Read Hmong Njua Teev Npe 17 Bible Online

Teev Npe 17 - Hmong Njua bible

Teev Npe 17

¹Tug TSWV has rua Mauxes has tas,

²“Koj has rua cov Yixalayees cov thawjcoj ntawm txhua xeem, kuas nyag nqaa nyag tug paas nreg tuaj, taagnrho yog kaum ob tug. Sau puab txhua tug npe rua ntawm nyag tug paas,

³hab sau Aloos npe rua ntawm cov Levis tug paas. Tsuas pub ib tug paas rua ib xeem tug thawjcoj xwb.

⁴Koj muab cov paas nreg ntawd, coj moog tso rua huv tug TSWV lub Tsevntaub sis ntsib, hab muab coj moog tso rua tom hauv ntej lub Phijxaab kws ntim Vaajtswv tej lug cog tseg kws yog qhov chaw kuv ntsib koj.

⁵Ces tug tuabneeg kws kuv xaiv lawm tug paas nreg yuav hlaav ntsuag. Qhov kws kuv ua le nuav, yog ua kuas cov Yixalayees tej suab kws ywg koj ntsag tsi muaj ntxiv lawm.”

⁶Yog le ntawd, Mauxes txhaj has rua cov Yixalayees, hab puab txhua tug thawjcoj nyag nqaa nyag tug paas nreg tuaj, ib xeem ib tug, taagnrho yog kaum ob tug, hab muab Aloos tug paas nreg coj moog tso nrug cov ntawd hab.

⁷Ces Mauxes muab taagnrho cov paas nreg ntawd coj moog tso rua huv lub Tsevntaub ntawm tug TSWV lub Phijxaab kws ntim Vaajtswv tej lug cog tseg hauv ntej.

⁸Taagkig tom qaab, thaus Mauxes moog huv lub Tsevntaub, nwg pum Aloos tug paas nreg kws yog xeem Levis tug, hlaav ntsuag, hlaav nplooj, tawg paaj hab txi txiv!

⁹Mauxes muab cov paas nreg ntawd nqaa moog qha rua cov Yixalayees. Puab pum has tas, yeej muaj tej xwmtxheej nuav tshwmsim tag, yog le ntawd, cov thawjcoj nyag txhaj nqaa nyag tug paas nreg rov moog lawm.

¹⁰Tug TSWV has rua Mauxes has tas, “Koj muab Aloos tug paas rov moog tso rua ntawm lub Phijxaab kws ntim Vaajtswv tej lug cog tseg hauv ntej. Tug paas ntawd yuav ua lub cim rua cov Yixalayees kws ntxeev sab, qhov nuav yuav ua kuas puab tseg tsi xob ywg kuv, puab txhaj tsi tuag.”

¹¹Mauxes ua lawv le tug TSWV tau has rua nwg.

¹²Cov Yixalayees has rua Mauxes has tas, “Zag nuav peb yuav tuag taag le lauj!

¹³Yog has tas, leejtwg txaav moog ze tug TSWV lub Tsevntaub yuav raug tua tuag. Ces peb suavdlawg txawm yuav tuag taag tag los?”