twg lug tua txhaj txaus puab noj? Muab taagnrho cov ntseg huv havtxwv lug tua sov puas txaus puab noj?”

²³Tug TSWV teb has tas, “Puas muaj nrim rua kuv lub fwjchim? Zag nuav koj yuav pum has tas, tej lug kws kuv has nuav saib muaj tseeb lossis tsi tseeb.”

²⁴Mauxes txhaj tawm moog qha rua cov pejxeem Yixalayees lawv le tug TSWV has. Nwg hu tau xyaa caum leej txivneej tuaj hab coj puab moog sawv ncig lub Tsevntaub.

²⁵Tug TSWV lug rua huv tauv fuab hab has lug huv tauv fuab tuaj rua Mauxes. Nwg txhaj muab tug ntsujplig kws nwg pub rua Mauxes faib rua xyaa caum tug thawjcoj ntawd. Thaus tug ntsujplig ntawd lub fwjchim nkaag rua puab lawm, puab txawm qw ib yaam le tug cev Vaajtswv lug, tabsis tsi ntev pistsawg.

²⁶Xyaa caum leej thawjcoj ntawd, muaj ob tug kws npe hu ua Edas hab Medas, obtug nyob huv yeej xwb, tsi tau moog rua tom lub Tsevntaub. Obtug nyob huv yeej xwb los tug ntsujplig lub fwjchim lug rua sau obtug, hab obtug txawm pib qw ib yaam le cov cev Vaajtswv lug.

²⁷Muaj ib tug tub hluas txhaj moog pav tej kws Edas hab Medas ua ntawd rua Mauxes noog.

²⁸Noos tug tub Yausuas kws ibtxwm ua tug paab Mauxes thaus tseem yog tub hluas lug, txhaj has rua Mauxes has tas, “Tug tswv, koj ca le moog cheem kuas obtug tsum!”

²⁹Mauxes teb has tas, “Koj nim paab kuv mob sab hab los? Kuv yeej xaav kuas tug TSWV pub nwg tug ntsujplig rua nwg tsaav tuabneeg txhua tug huv tuabsi, kuas puab has tau le cov cev Vaajtswv lug has ntaag!”

³⁰Ces Mauxes hab cov Yixalayees xyaa caum leej thawjcoj txawm rov moog rua huv tsev lawm.

³¹Taamsim ntawd tug TSWV txawm tso cua ntsawj noog ncuab yaa ua npoj ntwg nraag havtxwv sab le ob tshim sau npoo aav lug. Cov ncuab ntawd yaa lug tsaws ua npoj ntwg rua ntawm ntug yeej, hab nyob ua npoj ntwg puagncig lub yeej moog tsheej nub ke.

³²Cov pejxeem suavdlawg tawm moog nteg ncuab, nub ntawd ib nub, mo ntawd ib mos hab nub tom qaab ib nub; tsi muaj ib tug kws nteg tau tsawg tshaaj tsib caug tawb. Ces puab nqaa lug tseev hab coj moog zab lawv ntug yeej ca ua nqaj qhua.

³³Thaus puab tseem muaj nqaj noj ua npuav ua npo, tug TSWV chim rua cov pejxeem heev, nwg txhaj tso kaab mob kis lug rua puab.

³⁴Puab txhaj tis npe rua qhov chaw ntawd hu ua Kinpalus Hata-avas (lossis “Cov tuabneeg tshaib nqhes tej ntxaa”), rua qhov puab log cov tuabneeg nqhes nqaj tuag rua thaaj chaw ntawd.

³⁵Cov pejxeem suavdlawg txhaj tsiv ntawm Kinpalus Hata-avas moog rua ntawm Haxelaus hab puab moog tsuam yeej nyob rua ntawd.