Read Hmong Njua Teev Npe 22 Bible Online

Teev Npe 22 - Hmong Njua bible

Teev Npe 22

¹Cov Yixalayees tsuam yeej su rua huv lub taj nraag Mau-am ntawm tug Dlej Yauladees saab nubtuaj ncaaj lub nroog Yelikaus.

²Thaus Xinpaules tug tub Npalaj kws yog cov Mau-am tug vaajntxwv, nov tej kws cov Yixalayees tau ua rua cov Amaules hab cov Yixalayees muaj coob npaum le caag,

³txhaj ua rua nwg hab taagnrho nwg cov tuabneeg ntshai heev.

⁴Cov Mau-am has rua cov Midias tej thawjcoj has tas, “Tsi ntev nuav paab tuabneeg ntawd yuav ua rua txhua tsaav yaam kws nyob puagncig peb kuas puamtsuaj taag ib yaam le nyuj noj tej nyom huv tshaav zaub ntaag.” Yog le ntawd vaajntxwv Npalaj

⁵txhaj tso tuabneeg moog has rua Npe-aus tug tub Npala-aas huv lub nroog Npethaus kws nyob ze tug Dlej Efalates huv tebchaws Amavis. Puab coj Npalaj tej lug moog has rua nwg le nuav: “Kuv xaav kuas koj paub tsaav tuabneeg kws tsiv nraag tebchaws Iziv lug, puab sis faib moog nyob txhua nrho qhov txhua chaw lawm, nyob tsaam puab ca le lug txeeb peb lub tebchaws nyob hab.

⁶Cov tuabneeg ntawd muaj coob tshaaj peb lawm, koj ca le tuaj paab kuv foom tsi zoo rua puab. Tej zag peb yuav tua yeej puab hab lawv tau puab tawm huv lub tebchaws nuav moog. Kuv paub has tas thaus koj foom koob moov, cov tuabneeg yeej tau txais koob moov, hab thaus koj foom tsi zoo, puab yeej raug kev txomnyem.”

⁷Cov Mau-am hab cov Midias tej thawjcoj txawm muab nyaj tuaj them tej lug foom tsi zoo ntawd, hab moog cuag Npala-aas, puab pav Npalaj tej lug rua Npala-aas noog.

⁸Npala-aas has tas, “Mej ca le pw ib mos ntawm nuav tsaiv, pigkig kuv maam le qha rua mej paub tej kws tug TSWV has rua kuv.” Yog le ntawd, cov Mau-am tej thawjcoj txhaj nrug Npala-aas nyob tau ib mos.

⁹Vaajtswv lug nug Npala-aas has tas, “Cov tuabneeg kws tuaj su huv koj tsev, puab yog leejtwg?”

¹⁰Npala-aas teb has tas, “Vaajntxwv Npalaj kws kaav tebchaws Mau-am tso cov tuabneeg nuav tuaj qha rua kuv

¹¹txug cov tuabneeg kws lug nraag tebchaws Iziv lug. Puab tub moog nyob txhua qhov chaw huv tebchaws nuav lawm. Mas nwg xaav kuas kuv paab nwg foom tsi zoo rua puab, nwg txhaj muaj peevxwm tua yeej hab lawv tau puab tsiv tawm moog.”

¹²Vaajtswv has rua Npala-aas has tas, “Koj tsi xob nrug cov tuabneeg nuav moog, hab tsi xob foom tsi zoo rua cov Yixalayees ib lus le, rua qhov puab yog cov kws kuv tub foom koob moov rua lawm.”

¹³Taagkig sawv ntxuv Npala-aas txhaj moog cuag cov tuabneeg kws Npalaj khaiv tuaj hab has rua puab tas, “Mej ca le rov qaab moog tsev; rua qhov tug TSWV tsi pub kuv nrug mej moog.”

¹⁴Puab txawm rov lug cuag Npalaj hab pav qha rua nwg has tas, “Npala-aas tsi kaam nrug peb tuaj.”

¹⁵Ces Npalaj khaiv ntau tug thawjcoj kws muaj meejmom tshaaj cov kws xub moog lawm rov moog dlua.

¹⁶Puab moog cuag Npala-aas hab muab Npalaj tej lug has rua Npala-aas has tas: “Koj tsi xob yig, koj ca le tuaj lawv le kuv thov koj!

¹⁷Kuv yuav muab nqe zug rua koj kuas koj npluanuj hab kuv yuav ua txhua yaam lawv le koj has. Thov koj ca le tuaj paab kuv foom tsi zoo rua cov tuabneeg ntawd.”

¹⁸Tabsis Npala-aas teb has tas, “Txawm yog vaajntxwv Npalaj muab taagnrho tej nyaj hab kub huv nwg lub loog rua kuv los kuv yuav tsi kaam hlaa tug TSWV kws yog kuv tug Vaajtswv ib lu lug le.

¹⁹Mej ca le su ntawm nuav ib mos ib yaam le paab kws tuaj cuag kuv thawj zag, tog saib tug TSWV puas yuav muaj dlua lwm lu lug qha rua kuv.”

²⁰Mo ntawd Vaajtswv lug has rua Npala-aas has tas, “Yog cov tuabneeg nuav thov kuas koj nrug puab moog, koj ca le npaaj nrug puab moog, tabsis koj ncu ntsoov ua lawv le tej kws kuv has rua koj xwb.”

²¹Yog le ntawd, taagkig kaaj ntug Npala-aas txhaj tu nraa hab pem eeb rua sau tug neeg luav nrausqaum hab nrug cov Mau-am tej thawjcoj moog lawm.

²²Thaus kws Npala-aas sawv kev moog ntawd Vaajtswv chim heev, ces thaus Npala-aas taabtom caij nwg tug neeg luav taug kev moog, hab coj nwg ob tug tubkhai ua nwg luag moog, tug TSWV ib tug timtswv txawm lug sawv huv plawv kev thaiv Npala-aas kev.

²³Thaus tug neeg luav pum tug timtswv sawv nreg nreeg huv plawv kev hab tuav rawv ib raab ntaaj, tug neeg luav txawm lem loo tsiv moog rua nraag laj. Npala-aas nplawm tug neeg luav kuas rov lug taug kev.

²⁴Ces tug timtswv txawm moog sawv huv txujkev kws nyob ntawm lub vaaj txiv maab kws muaj ob dlaim txag zeb thaiv ob saab ntug kev.

²⁵Thaus tug neeg luav pum tug timtswv ntawd, tug neeg luav phoom yog moog tsoo tim dlaim txag zeb muab Npala-aas txhais kutaw nas kag rua ntawm dlaim txag zeb. Npala-aas txhaj rov nplawm tug neeg luav ib zag ntxiv.

²⁶Tug timtswv rov moog thaiv tom hauv ntej ib zag ntxiv; nwg moog sawv ntawm ntu kev kws ti heev tsi muaj kev zos moog rua saab twg le.

²⁷Zag nuav, thaus tug neeg luav pum tug timtswv, tug neeg luav txhaj txhus caug ndlua rua huv aav. Npala-aas npautawg heev hab nwg muab nwg tug paas nreg nplawm tug neeg luav.

²⁸Ces Tug TSWV txhaj ua rua tug neeg luav txawj has lug, tug neeg luav txhaj has rua Npala-aas has tas, “Kuv ua txhum koj dlaabtsi? Vim le caag koj txhaj ntaus kuv peb zag le nuav?”

²⁹Npala-aas teb has tas, “Rua qhov koj txhobtxwm ua limham rua kuv! Yog kuv muaj ntaaj, ces kuv tub muab koj tua povtseg lawm.”

³⁰Tug neeg luav teb has tas, “Kuv tsi yog tug neeg luav kws koj ibtxwm caij lug lawm los? Yaav taag lug kuv puas tau ua le nuav rua koj?” Npala-aas teb has tas, “Koj yeej tsi tau ua le nuav rua kuv ib zag le!”

³¹Taamsim ntawd tug TSWV ua rua Npala-aas pum tug timtswv tuav rawv ib raab ntaaj sawv ntawd, Npala-aas nyo ntshis pe ua nwg lub ntsejmuag ti nkaus huv aav.

³²Tug timtswv nug has tas, “Vim le caag koj txhaj ntaus koj tug neeg luav peb zag le nuav? Kuv lug nuav yog kuv lug thaiv koj kev ntaag, rua qhov koj tsi tsimnyog taug txujkev nuav moog.

³³Tabsis tug neeg luav pum kuv hab nwg lem zos kev peb zag. Yog nwg tsi ua le ntawd, kuv tub muab koj tua hab tso tug neeg luav moog lawm.”

³⁴Npala-aas has tas, “Kuv ua txhum lawm. Kuv tsi paub has tas, yog koj thaiv kuv kev tsi pub kuv moog; tabsis yog koj xaav has tas qhov kws kuv moog nuav txhum lawm, kuv yuav rov qaab moog tsev.”

³⁵Tug timtswv teb has tas, “Koj ca le nrug cov tuabneeg nuav moog, tabsis koj yuavtsum has tej lug kws kuv kuas koj has xwb.” Yog le ntawd, Npala-aas txhaj nrug puab moog lawm.

³⁶Thaus Npalaj nov has tas Npala-aas tuaj lawm, Npalaj txhaj moog tog Npala-aas peg lub nroog Ales kws nyob ntawm ntug Dlej Alenoos kws ze nrimteb Mau-am.

³⁷Npalaj nug Npala-aas has tas, “Ua caag thawj zag kws kuv tso tuabneeg tuaj hu koj, koj tsi kaam tuaj? Koj xaav has tas nyob tsaam kuv tsi muab nqe zug txaus rua koj nua los?”

³⁸Npala-aas teb has tas, “Kuv tub tuaj txug lawm ne? Tabsis taamsim nuav, kuv muaj fwjchim ua tau dlaabtsi? Kuv tsuas muaj cuabkaav has tau le Vaajtswv kuas kuv has xwb.”

³⁹Npala-aas nrug Npalaj moog tom lub nroog Huxaus,

⁴⁰Npalaj muab nyuj muab yaaj lug tua hab muab nqaj rua Npala-aas hab cov numtswv kws nrug nwg nyob ua ke ntawd noj.

⁴¹Taagkig sawv ntxuv Npalaj coj Npala-aas moog rua peg Npamaus Npa-aas, thaus obtug moog txug peg, Npala-aas pum cov Yixalayees ibtxha.