Read Hmong Njua Teev Npe 2 Bible Online

Teev Npe 2 - Hmong Njua bible

Teev Npe 2

¹Tug TSWV qha rua Mauxes hab Aloos has tas,

²“Thaus twg cov Yixalayees tsaa puab tej tsevntaub, txhua tug tuabneeg yuavtsum tsaa nwg lub tsevntaub nyob rua huv qaab nwg xeem tug chij hab huv tsev tuabneeg tug qaab chij. Mej tej tsev yuavtsum nyob puagncig lub Tsevntaub sis ntsib.

³“Tu saab nubtuaj rua xeem Yudas, puab moog tsaa tsevntaub nyob ua puab ib pawg, cov Yudas tug thawjcoj yog Aminadas tug tub Nasoos,

⁴suav taagnrho nwg cov tuabneeg muaj xyaa caum plaub txheeb rau pua leej.

⁵Xeem Ixakhas, tsaa puab tej tsevntaub nyob txuas nkaus ntawm xeem Yudas, cov Ixakhas tug thawjcoj yog Zuag tug tub Nethanees,

⁶suav taagnrho nwg cov tuabneeg muaj tsib caug plaub txheeb plaub puas leej.

⁷Txuas ntawd, yog xeem Xenpuloos, cov Xenpuloos tug thawjcoj yog Heloos tug tub Eli-as,

⁸suav taagnrho nwg cov tuabneeg muaj tsib caug xyaa txheeb plaub puas leej.

⁹Suav taagnrho cov tuabneeg kws nyob rua saab yeej kws cov Yudas nyob, muaj ib puas yim caum rau txheeb plaub puas leej. Puab yog cov kws yuav tawm moog ua ntej.

¹⁰“Tu saab nraag rua xeem Lunpees, cov Lunpees tug thawjcoj yog Sede-as tug tub Elixus,

¹¹suav taagnrho nwg cov tuabneeg muaj plaub caug rau txheeb tsib puas leej.

¹²Hab xeem Xime-oos, tsaa puab tej tsevntaub nyob txuas nkaus ntawm xeem Lunpees, cov Xime-oos tug thawjcoj yog Xulisadais tug tub Selumiyees,

¹³suav taagnrho nwg cov tuabneeg muaj tsib caug cuaj txheeb peb puas leej.

¹⁴Txuas ntawd yog xeem Khas, cov Khas tug thawjcoj yog Luyees tug tub Eli-axas,

¹⁵suav taagnrho nwg cov tuabneeg muaj plaub caug tsib txheeb rau pua tsib caug leej.

¹⁶Suav taagnrho cov tuabneeg kws nyob rua saab yeej kws xeem Lunpees nyob, muaj ib puas tsib caug ib txheeb plaub puas tsib caug leej. Puab yog cov kws tawm moog ua paab ob.

¹⁷“Cov Levis maam le kwv tug TSWV lub Tsevntaub sis ntsib tuaj nruab nraab ob paab kws moog ua ntej hab ob paab kws moog ua qaab. Plaub paab ntawd nyag yuavtsum moog nyob nyag qhov chaw lawv le tub faib tseg lawm, txhua paab twg nyag yuavtsum moog nyob huv qaab nyag tug chij xwb.

¹⁸“Tu saab nubpoob rua xeem Efalayees, puab moog tsaa puab tej tsevntaub nyob ua puab ib pawg, cov Efalayees tug thawjcoj yog Amihus tug tub Elisamas,

¹⁹suav taagnrho nwg cov tuabneeg muaj plaub caug txheeb tsib puas leej.

²⁰Hab xeem Manaxes tsaa puab tej tsevntaub nyob txuas nkaus ntawm cov Efalayees, cov Manaxes tug thawjcoj yog Pedaxes tug tub Nkamaliyees,

²¹suav taagnrho nwg cov tuabneeg muaj peb caug ob txheeb ob puas leej.

²²Txuas ntawd, yog xeem Npeenyamees, cov Npeenyamees tug thawjcoj yog Nkede-aunis tug tub Anpidaas,

²³suav taagnrho nwg cov tuabneeg muaj peb caug tsib txheeb plaub puas leej.

²⁴Suav taagnrho cov tuabneeg kws nyob rua saab yeej kws xeem Efalayees nyob, muaj ib puas yim txheeb ib puas leej. Puab yog cov kws tawm moog ua paab peb.

²⁵“Tu saab peg rua xeem Daas, puab moog tsaa tsevntaub nyob ua puab ib pawg, cov Daas tug thawjcoj yog Amisadais tug tub Ahi-exes,

²⁶suav taagnrho nwg cov tuabneeg muaj rau caum ob txheeb xyaa pua leej.

²⁷Hab xeem Aseles tsaa puab tej tsevntaub nyob txuas nkaus ntawm xeem Daas, cov Aseles tug thawjcoj yog Aukhalas tug tub Pankiyees,

²⁸suav taagnrho nwg cov tuabneeg muaj plaub caug ib txheeb tsib puas leej.

²⁹Txuas ntawd yog xeem Nathalis, cov Nathalis tug thawjcoj yog Enas tug tub Ahilas,

³⁰suav taagnrho nwg cov tuabneeg muaj tsib caug peb txheeb plaub puas leej.

³¹Suav taagnrho cov tuabneeg kws nyob rua saab yeej kws xeem Daas nyob, muaj ib puas tsib caug xyaa txheeb rau pua leej. Puab yog cov kws tawm moog ua paab kawg.”

³²Xaam taagnrho cov Yixalayees kws muab faib ua tej paab tej pawg ntawd, muaj rau pua peb txheeb tsib puas tsib caug leej.

³³Tabsis tsi tau sau cov Levis npe nrug cov Yixalayees, lawv le tug TSWV tau saamfwm rua Mauxes lawm.

³⁴Yog le ntawd, cov Yixalayees txhaj ua lawv le tej lug kws tug TSWV tau saamfwm rua Mauxes. Puab nyag tsaa nyag tej tsevntaub rua huv qaab nyag xeem tug chij, hab puab sawv kev moog ua tej paab lawv le nyag xeem.