Read Hmong Njua Teev Npe 19 Bible Online

Teev Npe 19 - Hmong Njua bible

Teev Npe 19

¹Tug TSWV saamfwm rua Mauxes hab Aloos obtug has tas,

²“Meb muab tej kevcai nuav qha rua cov Yixalayees. Caab ib tug xyuas nyuj lab kws tsi muaj ib qhov phem le, hab tsi tau siv ua num le,

³moog rua tug povthawj Ele-axas. Caab tug xyuas nyuj ntawd moog rua saab nrau ntug yeej hab muab tug xyuas nyuj tua taabmeeg Ele-axas.

⁴Ces Ele-axas yuavtsum muab nwg tug ntivteg moog tub cov ntshaav coj moog nchus xyaa zag rua ntawm hauv ntej tug TSWV lub Tsevntaub sis ntsib.

⁵Taagnrho tug tsaj ntawd lub cev, dlaim tawv, cov nqaj, cov ntshaav hab cov quav, yuavtsum muab hlawv taabmeeg tug povthawj.

⁶Tug povthawj muab ib dlaim ntoo cab, ib re nplooj hixauv hab muab ib ntshuas xuv lab coj moog pov rua huv lub qhovcub kws hlawv tug xyuas nyuj ntawd.

⁷Tom qaab ntawd, tug povthawj muab nwg cev rig tsho hle ntxhua hab muab dlej ntxuav thoob plawg nwg ib ce, nwg maam rov moog rua huv lub yeej; tabsis nwg tseem tsi huv moog txug thaus tsaus ntuj.

⁸Tug tuabneeg kws hlawv tug xyuas nyuj ntawd, nwg yuavtsum hle nwg cev rig tsho ntxhua hab muab dlej ntxuav thoob plawg nwg ib ce, hab nwg tseem tsi huv moog txug thaus tsaus ntuj ib yaam nkaus.

⁹Ces tug tuabneeg kws huv lawm moog yawm cov tshauv kws yog tug xyuas nyuj ntawd coj moog tso rua ntawm qhov chaw huv saab nrau ntug yeej, yog qhov chaw kws cov Yixalayees muab dlej ua kevcai ntxuav cov tuabneeg tsi huv lub txim povtseg.

¹⁰Tug tuabneeg kws yawm cov tshauv ntawd yuavtsum hle nwg cev rig tsho ntxhua, tabsis nwg tseem tsi huv moog txug thaus tsaus ntuj. Cov Yixalayees hab cov tuabneeg txawv tebchaws kws nrug puab nyob, yuav tau coj txuj kevcai nuav moog ibtxhis le.”

¹¹Yog leejtwg moog chwv tej tuabneeg tuag, mas nwg yog tuabneeg tsi huv xyaa nub.

¹²Nub peb hab nub xyaa, nwg yuavtsum muab dlej lug ua kevcai ntxuav nwg, nwg txhaj le rov ua tuabneeg huv. Tabsis yog nwg tsi ua kevcai ntxuav ob zag kws yog nub peb hab nub xyaa, ces nwg yog tuabneeg tsi huv moog le lawm.

¹³Yog leejtwg moog chwv tej tuabneeg tuag, nwg tsi ua kevcai ntxuav, ces tug ntawd yog tuabneeg tsi huv, rua qhov tsi tau muab cov dlej kws ntxuav kuas huv lug nchus rua nwg. Nyob tsaam nwg ua rua tug TSWV lub Tsevntaub tsi huv, mas yuavtsum muab nwg cais tawm ntawm Vaajtswv tsaav tuabneeg.

¹⁴Yog muaj ib tug tuabneeg twg tuag rua huv lub tsev twg, txhua tug kws nyob huv lub tsev ntawd lossis tej tuabneeg kws tuaj ncaaj rua lub sijhawm kws tug tuabneeg ntawd tuag, mas puab yuav yog tuabneeg tsi huv xyaa nub.

¹⁵Txhua lub hub hab txhua lub taub rau dlej kws tsi muaj hau khwb kws nyob huv lub tsev ntawd los puavleej tsi huv ib yaam nkaus.

¹⁶Yog leejtwg moog tuav tug tuabneeg kws raug luas tua tuag lossis tuag rua tom tej tshaav puam lossis yog leejtwg laam moog kov tej pobtxhaa tuabneeg tuag lossis lub ntxaa, mas tug ntawd yog tuabneeg tsi huv xyaa nub.

¹⁷Ua kevcai ntxuav cov tuabneeg tsi huv, muab tug xyuas nyuj lab kws coj moog hlawv dlaws txim cov tshauv tso rua huv lub laujkaub, hab cug cov dlej tshab lug laub rua.

¹⁸Ca tug tuabneeg kws ua kevcai ntxuav huv lawm, muab ib re nplooj hixauv raus rua huv cov dlej, hab muab nchus rua lub tsev, txhua yaam kws nyob huv lub tsev, hab cov tuabneeg kws nyob huv lub tsev. Dlua le ntawd ca nwg muab cov dlej nchus rua tug tuabneeg kws moog kov tej pobtxhaa tuabneeg tuag lossis tug tuabneeg tuag lossis lub ntxaa hab.

¹⁹Tug tuabneeg huv yuav muab dlej nchus rua tug tuabneeg tsi huv nub peb hab nub xyaa. Nub xyaa nwg yuavtsum ua kevcai ntxuav tug tuabneeg tsi huv, tug tuabneeg tsi huv kws ua kevcai ntxuav kuas huv ntawd yuavtsum hle nwg cev rig tsho moog ntxhua hab muab dlej ntxuav nwg lub cev, thaus nub poob qho nwg txhaj le yuav huv.

²⁰Txhua tug tuabneeg kws tsi huv hab tsi tau ua kevcai ntxuav, nwg yog tuabneeg tsi huv, rua qhov tsi tau muab cov dlej kws ntxuav kuas huv nchus rua nwg lub cev. Nyob tsaam nwg ua rua tug TSWV lub Tsevntaub tsi huv, mas yuavtsum muab nwg cais tawm ntawm Vaajtswv tsaav tuabneeg.

²¹Mej yuavtsum coj txuj kevcai nuav moog ibtxhis. Tug tuabneeg kws muab dlej nchus ua kevcai ntxuav rua lwm tug, yuavtsum hle nwg cev rig tsho moog ntxhua; txhua tug kws kov cov dlej ntawd, nwg tsi huv moog txug thaus tsaus ntuj.

²²Txhua yaam kws tug tuabneeg tsi huv moog tuav lawm, yaam ntawd yuav tsi huv, hab txhua tug kws moog tuav tej ntawd yuav tsi huv moog txug thaus tsaus ntuj.