Read Hmong Njua Teev Npe 18 Bible Online

Teev Npe 18 - Hmong Njua bible

Teev Npe 18

¹Tug TSWV has rua Aloos has tas, “Koj, koj cov tub hab cov Levis yuavtsum ris lub txim kws ua txhum rua lub Tsevntaub kws yog qhov chaw nrug kuv sis ntsib; tabsis tsuas yog koj hab koj cov tub txhaj tau ris lub txim kws ua txhum rua cov povthawj xwb.

²Coj koj cov kwvtij kws yog xeem Levis tuaj nrug koj ua num hab paab koj thaus koj cov tub taabtom ua num nyob ntawm lub Tsevntaub sis ntsib.

³Puab yuav ua tej num kws koj muab cob rua puab ua, hab puab yuav ua tej num huv lub Tsevntaub sis ntsib, tabsis tsi pub puab txaav moog ze tej khoom dlawbhuv hab Chaav Dlawbhuv lossis lub thaaj. Yog puab txaav moog ze, mas koj hab puab yuav raug tua tuag.

⁴Puab yuav nrug koj ua num hab puab ua taagnrho tej num huv lub Tsevntaub sis ntsib, tabsis tsi pub tug kws tsi tsimnyog tuaj nrug mej ua.

⁵Koj hab koj cov tub xwb, txhaj yog cov kws muaj feem moog ua num huv Chaav Dlawbhuv hab ntawm lub thaaj, kuas kuv txhaj tsi chim rua cov Yixalayees ntxiv lawm.

⁶Kuv yog tug kws xaiv koj cov kwvtij Levis tawm huv cov Yixalayees lug rua koj. Tub muab puab fij rua tug TSWV lawm, kuas puab txhaj paab tau koj ua tau tej num huv lub Tsevntaub.

⁷Tabsis tsuas yog koj hab koj cov tub kws yog povthawj txhaj ua tau txhua yaam num ntawd lub thaaj hab huv Chaav Dlawbhuv xwb. Txhua yaam nuav puavleej yog mej lub luag num, lub meejmom povthawj yog kuv muab rua mej. Txhua tug kws tsi tsimnyog hab laam txaav moog ze tej khoom dlawbhuv yuav raug tua tuag.”

⁸Tug TSWV has rua Aloos has tas, “Koj ncu ntsoov txhua yaam khoom kws muab fij tshwjxeeb rua kuv kws tsi yog yaam muab hlawv theej txhoj, kuv yuav muab huv tuabsi rua koj. Kuv muab tej khoom nuav pub rua koj hab koj cov xeebntxwv, yog ib feem kws yuavtsum muab faib rua koj moog ibtxhis le.

⁹Tej khoom dlawbhuv kws tsi coj moog hlawv fij rua sau lub thaaj kws yog: tej moov nplej, tej khoom fij dlaws txim hab tej khoom fij ntxuav kev txhum. Txhua yaam khoom dlawbhuv kws muab fij rua kuv puavleej yog koj hab koj cov tub tug.

¹⁰Mej yuavtsum noj tej khoom nuav huv chaav dlawbhuv, hab tsuas pub cov txivneej noj xwb; rua qhov yog tej khoom dlawbhuv rua mej.

¹¹“Txhua yaam kws cov Yixalayees coj tuaj yom fij rua kuv los puavleej muab rua mej huv tuabsi. Kuv muab tej khoom ntawd rua koj, koj cov tub hab koj cov ntxhais moog ibtxhis. Koj tsev tuabneeg txhua tug kws yog tuabneeg huv lawm ces noj tau tej ntawd.

¹²“Thawj phaum qoobloo zoo tshaaj plawg kws cov Yixalayees coj tuaj fij rua kuv kws yog tej roj txiv ntoo, tej cawv txiv maab hab tej nplej, kuv muab huv tuabsi rua koj.

¹³Tej nuav puavleej yog mej tug. Koj tsev tuabneeg txhua tug kws yog tug tuabneeg huv lawm noj tau tej khoom ntawd.

¹⁴“Txhua yaam kws cov Yixalayees coj tuaj fij rua kuv puavleej yog koj tug.

¹⁵“Tsi has tuabneeg lossis tsaj txhu, thawj tug kws cov Yixalayees coj tuaj fij rua kuv puavleej yog mej tug. Tabsis tej nyaj kws luas coj tuaj txhwv thawj tug tub hlub hab tej nyaj kws luas coj tuaj txhwv tej tsaj kws tsi huv thawj tug mivnyuas kws yog tug txiv rov qaab, mej yuavtsum khaws tej nyaj ntawd ca.

¹⁶Yuavtsum txhwv tej mivnyuas kws noobnyoog ib hlis rov qaab, tug nqe yog tsib dlaim nyaj, lawv le numtswv txuj cai kom tseg.

¹⁷Tabsis thawj tug mivnyuas nyuj, mivnyuas yaaj, hab mivnyuas tshis kws yog tug txiv tsi xob txhwv rov qaab; cov ntawd yeej yog kuv tug hab yog cov kws muab tua theej txhoj. Muab cov ntshaav laub ywg lub thaaj hab muab cov roj hlawv ua khoom fij, kuas tej paa tsw qaab ntxag txaus kuv sab.

¹⁸Tej nqaj puavleej yog koj tug, ib yaam le lub hauv nrob hab cegqaab saab xis kws muab yom fij.

¹⁹“Taagnrho tej khoom dlawbhuv kws cov Yixalayees coj tuaj fij rua kuv, kuv muab huv tuabsi rua koj, koj cov tub hab koj cov ntxhais moog ibtxhis le. Kuv yuav tsi rhuav tej lug cog tseg rua koj hab koj cov xeebntxwv le.”

²⁰Tug TSWV has rua Aloos has tas, “Koj yuav tsi tau txais ib qho aav ua koj tug, hab yuav tsi faib lub tebchaws Yixalayees ib qhov rua koj le. Kuv yog tug TSWV, txhua yaam kws yog kuv tug puavleej yog koj le.”

²¹Tug TSWV has tas, “Ib feem kaum kws cov Yixalayees coj tuaj fij rua kuv, kuv yuav muab taagnrho rua cov Levis. Tej nuav yog muab ua nqe zug rua puab tu kuv lub Tsevntaub sis ntsib.

²²Txij nuav moog tsi pub cov Yixalayees tuaj ze tug TSWV lub Tsevntaub sis ntsib lawm, nyob tsaam ua rua puab raug lub txim tuag.

²³Txij nuav moog tsuas ca cov Levis tuaj tu lub Tsevntaub sis ntsib hab ua taagnrho tej num huv lub tsevntaub lawm xwb. Qhov nuav ua ib txuj kevcai rua koj cov xeebntxwv moog le. Cov Levis yuav tsi muaj teej tug nyob huv lub tebchaws Yixalayees,

²⁴rua qhov tej ib feem kaum kws cov Yixalayees coj tuaj fij rua kuv ntawd, kuv tub muab rua cov Levis lawm. Vim le nuav kuv txhaj has rua puab tas, puab yuav tsi muaj aav nyob huv lub tebchaws Yixalayees.”

²⁵Tug TSWV saamfwm rua Mauxes

²⁶kuas has rua cov Levis has tas: “Thaus mej tau txais cov Yixalayees tej ib feem kaum kws tug TSWV muab rua mej ua mej tug, mej yuavtsum muab ib feem kaum ntawm cov khoom kws yog mej tug coj moog fij tshwjxeeb rua tug TSWV.

²⁷Mej tej khoom fij tshwjxeeb nuav yuav zoo ib yaam le cov tuabneeg ua teb tej nplej tshab hab tej cawv txiv maab tshab kws puab coj tuaj fij ntaag.

²⁸Mej yuavtsum ua le nuav txhaj yog mej muab tej ib feem kaum kws mej tau ntawm cov Yixalayees lug moog fij pub tshwjxeeb ua tug TSWV tug. Cov khoom kws fij tshwjxeeb rua tug TSWV, ca le muab rua Aloos kws yog tug povthawj.

²⁹Mej yuavtsum muab tej kws zoo tshaaj plawg xwb.

³⁰Thaus mej muab tej kws zoo coj moog fij lawm, mej yuavtsum khaws tej kws seem ca, ib yaam le cov tuabneeg ua teb kws muab ibtxha coj moog fij hab khaws tej kws seem tseg.

³¹Mej hab mej tsev tuabneeg ca le nqaa tej kws seem moog noj los tau, rua qhov tub muab tej ntawd ua nqe zug rua mej tu lub Tsevntaub sis ntsib lawm.

³²Mej noj tej ntawd los mej yuav tsi txhum, yog mej tub tshwj tej kws zoo coj moog fij rua tug TSWV lawm. Tabsis mej yuavtsum ua tuab zoo saib tsi xob noj tej khoom fij dlawbhuv kws cov Yixalayees coj tuaj fij ua ntej kws mej tsi tau tshwj tej kws zoo fij rua kuv; yog mej txhobtxwm noj, mej yuav raug tua tuag.”