Read Hmong Njua Teev Npe 25 Bible Online

Teev Npe 25 - Hmong Njua bible

Teev Npe 25

¹Thaus cov Yixalayees tseem nyob ntawm lub Haav Akaxias, cov txivneej txawm moog ntxag cov Mau-am kws ibtxwm nyob ntawd tej ntxhais.

²Cov quaspuj ntawd, caw cov txivneej nuav nrug puab moog ua kevcai fij khoom ntawm qhov chaw kws pe cov Mau-am tej vaajtswv. Cov Yixalayees moog noj tej zaub mov ntawd hab pe cov Mau-am tej vaajtswv

³kws yog Pe-aus tug mlom Npa-aas. Yog le ntawd, tug TSWV txhaj chim heev rua cov Yixalayees

⁴hab tug TSWV has rua Mauxes has tas, “Coj taagnrho cov Yixalayees tej thawjcoj moog khi dlai zab tshaav ntuj taabmeeg tug TSWV, ces kuv txhaj yuav tsi chim rua cov pejxeem.”

⁵Mauxes txhaj has rua cov numtswv has tas, “Mej ca le muab txhua tug tuabneeg huv mej xeem kws moog pe Npa-aas sau roob Pe-aus tua povtseg.”

⁶Muaj ib tug txivneej Yixalayees coj tau cov Midias ib tug ntxhais lug huv nwg tsev taabmeeg Mauxes hab cov pejxeem, thaus puab tseem taabtom quaj nyav ntsoog qeeg ntawm tug TSWV lub Tsevntaub sis ntsib lub qhovrooj.

⁷Thaus Ele-axas tug tub Finehas kws yog Aloos tug xeebntxwv pum le ntawd, nwg sawv tseeg tso plhuav pawg tuabneeg ntawd tseg. Nwg moog nqaa tau ib raab muv

⁸lawv tug txivneej hab tug quaspuj ntawd qaab moog rua huv lub tsevntaub, nwg muab muv nkaug obtug tshaab plawg tuag kag rua ntawd. Yog le ntawd, tej vijsub vijsw kws taabtom raug cov Yixalayees txhaj tseg kag taamsim ntawd,

⁹tabsis cov tuabneeg kws raug tua tuag tub muaj neeg nkaum plaub txheeb leej lawm.

¹⁰Tug TSWV has rua Mauxes has tas,

¹¹“Vim Ele-axas tug tub Finehas kws yog Aloos tug xeebntxwv tau ua tej nuav tav, kuv txhaj tsi chim rua cov Yixalayees lawm. Vim nwg khib le kuv kws yog nwg tug Vaajtswv khib, kuv txujkev chim txhaj tsi ua rua puab raug puamtsuaj.

¹²Koj ca le moog qha rua nwg has tas, kuv yuav coglug tseg rua nwg moog taag nwg simneej le.

¹³Mas nwg hab nwg cov xeebntxwv yuav tau ua cov povthawj moog ibtxhis lawv le kuv tau coglug tseg lawm, vim nwg nrug nwg tug Vaajtswv khib, hab nwg tau ua kuas muaj kev theej txhoj lug rua tsaav tuabneeg Yixalayees.”

¹⁴Tug txivneej Yixalayees kws raug tua tuag nrug tug quaspuj Midias ntawd hu ua Xeelis, nwg yog Xalus tug tub kws yog xeem Xime-oos tug thawjcoj ntaag.

¹⁵Tug quaspuj ntawd hu ua Kauxenpis. Nwg yog Xules kws yog cov Midias tug thawjcoj tug ntxhais.

¹⁶Ces tug TSWV has rua Mauxes has tas,

¹⁷“Ca le moog ua rog rua cov Midias hab tua kuas puab puamtsuaj taag,

¹⁸vim tej kev phem kev qas kws puab ua rua mej thaus puab dlaag ntxag mej ntawm Pe-aus, hab vim Kauxenpis tug kws raug tua tuag rua lub sijhawm kws taabtom muaj tej vijsub vijsw nyob ntawm Pe-aus.”