Read Hmong Njua Teev Npe 28 Bible Online

Teev Npe 28 - Hmong Njua bible

Teev Npe 28

¹Tug TSWV has rua Mauxes has tas,

²Koj ca le qha rua cov Yixalayees kuas puab yuavtsum coj tej khoom tsw qaab kws txaus kuv sab tuaj hlawv fij rua kuv lawv le tau teem tseg lawm.

³Hab koj has rua puab tas, ntawm nuav yog tej khoom kws coj tuaj fij rua tug TSWV: cov kws muab hlawv fij txhua nub yog ob tug thaav yaaj noobnyoog ib xyoos kws tsi muaj ib qhov phem le.

⁴Muab ib tug fij rua thaus sawv ntxuv hab muab ib tug fij rua thaus yuav tsaus ntuj,

⁵ib tug thaav yaaj twg muab ob choj moov nplej ntse xyaw ob khob roj txiv ntoo moog fij nrug.

⁶Nuav yog txuj kevcai kws naj nub muab khoom hlawv fij, kuas tsw qaab ntxag txaus tug TSWV sab, lawv le txeev ua tom roob Xinais lawm.

⁷Cov cawv txiv maab kws coj moog fij nrug tug mivnyuas yaaj, thaus sawv ntxuv, mas muab ob khob laub rua huv chaav pehawm tug TSWV.

⁸Tug kws fij thaus yuav tsaus ntuj los muab cov cawv txiv maab fij nrug ib yaam le tug kws fij thaus sawv ntxuv. Tej nuav yog khoom hlawv fij kuas tsw qaab ntxag txaus tug TSWV sab.

⁹Nub Xanpataus, mas muab ob tug thaav yaaj noobnyoog ib xyoos kws tsi muaj ib qhov phem le, hab plaub choj moov nplej ntse xyaw roj txiv ntoo coj moog ua zaub mov fij, hab muab cawv txiv maab moog fij nrug.

¹⁰Cov khoom kws hlawv fij nuav yuavtsum coj moog fij txhua nub Xanpataus hab ntxiv rua cov khoom fij kws naj nub hlawv fij nrug cov cawv txiv maab.

¹¹Txhua lub hlis nub xab ib, hlawv khoom fij rua tug TSWV le nuav: ob tug ntsuag nyuj, ib tug laug yaaj, xyaa tug thaav yaaj noobnyoog ib xyoos, txhua tug tsaj nuav yog cov kws tsi muaj ib qhov phem le.

¹²Tej qoobloo kws coj moog ua khoom fij, muab tej moov nplej ntse xyaw roj txiv ntoo coj moog fij le nuav: ib tug nyuj twg muab rau choj moov nplej; ib tug laug yaaj twg muab plaub choj moov nplej;

¹³hab ib tug thaav yaaj twg muab ob choj moov nplej moog fij nrug. Tej khoom nuav coj moog hlawv fij kuas tsw qaab ntxag txaus tug TSWV sab.

¹⁴Ib tug nyuj twg muab plaub khob cawv txiv maab fij nrug ib tug laug yaaj muab peb khob cawv txiv maab fij nrug, hab ib tug thaav yaaj twg muab ob khob cawv txiv maab moog fij nrug. Tej nuav yog txuj kevcai kws hlawv khoom fij rua txhua lub hlis nub xab ib moog kuas taag xyoo.

¹⁵Hab muab ib tug laug tshis tua fij dlaws txim, ntxiv rua tej khoom kws naj nub coj moog hlawv fij nrug tej cawv txiv maab kws coj moog fij ntawd.

¹⁶Ua Kevcai Hlaa Dlhau qhuas tug TSWV thaus lub ib hlis ntuj nub kaum plaub.

¹⁷Nub kaum tsib yog nub pib ua Kevcai Hlaa Dlhau kws yog ua kuas txwm nkaus xyaa nub, thaus lub sijhawm ntawd, mas noj cov ncuav tsi xyaw keeb nkaus xwb.

¹⁸Thawj nub kws pib ua kevcai yog nub mej sis sau tuaj pehawm, hab tsi xob ua ib yaam num dlaabtsi le.

¹⁹Mej muab khoom hlawv fij rua tug TSWV lawv le nuav: ob tug ntsuag nyuj, ib tug laug yaaj, hab xyaa tug thaav yaaj kws noobnyoog ib xyoos, txhua tug tsaj nuav yog cov kws tsi muaj ib qhov phem le.

²⁰Muab tej moov nplej ntse xyaw roj txiv ntoo le nuav coj moog ua khoom fij: ib tug nyuj twg muab rau choj moov nplej, fij nrug ib tug laug yaaj muab plaub choj moov nplej fij nrug,

²¹hab ib tug thaav yaaj twg muab ob choj moov nplej moog fij nrug.

²²Hab muab dlua ib tug laug tshis moog tua fij dlaws txim, hab ca le ua kevcai ntxuav rua cov pejxeem.

²³Tej khoom fij nuav, yog muab ntxiv rua tej khoom fij kws mej naj taagkig coj moog hlawv fij rua tug TSWV.

²⁴Ib yaam nkaus le ntawd, xyaa nub kws mej fij tej zaub mov ntawd rua tug TSWV, ua kuas tsw qaab ntxag rua tug TSWV. Tej khoom nuav yog fij ntxiv rua tej khoom kws mej naj nub hlawv fij hab tej cawv txiv maab kws yog khoom fij.

²⁵Nub xyaa mej yuavtsum rov tuaj sis sau pehawm Vaajtswv hab tsi xob ua ib yaam num dlaabtsi le.

²⁶Thawj nub kws ua Kevcai Sau Qoobloo, yog thaus mej coj tej qoob tshab tuaj fij rua tug TSWV, mej tuaj sis sau ua ke pehawm Vaajtswv, hab nub ntawd tsi xob ua ib yaam num dlaabtsi le.

²⁷Muab khoom moog hlawv fij kuas tsw qaab ntxag rua tug TSWV le nuav: ob tug ntsuag nyuj, ib tug laug yaaj hab xyaa tug thaav yaaj noobnyoog ib xyoos, txhua tug tsaj nuav yog cov kws tsi muaj ib qhov phem le.

²⁸Muab cov moov nplej ntse xyaw roj txiv ntoo coj moog fij: ib tug txiv nyuj twg muab rau choj moov nplej, ib tug laug yaaj muab plaub choj moov nplej,

²⁹hab ib tug thaav yaaj twg muab ob choj moov nplej moog fij nrug.

³⁰Hab muab dlua ib tug laug tshis moog tua fij dlaws txim, hab ua kevcai ntxuav rua cov pejxeem.

³¹Fij tej khoom hab tej cawv txiv maab nuav ntxiv rua tej khoom kws naj nub hlawv fij, hab tej qoobloo kws yog khoom fij. Tej tsaj kws muab fij ntawd yog cov kws tsi muaj ib qhov phem le.