Read Hmong Njua Teev Npe 23 Bible Online

Teev Npe 23 - Hmong Njua bible

Teev Npe 23

¹Npala-aas has tas, “Koj ca le teeb xyaa lub thaaj rua kuv, hab muab xyaa tug txiv nyuj hab xyaa tug laug yaaj rua kuv.”

²Npalaj ua lawv le Npala-aas has, ib lub thaaj twg tua ib tug nyuj hab ib tug laug yaaj hlawv fij rua sau.

³Ces Npala-aas has rua Npalaj has tas, “Thaus kuv moog saib, saib tug TSWV lug has dlaabtsi rua kuv lossis tsi has, koj ca le moog sawv ntawm qhov chaw kws hlawv koj tej khoom fij. Txhua yaam kws tug TSWV has rua kuv, kuv yuav qha rua koj.” Yog le ntawd, Npala-aas txhaj nce moog rua sau ib lub ncov roob,

⁴hab Vaajtswv lug cuag Npala-aas. Npala-aas has rua Vaajtswv has tas, “Kuv teeb xyaa lub thaaj hab tua nyuj tua yaaj fij tso rua sau xyaa lub thaaj ntawd ib lub ib tug nyuj hab ib tug yaaj.”

⁵Tug TSWV qha tej lug kws yuav has rua Npala-aas hab kuas nwg coj tej lug ntawd rov lug has rua Npalaj.

⁶Npala-aas rov lug, nwg lug pum Npalaj hab cov Mau-am tej thawjcoj sawv ntawm qhov chaw kws hlawv tej khoom fij ntawd.

⁷Ces Npala-aas cevlug has tas, “Cov Mau-am tug vaajntxwv Npalaj tog kuv peg tebchaws Xilias kws nyob peg cov roob saab nubtuaj tuaj. Nwg has tas, ‘Koj tuaj paab kuv foom tsi zoo rua Yakhauj kws yog Yixalayees.’

⁸Kuv yuav ua le caag foom tsi zoo rua cov tuabneeg kws Vaajtswv tsi foom phem rua puab lossis kuv yuav ua le caag thuam cov tuabneeg kws tug TSWV tsi thuam!

⁹Kuv sawv sau hauv tsua kws sab xyuam yaaj lug kuv saib moog pum puab; kuv nyob sau ncov roob kuv saib ntsoov puab. Puab yog ib tsaav tuabneeg kws nyob ib caag; puab tsi suav has tas puab nrug lwm tsaav tuabneeg koom ua ib paab.

¹⁰Yixalayees cov xeebntxwv coob heev suav tsi txheeb le tej moov aav, coob kawg le tsi muaj leejtwg yuav suav txheeb. Thov kuas thaus taag kuv simneej kuv zoo le Vaajtswv tsaav tuabneeg ib tug; Thov ca kuv tuag thaajyeeb lug le tej tuabneeg ncaaj nceeg tuag.”

¹¹Npalaj has rua Npala-aas has tas, “Ua caag koj ua le ko rua kuv? Kuv coj koj tuaj, yog kuas koj tuaj foom tsi zoo rua kuv cov yeebncuab, tabsis koj tsua foom koob moov rua puab!”

¹²Npala-aas teb has tas, “Kuv tsuas muaj cuabkaav has tau tej lug kws tug TSWV qheb kuv lub qhovncauj has xwb.”

¹³Tom qaab ntawd Npalaj rov has dlua rua Npala-aas has tas, “Koj ca le nrug kuv moog rua lwm qhov chaw koj yuav pum cov Yixalayees ibtxha hab. Koj ca le foom tsi zoo rua puab.”

¹⁴Npalaj coj Npala-aas moog rua peg Xaufees thaaj teb kws nyob sau Roob Pinkas. Thaus moog txug sau, Npalaj teeb tau xyaa lub thaaj hab ib lub thaaj twg tua ib tug txiv nyuj hab ib tug laug yaaj hlawv fij rua sau.

¹⁵Npala-aas has rua Npalaj has tas, “Koj ca le moog sawv ntawm koj tej khoom fij kws hlawv ntawd, kuv yuav moog cuag Vaajtswv lawm tid.”

¹⁶Tug TSWV lug cuag Npala-aas hab qha tej lug kws yuav has rua Npala-aas kuas coj rov lug has rua Npalaj.

¹⁷Npala-aas rov lug pum Npalaj tseem sawv nrug cov Mau-am tej thawjcoj ntawm qhov chaw kws hlawv nwg cov khoom fij ntawd. Npalaj nug saib tug TSWV has le caag,

¹⁸Npala-aas cevlug has tas: “Xipaules tug tub Npalaj, koj ca le lug ntawm nuav hab noog tej lug kws kuv has,

¹⁹Vaajtswv tsi zoo le tej tuabneeg kws pheej has lug dlaag. Nwg tsi yog tug kws pheej yuav hloov sab. Nwg coglug le caag, nwg yeej ua le ntawd; nwg has le caag, yeej muaj le nwg has.

²⁰Vaajtswv tsaa kuv ua tug foom koob moov hab thaus Vaajtswv foom koob moov rua leejtwg lawm, kuv tsi muaj cuabkaav thim tej lug ntawd rov qaab.

²¹Kuv tub pum ua ntej lawm has tas cov Yixalayees lub neej yaav tom ntej yuav tsi raug kev txomnyem ib zag le. Tug TSWV kws yog puab tug Vaajtswv nrug nraim puab; Hab puab has nrov nrov tas nwg yog puab tug vaajntxwv.

²²Vaajtswv coj puab nraag tebchaws Iziv lug; Nwg paab puab ntaus rog ib yaam le tug phaws nyuj qus.

²³Tej tuabneeg kws txawj ua yeegsiv hab txawj ua khawvkoob, tsi muaj cuabkaav tawmtsaam tsaav tuabneeg Yixalayees. Nwgnuav tej tuabneeg yuav has txug cov Yixalayees has tas, ‘Ca le saib tej kws tug TSWV ua rua cov Yixalayees!’

²⁴Tsaav tuabneeg Yixalayees zoo ib yaam le tug tsuv ntxhuav kws muaj zug heev: nwg yeej tsi su moog txug thaus nwg muab tej kws nwg tum tau haus ntshaav taag. Hab nwg yeej tsi pw moog txug thaus kws nwg muab noj taag.”

²⁵Ces Npalaj has rua Npala-aas has tas, “Yog koj tsi kaam foom tsi zoo rua cov Yixalayees, mas koj tsi xob foom koob moov rua puab hab.”

²⁶Npala-aas teb has tas, “Kuv tsi tau qha rua koj has tas, kuv tsuas ua tau tej kws tug TSWV kuas kuv ua xwb nua los?”

²⁷Npalaj has tas, “Koj ca le nrug kuv moog, kuv yuav coj koj moog rua lwm qhov chaw. Tej zag Vaajtswv yuav ca koj foom tsi zoo rua puab.”

²⁸Npalaj coj Npala-aas moog rua sau lub ncov Roob Pe-aus kws saib ntsoov pum rua tim taj suabpuam.

²⁹Npala-aas has rua Npalaj has tas, “Koj ca le teeb xyaa lub thaaj rua kuv hab muab xyaa tug txiv nyuj hab xyaa tug laug yaaj rua kuv.”

³⁰Npalaj ua lawv le Npala-aas has, ib lub thaaj twg tua ib tug txiv nyuj hab ib tug laug yaaj hlawv fij rua sau.