Read Hmong Njua Teev Npe 20 Bible Online

Teev Npe 20 - Hmong Njua bible

Teev Npe 20

¹Thaus lub ib hlis ntuj cov Yixalayees lug txug rua ntawm taj suabpuam Xees, puab txhaj tsuam chaw su rua ntawm Kades. Milias tuag, hab puab muab nwg log rua ntawm qhov chaw ntawd.

²Nyob qhov ntawd tsi muaj dlej haus, cov pejxeem txhaj le sau nthwv tuaj cuag Mauxes hab Aloos.

³Puab ywg obtug has tas: “Yog peb ntxuv tuag nrug peb tej tuabneeg kws tuag rua ntawm tug TSWV lub Tsevntaub ntshai yuav zoo dlua.

⁴Vim le caag meb coj peb lug nyob ntawm taj suabpuam nuav. Meb xaav ua kuas peb hab peb tej tsaj txhu tuag taag huv tuabsi rua ntawm nuav los?

⁵Vim le caag meb coj peb tsiv nraag tebchaws Iziv lug nyob rua qhov chaw phem npaum le nuav, ib yaam nroj tsuag los tub tuaj tsi taug le? Cog tsi tau nplej, cog tsi tau txiv ncuav pas, cog tsi tau txiv maab hab cog tsi tau txiv ntsab pobkws le. Nyob ntawm nuav dlej haus los tub tsi muaj.”

⁶Mauxes hab Aloos txawm tawm huv cov pejxeem moog sawv rua ntawm lub qhovrooj Tsevntaub sis ntsib. Obtug txhus caug nyo ua ntsejmuag ti nkaus huv aav, hab tug TSWV tug tshwjchim ci ntsaa ab lug rua obtug pum.

⁷Tug TSWV has rua Mauxes has tas,

⁸“Muab tug paas nreg kws nyob ntawm lub Phijxaab kws ntim Vaajtswv tej lug cog tseg hauv ntej lug, ces Aloos meb hu cov pejxeem tuaj txoos ua ke. Koj has rua lub pobzeb tod taabmeeg rua puab saib ntsoov, ces dlej yuav txhawv huv lug. Koj ua le nuav dlej txhaj tawm huv pobzeb lug rua cov pejxeem haus, kuas puab hab puab tej tsaj txhu txhaj tau dlej haus.

⁹Mauxes txhaj moog muab tug paas nreg lawv le tug TSWV tau has rua nwg.”

¹⁰Ces Mauxes hab Aloos obtug txhaj hu taagnrho cov pejxeem tuaj txoos ua ke rua ntawm lub pobzeb hauv ntej, Mauxes has tas, “Mej cov kws yog tuabneeg ntxeev sab, mej ca le ua tuab zoo noog! Mej tseem ca wb ua kuas dlej txhawv huv lub pobzeb nuav lug rua mej haus hab los?”

¹¹Mauxes txhaj tsaa hlo tug paas nreg ntaus lub pobzeb ob paas, hab dlej txhawv paim yog huv lug, cov pejxeem hab tej tsaj txhu txhaj tau haus.

¹²Tabsis tug TSWV has rua Mauxes hab Aloos has tas, “Vim meb tsi ca sab rua kuv, meb txhaj tsi ua kuv lub fwjchim rua cov Yixalayees pum, yog le ntawd, meb yuav tsi tau coj puab moog nyob huv lub tebchaws kws kuv coglug yuav muab rua puab.”

¹³Tej xwm nuav tshwm muaj rua huv Melinpas, qhov chaw kws cov Yixalayees ywg tug TSWV hab qhov chaw kws nwg qha rua puab has tas, nwg yog tug dlawbhuv.

¹⁴Mauxes khaiv tuabneeg tawm huv Kades moog thov cov Edoos tug vaajntxwv. Puab thov has tas, “Tsaav tuabneeg Yixalayees kws yog koj cov kwvtij has le nuav rua koj. Koj yeej paub tej kev txomnyem kws peb raug lawm,

¹⁵vim le caag peb cov yawmkoob txhaj tsiv moog nyob nraag tebchaws Iziv, peb nyob nraag tau ntau xyoo. Cov tuabneeg Iziv quab yuam peb cov yawmkoob hab peb,

¹⁶peb tau quaj thov tug TSWV paab peb. Nwg nov peb tej lug thov hab nwg tso ib tug timtswv coj peb kev tawm nraag tebchaws Iziv lug. Nwgnuav peb lug nyob rua huv lub nroog Kades kws npuas nkaus koj lub tebchaws.

¹⁷Thov koj pub peb hlaa koj lub tebchaws moog. Peb yuav caab peb tej tsaj taug kev ncaaj nraim tsi su qhov twg, peb hab peb tej tsaj yuav tsi moog tsuj huv koj tej teb lossis tej vaaj txiv maab, hab yuav tsi cug dlej ntawm koj tej qhovdlej haus. Peb yuav taug txujkev luj ncaaj nraim tsi tig saib qhov twg le moog txug thaus kws peb hlaa dlhau koj lub tebchaws.”

¹⁸Tabsis cov Edoos teb has tas, “Peb tsi pub mej hlaa peb lub tebchaws le! Yog mej tseem hlaa, mas peb yuav tuaj tua mej taamsim ntawd ntaag.”

¹⁹Cov Yixalayees has tas, “Peb yuav taug txujkev luj ncaaj nraim xwb, yog peb lossis peb tej tsaj haus mej tej dlej, peb yuav them tej nqe dlej huv tuabsi rua mej, peb tsuas thov taug txujkev dlhau moog xwb.”

²⁰Cov Edoos rov has dlua tas, “Peb txwv tu nrho tsi pub mej lug moog le!” Hab puab txawm txhij cov tubrog kws sab tawv heev tawm tuaj tua cov Yixalayees.

²¹Vim cov Edoos tsi pub cov Yixalayees hlaa puab lub tebchaws lug moog, cov Yixalayees txhaj ua sab tig rov qaab hab taug dlua lwm txujkev moog lawm.

²²Taagnrho cov Yixalayees sawv kev tawm huv Kades lug txug rua ntawm lub Roob Haules kws yog

²³ntawm nrimteb tebchaws Edoos. Nyob qhov ntawd tug TSWV has rua Mauxes hab Aloos has tas,

²⁴“Aloos yuav tsi tau moog nyob huv lub tebchaws kws kuv muab rua cov Yixalayees nyob; nwg yuav tuag ua ntej, rua qhov meb ob leeg tau ntxeev sab rua kuv tej lug saamfwm thaus nyob nraag Melinpas.

²⁵Koj ca le coj Aloos hab nwg tug tub Ele-axas moog rua sau Roob Haules.

²⁶Muab Aloos cov rig tsho ntev hle hab muab rua Ele-axas naav, rua qhov Aloos yuav tuag rua sau.”

²⁷Mauxes txawm ua le tug TSWV has. Puab txhaj nce moog rua sau Roob Haules taabmeeg cov pejxeem suavdlawg,

²⁸Mauxes muab Aloos cov tsho tseeb ntev hle rua Ele-axas naav. Aloos txhaj tuag rua sau lub roob ntawd, ces Mauxes hab Ele-axas obtug txawm nqeg rov lug.

²⁹Thaus cov pejxeem paub has tas Aloos tuag lawm, puab suavdlawg quaj nyav nwg tau peb caug nub.