Read Hmong Njua Teev Npe 29 Bible Online

Teev Npe 29 - Hmong Njua bible

Teev Npe 29

¹Thaus nub xab ib lub xyaa hli ntuj mej ca le tuaj sis sau pehawm Vaajtswv, hab tsi xob ua ib yaam num dlaabtsi le. Nub ntawd yog nub kws tshuab raaj tshuab xyu.

²Mej muab khoom coj moog hlawv fij rua tug TSWV, kuas tsw qaab ntxag rua nwg: ib tug ntsuag nyuj, ib tug laug yaaj, hab xyaa tug thaav yaaj noobnyoog ib xyoos, txhua tug tsaj nuav yog cov kws tsi muaj ib qhov phem le.

³Muab moov nplej ntse xyaw roj txiv ntoo coj moog fij: ib tug ntsuag nyuj muab rau choj moov nplej fij, ib tug laug yaaj muab plaub choj moov nplej

⁴hab ib tug thaav yaaj twg muab ob choj moov nplej moog fij nrug.

⁵Hab muab dlua ib tug laug tshis moog tua fij dlaws txim hab ua kevcai ntxuav rua cov pejxeem.

⁶Cov khoom nuav coj moog fij ntxiv rua cov khoom kws naj nub fij thaus nub xab ib nrug puab tej qoobloo hab cov cawv txiv maab kws coj moog hlawv fij. Muab tej khoom nuav hlawv fij kuas tsw qaab ntxag txaus tug TSWV sab.

⁷Lub xyaa hli ntuj nub xab kaug, mej ca le tuaj sis sau pehawm Vaajtswv; tsi xob noj zaub noj mov hab tsi xob ua ib yaam num dlaabtsi hlo le.

⁸Muab ib tug ntsuag nyuj, ib tug laug yaaj, hab xyaa tug thaav yaaj noobnyoog ib xyoos kws tsi muaj ib qhov phem le tuaj tua hlawv fij rua tug TSWV, hab ua kuas tej ntawd tsw qaab ntxag txaus tug TSWV sab.

⁹Muab moov nplej ntse xyaw roj txiv ntoo coj moog fij: ib tug nyuj muab rau choj moov nplej, ib tug laug yaaj muab plaub choj moov nplej,

¹⁰hab ib tug thaav yaaj twg muab ob choj moov nplej moog fij nrug.

¹¹Hab muab dlua ib tug laug tshis moog tua fij dlaws txim, ntxiv rua tug tshis kws tua fij ua kevcai ntxuav rua cov pejxeem, hab tej khoom fij kws naj nub hlawv fij nrug tej qoobloo, hab puab tej cawv txiv maab kws coj moog fij.

¹²Lub xyaa hli ntuj nub kaum tsib mej ca le sis sau tuaj ua ke pehawm Vaajtswv. Ua kevcai qhuas tug TSWV kuas txwm xyaa nub hab tsi xob ua ib yaam num dlaabtsi le.

¹³Nub ib muab tej khoom moog hlawv fij rua tug TSWV, kuas tsw qaab ntxag txaus nwg sab: kaum peb tug ntsuag nyuj, ob tug laug yaaj, hab kaum plaub tug thaav yaaj noobnyoog ib xyoos, txhua tug tsaj nuav yog cov kws tsi muaj ib qhov phem le.

¹⁴Muab moov nplej ntse xyaw roj txiv ntoo coj moog fij: ib tug nyuj muab rau choj moov nplej, ib tug laug yaaj twg muab plaub choj moov nplej,

¹⁵hab kaum ob tug thaav yaaj ntawd ib tug twg muab ob choj moov nplej hab muab cov cawv txiv maab moog fij nrug.

¹⁶Hab muab dlua ib tug laug tshis moog tua fij dlaws txim, ntxiv rua tej khoom fij kws naj nub coj moog hlawv fij nrug tej qoobloo hab tej cawv txiv maab.

¹⁷Nub ob fij kaum ob tug ntsuag nyuj, ob tug laug yaaj, hab kaum plaub tug thaav yaaj noobnyoog ib xyoos, txhua tug tsaj nuav yog cov kws tsi muaj ib qhov phem le.

¹⁸Cov nyuj, cov laug yaaj hab cov thaav yaaj, muab moov nplej coj moog fij nrug lawv le cov kws fij thawj nub.

¹⁹Hab muab dlua ib tug laug tshis moog tua fij dlaws txim, ntxiv rua tej khoom fij kws naj nub coj moog hlawv fij nrug tej qoobloo hab puab tej cawv txiv maab.

²⁰Nub peb fij kaum ib tug ntsuag nyuj, ob tug laug yaaj, hab kaum plaub tug thaav yaaj noobnyoog ib xyoos, txhua tug tsaj nuav yog cov kws tsi muaj ib qhov phem le.

²¹Cov nyuj, cov laug yaaj hab cov thaav yaaj muab moov nplej coj moog fij nrug lawv le cov kws fij thawj nub.

²²Hab muab ib tug laug tshis moog tua fij dlaws txim, ntxiv rua tej khoom fij kws naj nub coj moog hlawv fij nrug tej qoobloo hab puab tej cawv txiv maab.

²³Nub plaub fij kaum tug ntsuag nyuj, ob tug laug yaaj hab kaum plaub tug thaav yaaj noobnyoog ib xyoos, txhua tug tsaj nuav yog cov kws tsi muaj ib qhov phem le.

²⁴Cov nyuj, cov laug yaaj hab cov thaav yaaj, muab moov nplej coj moog fij nrug lawv le cov kws fij thawj nub.

²⁵Hab muab dlua ib tug laug tshis moog tua fij dlaws txim, ntxiv rua tej khoom fij kws naj nub coj moog hlawv fij nrug tej qoobloo hab puab tej cawv txiv maab.

²⁶Nub tsib fij cuaj tug ntsuag nyuj, ob tug laug yaaj, hab kaum plaub tug thaav yaaj noobnyoog ib xyoos, txhua tug tsaj nuav yog cov kws tsi muaj ib qhov phem le.

²⁷Cov nyuj, cov laug yaaj hab cov thaav yaaj, muab moov nplej coj moog fij nrug lawv le cov kws fij thawj nub.

²⁸Hab muab dlua ib tug laug tshis moog tua fij dlaws txim, ntxiv rua tej khoom fij kws naj nub coj moog hlawv fij nrug tej qoobloo, hab puab tej cawv txiv maab.

²⁹Nub rau fij yim tug ntsuag nyuj, ob tug laug yaaj, hab kaum plaub tug thaav yaaj noobnyoog ib xyoos, txhua tug tsaj nuav yog cov kws tsi muaj ib qhov phem le.

³⁰Cov nyuj, cov laug yaaj, hab cov thaav yaaj, muab moov nplej coj moog fij nrug lawv le cov kws fij thawj nub.

³¹Hab muab dlua ib tug laug tshis moog tua fij dlaws txim, ntxiv rua tej khoom fij kws naj nub coj moog hlawv fij nrug tej qoobloo, hab puab tej cawv txiv maab.

³²Nub xyaa fij xyaa tug ntsuag nyuj, ob tug laug yaaj, hab kaum plaub tug thaav yaaj noobnyoog ib xyoos, txhua tug tsaj nuav yog cov kws tsi muaj ib qhov phem le.

³³Cov nyuj, cov laug yaaj, hab cov thaav yaaj, muab moov nplej coj moog fij nrug lawv le cov kws fij thawj nub.

³⁴Hab muab dlua ib tug laug tshis moog tua fij dlaws txim, ntxiv rua tej khoom fij kws naj nub coj moog hlawv fij nrug tej qoobloo, hab puab tej cawv txiv maab.

³⁵Nub yim ca le rov tuaj sis sau ua ke pehawm Vaajtswv, hab tsi xob ua ib yaam num dlaabtsi le.

³⁶Muab tej khoom coj moog hlawv fij rua tug TSWV, ua kuas tsw qaab ntxag txaus nwg sab: muab ib tug ntsuag nyuj, ib tug laug yaaj, hab xyaa tug thaav yaaj noobnyoog ib xyoos kws tsi muaj ib qhov phem le.

³⁷Tug ntsuag nyuj, tug laug yaaj, hab cov thaav yaaj, muab moov nplej coj moog fij nrug lawv le cov kws fij thawj nub.

³⁸Hab muab dlua ib tug laug tshis moog tua fij dlaws txim, ntxiv rua tej khoom fij kws naj nub coj moog hlawv fij nrug tej qoobloo, hab puab tej cawv txiv maab.

³⁹Ntawm nuav yog txuj kevcai kws has txug tej khoom kws muab hlawv fij rua tug TSWV, tej qoobloo, tej cawv txiv maab, hab fij tej khoom ua kev sis raug zoo rua tug TSWV lawv le lub sijhawm kws mej teem tseg rua thaus ua kevcai. Tej khoom nuav yog muab fij ntxiv rua mej tej khoom fij ua tsaug kws mej tau coglug tseg lawm lossis tej khoom kws mej txaus sab fij.

⁴⁰Yog le Ntawd, Mauxes txhaj qha txhua yaam kws tug TSWV tau saamfwm rua nwg lawm rua cov Yixalayees.