Read Hmong Njua Teev Npe 15 Bible Online

Teev Npe 15 - Hmong Njua bible

Teev Npe 15

¹Tug TSWV has rua Mauxes has tas,

²“Koj qha tej kevcai nuav rua cov Yixalayees, thaus mej moog txug huv lub tebchaws kws kuv muab pub rua mej lawm,

³mej caab ib tug txiv nyuj, ib tug laug yaaj, ib tug thaav yaaj lossis ib tug laug tshis moog tua hlawv fij rua tug TSWV, fij theej txhoj lossis fij lawv le mej tau coglug lawm lossis fij ntawm lub sab dlawb paug lossis fij ua rooj noj rooj haus lawv le teem tseg; tej paa khoom fij ntawd yuav tsw qaab ntxag txaus tug TSWV sab.

⁴Yog leejtwg coj tsaj moog fij rua tug TSWV, nwg yuavtsum nqaa ob choj moov nplej kws ntse xyaw ob khob roj txiv ntoo, hab ob khob cawv txiv maab, coj moog ua khoom fij rua tug TSWV.

⁶Thaus muab tug laug yaaj fij, mas yuavtsum muab plaub choj moov nplej kws ntse xyaw peb khob roj txiv ntoo coj moog fij,

⁷hab muab peb khob cawv txiv maab moog fij nrug tej paa khoom fij nuav yuav tsw qaab ntxag txaus tug TSWV sab.

⁸Thaus muab tug txiv nyuj tua hlawv fij rua tug TSWV lossis fij lawv le mej tau coglug tseg lossis fij ua kev sis raug zoo,

⁹yuavtsum muab rau choj moov nplej ntse xyaw plaub khob roj txiv ntoo,

¹⁰hab muab plaub khob cawv txiv maab coj moog fij nrug. Tej paa khoom fij nuav yuav tsw qaab ntxag txaus tug TSWV sab.

¹¹“Yuavtsum muab le ntawd moog fij nrug txhua tug txiv nyuj, txhua tug laug yaaj lossis txhua tug laug tshis.

¹²Thaus kws mej coj tsaj moog fij tshaaj ib tug rov sau lawm, yuavtsum ntxiv tej khoom kws fij nrug ntawd kuas ntau sis npaug zog lawv le tej feem ntawd.

¹³Txhua xeem Yixalayees yuavtsum ua le nuav thaus nwg coj khoom moog fij, kuas tej paa tsw qaab ntxag txaus tug TSWV sab.

¹⁴Hab cov tuabneeg txawv tebchaws kws nrug mej nyob, tsi has nyob ib ntus xwb lossis nyob moog le, txhua zag kws coj tej khoom moog fij kuas tsw qaab ntxag rua tug TSWV, nwg yuavtsum ua kuas lawv le txuj kevcai kws mej ua.

¹⁵Tsuas muaj tuab txuj kaab ke nuav rua mej hab rua cov tuabneeg txawv tebchaws kws nrug mej nyob ntawd coj moog ibtxhis le xwb. Mej ua le caag kuas puab ua le ntawd pub rua tug TSWV;

¹⁶muab tuab txuj kevcai hab kev tswjfwm rua mej hab puab ib yaam nkaus.”

¹⁷Tug TSWV has rua Mauxes has tas,

¹⁸“Koj muab tej kevcai nuav qha rua cov Yixalayees coj thaus puab moog nyob huv lub tebchaws kws kuv muab rua puab.

¹⁹Thaus puab ua tau tej qoobloo lug noj, puab yuavtsum muab ibtxha fij rua tug TSWV.

²⁰Thaus mej sau tau nplej tshab, mej muab thawj cov moov nplej lug puab ua thawj lub ncuav fij tshwjxeeb rua tug TSWV. Qhov nuav mej coj moog fij tshwjxeeb ib yaam le tej nplej tshab kws mej nyavnyuas muab tau lug.

²¹Mej yuavtsum muab tej ncuav kws mej cub sav lawm moog fij rua tug TSWV, hab fij le nuav moog ibtxhis.”

²²“Tabsis yog mej yuam kev ua txhum tej kevcai kws tug TSWV muab cob rua Mauxes,

²³yog tej kevcai tswjfwm mej ib tam dlhau ib tam, txij nub kws tug TSWV muab cob rua Mauxes kuas qha rua mej,

²⁴yog qhov txhum ntawd tsi yog txhobtxwm ua, vim tsi paub xwb, ces cov pejxeem yuavtsum caab ib tug txiv nyuj moog tua hlawv fij nrug cov moov nplej hab cawv txiv maab, kuas tej paa tsw qaab ntxag txaus tug TSWV sab, hab caab ib tug laug tshis moog tua fij theej txhoj.

²⁵Tug povthawj yuavtsum ua kevcai ntxuav rua cov pejxeem suavdlawg, tug TSWV txhaj yuav zaam puab lub txim, vim tsi yog puab txhobtxwm ua, hab puab nqaa puab tej khoom fij dlaws txim moog ua zaub mov fij rua tug TSWV.

²⁶Hab tug TSWV yuav zaam txim rua cov Yixalayees hab cov tuabneeg txawv tebchaws kws nrug puab nyob, vim puab txhua tug puavleej ua txhum.

²⁷“Yog muaj leejtwg ua txhum kws tsi yog txhobtxwm ua, nwg yuavtsum caab ib tug nwm tshis kws noobnyoog ib xyoos moog tua fij dlaws txim.

²⁸Tug povthawj ua kevcai ntxuav tug tuabneeg kws tsi yog txhobtxwm ua txhum ntawd lub txim taabmeeg tug TSWV ntawm lub thaaj, tug TSWV txhaj yuav zaam nwg lub txim.

²⁹Muab tuab txuj kevcai nuav rua txhua tug kws tsi yog txhobtxwm ua txhum, tsi has cov Yixalayees lossis cov tuabneeg txawv tebchaws.

³⁰“Yog leejtwg tub paub lawm, tabsis nwg txhobtxwm ua txhum kws yog saib tsi taug tug TSWV, tsi has cov Yixalayees lossis cov tuabneeg txawv tebchaws, yuavtsum muab nwg tua povtseg.

³¹Rua qhov nwg tsi noog tug TSWV tej lug hab txhobtxwm rhuav tug TSWV tej lug saamfwm. Nwg yuav tau ris lub txim tuag ntawd.”

³²Thaus cov Yixalayees tseem nyob nraag taj suabpuam, muaj ib zag puab pum ib tug tuabneeg moog khaws tawg nub Xanpataus.

³³Cov tuabneeg kws pum tug moog khaws tawg ntawd, puab coj nwg moog cuag Mauxes, Aloos hab cov Yixalayees suavdlawg,

³⁴puab kaav nwg nruj heev, vim puab tseem tsi tau paub has tas yuav ua le caag rua nwg.

³⁵Ces tug TSWV has rua Mauxes has tas, “Yuavtsum muab tug tuabneeg nuav tua povtseg; cov pejxeem ca le coj nwg moog rua nrau ntug yeej hab muab pobzeb ntaus kuas nwg tuag.”

³⁶Yog le ntawd taagnrho cov pejxeem suavdlawg txhaj coj tug ntawd tawm moog rua saab nrau ntug yeej hab muab pobzeb ntaus nwg tuag lawv le tug TSWV tau saamfwm.

³⁷Tug TSWV has rua Mauxes has tas,

³⁸“Koj has rua cov Yixalayees has tas, ‘Mej ntxhoo ib cov paaj lwg kaab dlai rua ntawm mej cov tsho ntev, tej kaum tsho, hab muab ib txuj xuv xav lug xaws rua txhua lub kaum. Mej yuavtsum ua le nuav moog ibtxhis le.

³⁹Cov lwg kaab ntawd yuav ua lub cim rua mej ncu ntsoov. Thaus mej pum cov lwg kaab ntawd yuav ua rua mej ncu ntsoov kuv tej lug saamfwm hab ua lawv le kuv tej lug; mej txhaj yuav tsi tsiv ntawm kuv hab tsi moog ua lawv le mej lub sab nyam.

⁴⁰Cov lwg kaab ntawd yuav ua ib qho rua mej ncu ntsoov ua lawv le kuv tej lug saamfwm, hab mej yog kuv tug lawm tag.

⁴¹Kuv yog tug TSWV kws yog mej tug Vaajtswv; kuv coj mej tsiv nraag tebchaws Iziv lug kuas kuv tau ua mej tug Vaajtswv. Kuv yog tug TSWV.’”