Read Hmong Njua Teev Npe 16 Bible Online

Teev Npe 16 - Hmong Njua bible

Teev Npe 16

¹Ixahas tug tub Kaulas kws yog xeem Levis hab yog cuab Kauhas, nwg tau ntxeev sab rua Mauxes kws yog tug thawjcoj. Kaulas koom sab nrug Eli-as tug tub Dathaas, Anpilaas hab Pelethes tug tub kws yog xeem Lunpees, hab ob puas tsib caug leej Yixalayees kws cov pejxeem suavdlawg tau xaiv lug ua cov thawjcoj.

³Puab tuaj sis sau tim ntsej tim muag rua ntawm Mauxes hab Aloos, hab has rua obtug tas, “Meb tau ua dlhau kevcai lawm! Taagnrho cov pejxeem suavdlawg puavleej yog tug TSWV tug, hab tug TSWV yeej nrug peb suavdlawg nyob huv tuabsi. Vim le caag meb tsaav meb lub fwjchim sab tshaaj tug TSWV tsaav tuabneeg lawm hab?”

⁴Thaus Mauxes nov tej lug ntawd, nwg txawm tso cev dlaa rua huv aav hab thov tug TSWV.

⁵Mauxes has rua Kaulas hab nwg cov phoojywg tas, “Pigkig sawv ntxuv tug TSWV maam qha saib peb leejtwg yog tug TSWV tug hab peb leejtwg yog tug kws tug TSWV xaiv; nwg yuav ca tug kws yog nwg tug, hab tug kws nwg xaiv moog cuag nwg rua ntawm lub thaaj.

⁶Kaulas, koj hab taagnrho koj cov phoojywg ua le nuav: pigkig mej ca le moog muab cov laujkaub

⁷hab muab ncaig tawg hab moov tshuaj tsw qaab tso rua huv cov laujkaub coj moog tso taabmeeg tug TSWV. Tug tuabneeg kws tug TSWV xaiv, nwg yuav yog tug dlawbhuv. Mej cov Levis ko, yog cov kws ua dlhau cai ntaag!”

⁸Mauxes has rua Kaulas ntxiv has tas, “Mej cov Levis ko, ca le ua tuab zoo noog!

⁹Mej xaav has tas, qhov kws cov Yixalayees tug Vaajtswv tau tsaa mej lug ua ib paab kws nyob ib caag ntawm cov pejxeem, kuas mej moog cuag tau nwg, ua mej teg num nyob rua huv tug TSWV lub Tsevntaub, hab saib cov pejxeem suavdlawg hab ua cov kws ua num rua puab, tseem tsi tau txaus mej sab hab los?

¹⁰Nwg tsaa mej hab cov Levis lug ua teg num nuav, tabsis nwgnuav mej tseem xaav nrhav kev lug ua tug povthawj hab!

¹¹Thaus koj ywg Aloos, tub yog koj hab koj cov phoojywg ntxeev sab tawmtsaam tug TSWV ntaag.”

¹²Mauxes txawm khaiv tuabneeg moog hu Dathaas hab Anpilaas obtug, tabsis obtug teb has tas, “Peb yuav tsi tuaj!

¹³Qhov kws koj coj peb tawm nraag tebchaws Iziv kws aav rog hab zoo qoob lug tuag taag rua huv taj suabpuam nuav tseem tsi tau txaus koj sab hab los? Ua le caag koj tseem yuav muab koj tsaa ua tug tswv kaav taagnrho peb hab?

¹⁴Qhov tseemceeb, koj tub tsi tau coj peb moog rua huv lub tebchaws kws aav rog hab zoo qoob lossis pub laj teb rua peb hab pub kuas muaj vaaj txiv maab lug ua peb tug, hab nwgnuav koj taabtom nrhav kev dlaag ntxag peb. Peb yuav tsi tuaj cuag koj!”

¹⁵Mauxes chim heev, nwg has rua tug TSWV has tas, “Tsi xob txais tej khoom kws cov tuabneeg nuav coj tuaj fij rua koj. Kuv yeej tsi tau ua phem rua puab ib leeg tug twg; txawm yog puab tej neeg luav los kuv tub tsi tau txeeb ib tug le.”

¹⁶Mauxes has rua Kaulas has tas, “Pigkig koj yuavtsum coj koj ob puas tsib caug leej ntawd tuaj rua huv lub Tsevntaub kws yog tug TSWV qhov chaw sis ntsib; Aloos los nwg yuavtsum tuaj nyob rua huv hab.

¹⁷Mej txhua tug nyag yuavtsum nqaa nyag lub laujkaub hlawv moov tshuaj tsw qaab tuaj, muab moov tshuaj tsw qaab tso rua huv lub laujkaub, hab coj moog fij rua ntawm lub thaaj.”

¹⁸Yog le ntawd, txhua tug txivneej nyag txhaj nqaa nyag lub laujkaub thee, muab cov thee kws cig ntsaa thuav hab muab moov tshuaj tsw qaab tso rua huv, puab tuaj sawv nrug Mauxes hab Aloos obtug ua ke rua ntawm tug TSWV lub Tsevntaub sis ntsib lub qhovrooj.

¹⁹Ces Kaulas txawm coj taagnrho cov pejxeem suavdlawg tuaj sawv tim ntsej tim muag Mauxes hab Aloos ntawm tug TSWV lub Tsevntaub lub qhovrooj. Taamsim ntawd tug TSWV tug tshwjchim ci ntsaa ab tshwm lug rua suavdlawg pum,

²⁰ces tug TSWV has rua Mauxes hab Aloos has tas,

²¹“Meb ca le txaav tawm ntawm cov tuabneeg nuav moog, kuv yuav ua kuas puab puamtsuaj taamsim nuav ntaag.”

²²Tabsis Mauxes hab Aloos obtug txhus caug ndlua, nyo hau ntshis obtug ob lub ntsejmuag ti nkaus huv aav hab thov has tas, “Vaajtswv, koj yog tug tswj tuabneeg txujsa. Thaus ib tug ua txhum, koj txawm chim rua suavdlawg taagnrho los?”

²³Tug TSWV has rua Mauxes has tas,

²⁴“Ca le has rua cov pejxeem kuas puab txaav ntawm Kaulas, Dathaas, hab Anpilaas puab cov tsevntaub taamsim nuav moog.”

²⁵Ces Mauxes hab cov Yixalayees tej thawjcoj, txhaj moog rua tom Dathaas hab Anpilaas obtug ob lub tsev.

²⁶Mauxes has rua cov tuabneeg ntawd tas, “Mej ca le txaav kuas dleb ntawm peb tug tuabneeg sab phem nuav lub tsev moog, hab tsi xob cev teg kov ib yaam dlaabtsi kws yog puab tug le.”

²⁷Yog le ntawd puab txhaj tsiv tawm ntawm Kaulas, Dathaas hab Anpilaas puab tsev moog lawm. Dathaas hab Anpilaas tseem taabtom tawm tuaj sawv ntawm obtug ob lub qhovrooj, nrug obtug ob tug quaspuj hab cov mivnyuas nyob.

²⁸Mauxes has rua cov pejxeem tas, “Mej yuavtsum paub has tas, tug TSWV yog tug khaiv kuv tuaj ua txhua yaam nuav, tsi yog kuv laam tuaj ua lawv le kuv lub sab nyam xwb.

²⁹Yog cov tuabneeg nuav tuag le luas zeej tsoom tuag, ces tsi yog Vaajtswv rau txim rua puab, hab tsi yog tug TSWV tso kuv tuaj ua nwg teg num le.

³⁰Tabsis yog tug TSWV ua tej yaam kws tsi tau nov dlua, hab aav ca le qheb hlo muab puab nqog kag nrug txhua yaam kws yog puab tug, kuas puab ca le nqeg caj rua huv tubtuag teb, mej txhaj yuav paub has tas, cov tuabneeg nuav yog cov kws muab tug TSWV tso tseg lawm.”

³¹Thaus Mauxes has cov lug ntawd taagnrho, ces thaaj aav kws nyob ntawm qhov chaw kws Dathaas hab Anpilaas obtug sawv, txawm tu nrho qheb hlo

³²hab nqog kag obtug hab obtug tsev tuabneeg, nqog taagnrho Kaulas cov phoojywg kws koom sab nrug nwg hab puab tej cuabtxhaj cuabtaam nrug puab huv tuabsi lawm.

³³Yog le ntawd, puab txhaj nqeg caj sa kais moog rua huv tubtuag teb, nrug puab tej cuabtxhaj cuabtaam. Aav nqawm nkaus npug puab, puab txhaj puamtsuaj pluj ndlais lawm.

³⁴Thaus puab quaj qw zum zawg, cov Yixalayees kws nyob ibncig ntawd puab puavleej tsiv tawm hab qw has tas, “Ca le tsiv! Nyob tsaam aav nqog peb lawm hab!”

³⁵Ces tug TSWV tso suavtawg lug kub ob puas tsib caug leej kws taabtom hlawv puab tej moov tshuaj tsw qaab ntawd tuag taag huv tuabsi lawm hab.

³⁶Tug TSWV has rua Mauxes has tas,

³⁷“Koj has rua Aloos tug tub Ele-axas kws yog tug povthawj kuas nwg moog muab cov laujkaub tooj hlawv moov tshuaj tsw qaab ntawm cov tuabneeg kws kub nyab tuag ntawd tshem, hab muab cov thee huv cov laujkaub ntawd laub rua lwm qhov, rua qhov cov laujkaub ntawd dlawbhuv.

³⁸Cov laujkaub ntawd dlawbhuv rua thaus coj moog fij rua ntawm tug TSWV lub thaaj. Ca le moog muab cov laujkaub ntawm cov tuabneeg tuag kws vim puab ua txhum ntawd, lug ntaus ua tej dlaim nyag nyag coj moog npug lub thaaj. Dlaim tooj ntawd yuav ua lub cim rua cov Yixalayees.”

³⁹Ces tug povthawj Ele-axas txhaj moog muab cov laujkaub ntawd lug hab muab ntaus ua tej dlaim nyag nyag hab muab haam ua ib dlaim luj luj moog npug lub thaaj.

⁴⁰Qhov nuav ua lub cim qha rua cov Yixalayees paub has tas, yog leejtwg tsi yog Aloos cov xeebntxwv tsi xob moog hlawv moov tshuaj tsw qaab rua tug TSWV ntawm lub thaaj. Nyob tsaam nwg yuav raug kev puamtsuaj le Kaulas hab cov tuabneeg kws koom nrug nwg ua ib lub sab. Tej lug nuav ua lawv le tug TSWV tau saamfwm rua Mauxes kuas has rua Ele-axas ntaag.

⁴¹Nub tom qaab cov pejxeem rov ywg Mauxes hab Aloos obtug dlua has tas, “Meb tau tua tug TSWV cov tuabneeg coob leej lawm.”

⁴²Tom qaab kws puab ywg Mauxes hab Aloos le ntawd taag, Mauxes hab Aloos txawm tig moog rua tom tug TSWV lub Tsevntaub sis ntsib hab pum ib tauv fuab lug laum nkaum lub tsevntaub, tug TSWV tug tshwjchim ci ntsaa ab tshwm plawg lug.

⁴³Ces Mauxes hab Aloos obtug txawm txaav moog sawv ntawm tug TSWV lub Tsevntaub sis ntsib lub qhovrooj.

⁴⁴Tug TSWV has rua Mauxes has tas,

⁴⁵“Koj txaav kuas dleb ntawm pawg tuabneeg nuav, kuv yuav muab puab ua kuas puamtsuaj taag rua ntawm qhov chaw kws puab sawv nuav!” Obtug ob leeg puavleej txhus caug ndlua nyo hau ntshis ti nkaus huv aav,

⁴⁶hab Mauxes has rua Aloos has tas, “Ca le muab koj lub laujkaub thee lug, muab cov ncaig sau lub thaaj tso rua huv, hab muab moov tshuaj tsw qaab tso rua sau cov ncaig. Koj ca le ceev nrooj coj moog yom ua kevcai ntxuav dlaws cov pejxeem lub txim. Tug TSWV txujkev chim hab tej sub tawg sub ntshaa tub pib tawm tuaj lawm!”

⁴⁷Aloos noog Mauxes lug, nwg txhaj muab hlo lub laujkaub thee hab nqaa ceev nrooj moog rua huv plawv pawg tuabneeg kws tuaj sis sau ntawd. Thaus Aloos pum tej kev tuag tub pib lawm, nwg maam muab moov tshuaj tsw qaab tso rua huv cov ncaig tawg moog ua kevcai ntxuav dlaws cov tuabneeg ntawd lub txim.

⁴⁸Qhov nuav txhaj tswj tau txujkev tuag, Aloos sawv nreg nreeg huv nruab nraab ntawm cov tuabneeg caj hab cov tuabneeg tuag.

⁴⁹Cov tuabneeg tuag muaj kaum plaub txheeb xyaa pua leej, tub tsi tau suav cov tuabneeg ntxeev sab kws tuag nrug Kaulas ua ke.

⁵⁰Thaus txujkev tuag dlhau lawm, Aloos rov moog cuag Mauxes rua tom tug TSWV lub Tsevntaub sis ntsib lub qhovrooj.