Read Hmong Njua Teev Npe 14 Bible Online

Teev Npe 14 - Hmong Njua bible

Teev Npe 14

¹Mo ntawd cov pejxeem suavdlawg tsaa suab hlo quaj nrov heev ib mos kaaj ntug plawg.

²Taagnrho cov Yixalayees tuaj ywg Mauxes hab Aloos has tas, “Zoo dlua ca peb tuag nraag tebchaws Iziv lossis tuag ntawm taj mojsaab qhua nuav!

³Vim le caag tug TSWV txhaj coj peb moog rua huv lub tebchaws ntawd? Peb yuav moog raug luas tua rua huv tshaav rog, hab luas yuav nteg peb tej quaspuj mivnyuas moog. Kuj zoo dlua ca peb rov qaab moog nraag tebchaws Iziv!”

⁴Vim le nuav puab txhaj sis thaam has tas, “Peb ca le xaiv ib tug ua thawj, coj peb rov qaab moog nyob nraag tebchaws Iziv.”

⁵Ces Mauxes hab Aloos ca le txhus caug ndlua nyo ti nkaus rua huv aav taabmeeg cov pejxeem suavdlawg.

⁶Noos tug tub Yausuas hab Yefunes tug tub Kalej yog ob tug kws nrug puab moog soj lub tebchaws. Obtug nyuaj sab heev, obtug txhaj dlua rhe obtug ob lub tsho,

⁷hab has rua cov pejxeem has tas, “Lub tebchaws kws peb moog soj lug yog ib lub kws zoo kawg nkaus le.

⁸Yog tug TSWV txaus sab rua peb, nwg yeej yuav coj peb moog nyob huv lub tebchaws ntawd, hab nwg yuav muab lub tebchaws kws aav rog hab zoo qoob pub rua peb.

⁹Tsi xob ntxeev sab rua tug TSWV, hab tsi xob ntshai cov tuabneeg kws nyob tid. Peb yuav tua yeej puab yoojyim kawg le. Tug TSWV tuaj peb tog hab ua rua tej vaajtswv kws tsomkwm puab swb lawm; mas tsi xob ntshai hlo le.”

¹⁰Cov pejxeem tuavhuv yuav muab pobzeb ntaus kuas obtug tuag, tabsis taamsim ntawd tug TSWV tug tshwjchim txawm ci ntsaa ab tshwm plawg sau tug TSWV lub Tsevntaub sis ntsib tuaj rua cov Yixalayees pum.

¹¹Tug TSWV has rua Mauxes has tas, “Cov tuabneeg nuav tseem yuav tso kuv tseg ntev npaum le caag hab? Kuv tub ua tej txujci tseemceeb ntau yaam rua puab pum lawm. Puab tseem yuav tsi ca sab rua kuv moog txug thaus twg?

¹²Kuv yuav tso kaab mob phem lug rua puab kuas puab puamtsuaj taag, tabsis kuv yuav tsaa koj hab koj cov xeebntxwv ua tsaav tuabneeg kws fuamvaam coob hab muaj zug tshaaj puab.”

¹³Tabsis Mauxes has rua tug TSWV has tas, “Tug TSWV, tub yog koj lub fwjchim coj cov tuabneeg nuav tawm nraag tebchaws Iziv lug ntaag. Thaus cov tuabneeg Iziv nov tej kws koj ua rua koj tsaav tuabneeg,

¹⁴puab yuav pav tej ntawd rua cov tuabneeg kws nyob puagncig cheebtsaam nuav noog. Tej tuabneeg yeej nov ntsoov has tas, koj kws yog tug TSWV nrug nraim peb nyob, thaus koj tauv fuab nreg ncaaj sau peb, peb pum koj tim ntsej tim muag, hab koj yog tug coj peb kev, nruab nub koj nyob huv tauv fuab, mo ntuj koj nyob huv tug nplaim tawg.

¹⁵Nwgnuav yog koj tua taagnrho koj tsaav tuabneeg povtseg, tej tebchaws kws nov koj lub koob meej yuav thuam has tas,

¹⁶‘Koj muab koj tsaav tuabneeg tua tuag taag rua ntawm taj mojsaab qhua nuav tub yog vim koj tsi muaj peevxwm coj tau puab moog txug huv lub tebchaws kws koj coglug tseg yuav muab rua puab nyob.’

¹⁷Yog le ntawd tug TSWV, nwgnuav thov koj qha koj lub fwjchim rua peb hab ua lawv le thaus koj tau coglug tseg has tas,

¹⁸‘Kuv yog tug TSWV tug kws tsi chim sai, kuv muaj txujkev hlub luj kawg nkaus hab zaam txim rua tug kws ua txhum hab ntxeev sab rua kuv. Tabsis kuv yuav rau txim rua puab tej xeebntxwv moog txug peb plaub tam tuabneeg, vim puab nam puab txiv tej kev txhum.’

¹⁹Nwgnuav tug TSWV, lawv le koj txujkev hlub luj kawg nkaus kws tsi hloov le, kuv thov koj zaam txim rua cov tuabneeg nuav, ib yaam le koj ibtxwm zaam txim rua puab txij thaus koj coj puab tawm nraag tebchaws Iziv lug txug naj nub nua.”

²⁰Tug TSWV teb has tas, “Kuv yuav zaam txim rua puab lawv le koj tej lug thov.

²¹Kuv yog tug kws muaj sa nyob, hab kuv lub fwjchim tseem tswj lub nplajteb nuav, yog le ntawd kuv txhaj coglug rua koj has tas,

²²kuv tsi pub cov tuabneeg nuav ib tug twg moog nyob huv lub tebchaws ntawd le. Puab puavleej pum kuv tug tshwjchim kws ci ntsaa ab hab tej txujci kws kuv ua nraag tebchaws Iziv hab tom taj mojsaab qhua lawm, tabsis puab sim kuv sab txug kaum zag saib kuv puas ua sab ntev, hab puab tseem tsi kaam noog kuv lug qeeg hab.

²³Puab yuav tsi tau moog pum lub tebchaws kws kuv tau coglug rua puab cov yawmkoob lawm. Cov tuabneeg kws ntxeev sab rua kuv tsi muaj ib tug yuav tau moog nyob huv lub tebchaws ntawd le.

²⁴Tabsis, vim kuv tug tubkhai Kalej tsi xaav le lwm tug hab nwg muab lub sab npuab kuv heev, kuv yuav coj nwg moog nyob huv lub tebchaws kws nwg moog soj ntawd, hab nwg cov xeebntxwv yuav tau lub tebchaws ntawd ua puab tug,

²⁵yog tej haav kws taamsim nuav cov Amalej hab cov Kana-aas nyob ntaag. Pigkig ca le tig rov qaab hab sawv kev moog rua tom taj mojsaab qhua taug txujkev kws moog rua tom Havtxwv Akanpas.”

²⁶Tug TSWV has rua Mauxes hab Aloos has tas,

²⁷“Cov tuabneeg sab phem nuav, puab tseem yuav ywg kuv moog txug thaus twg hab? Kuv dlhuav cov tuabneeg nuav tej lug ywg heev lawm!

²⁸Nwgnuav meb ca le muab cov lug nuav teb rua puab has tas: ‘Kuv coglug has tas, kuv yog tug kws muaj sa nyob, kuv yuav ua rua mej ib yaam le mej tau ywg ntawd. Kuv yog tug TSWV kws has tej lug nuav.

²⁹Mej yuav tuag pawg lug rua huv lub taj mojsaab qhua nuav. Vim mej tau ywg kuv heev, mas cov kws noobnyoog neeg nkaum xyoo rov sau yuav tsi muaj ib tug tau moog nyob huv lub tebchaws ntawd le.

³⁰Txawm yog kuv tub coglug tseg lawm has tas, kuv yuav coj mej moog nyob huv lub tebchaws ntawd los kuv yuav tsi pub mej ib tug twg moog nyob le, kuv tsuas pub Kalej hab Yausuas obtug moog nyob xwb.

³¹Mej pheej has tas nyob tsaam luas nteg mej tej mivnyuas, tabsis kuv yuav coj puab moog rua huv lub tebchaws kws mej tsi kaam moog hab lub tebchaws ntawd yuav yog puab tej vaaj tse nyob.

³²Mej yuav tuag taag rua huv lub taj mojsaab qhua nuav.

³³Mej tej mivnyuas yuav ncig moog ncig lug tiv kev txomnyem plaub caug xyoo rua ntawm taj suabpuam nuav moog txug nub kws mej tuag taag, vim mej tsi muab sab npuab kuv.

³⁴Mej yuav tau ris mej lub txim tiv kev txomnyem plaub caug xyoo, ib xyoos twg yog ib nub ntawm plaub caug nub kws mej moog soj lub tebchaws. Mej txhaj yuav paub has tas txujkev txomnyem kws kuv ca mej raug zoo le caag tag.

³⁵Kuv qha tseeb rua mej has tas, kuv yuav ua le nuav rua mej cov kws yog tuabneeg sab phem kws pheej sis sau tsheej paab tuaj tawmtsaam kuv. Ntawm nuav lauj yog lub taj suabpuam kws mej yuav tuag taag rua huv. Kuv yog tug TSWV kws has tej lug nuav.’ ”

³⁶Tub yog cov tuabneeg kws Mauxes tau tso moog soj lub tebchaws ntawd, coj tej lug dlaag lug pav qha rua cov Yixalayees, puab txhaj ywg tug TSWV.

³⁷Cov tuabneeg nuav tau ris lub txim kws puab dlaag ntawd, tug TSWV txhaj tso tej kaab mob kws phem heev lug rua puab, puab txhaj tuag taag lawm.

³⁸Kaum ob tug txivneej kws moog soj lub tebchaws ntawd, tsuas tshuav Yausuas hab Kalej txhaj tsi tuag xwb, dlua le cov puavleej tuag taag huv tuabsi lawm.

³⁹Thaus Mauxes qha tej lug kws tug TSWV has nuav rua cov Yixalayees taag lawm, puab nyuaj sab hab tu sab kawg le.

⁴⁰Taagkig sawv ntxuv cov Yixalayees txawm pib moog txeeb sau tej ncov roob, mas puab has tas, “Nwgnuav peb txaus sab yuav moog nyob qhov chaw kws tug TSWV qha peb. Peb leeg tej kev txhum kws peb tau ua.”

⁴¹Tabsis Mauxes has tas, “Vim le caag mej txhaj tsi noog tug TSWV lug? Mej yuav moog tua tsi yeej ib zag le!

⁴²Mej tsi xob moog. Tug TSWV tub tsi nrug mej nyob lawm, mej cov yeebncuab yuav tua yeej mej.

⁴³Thaus mej moog ntsib cov Amalej hab cov Kana-aas, mej yuav raug tua tuag taag rua huv tshaav rog; vim mej tau tig rov qaab tsi kaam nrug tug TSWV, nwg txhaj tsi nrug mej nyob lawm.”

⁴⁴Txawm yog Mauxes hab cov tuabneeg kws kwv lub Phijxaab kws ntim Vaajtswv tej lug cog tseg, tsi tawm huv yeej moog los puab ca le nce moog rua peg tej roob le lawm.

⁴⁵Cov Amalej hab cov Kana-aas kws nyob peg txhaj tua yeej puab, hab lawv puab dleb heev moog txug ndlua nraag lub nroog Haulamas.