Read Hmong Njua Teev Npe 3 Bible Online

Teev Npe 3 - Hmong Njua bible

Teev Npe 3

¹Ntawm nuav yog Aloos hab Mauxes obtug tsev tuabneeg, thaus lub sijhawm kws tug TSWV has rua Mauxes sau Roob Xinais.

²Aloos muaj plaub tug tub: Nadas yog tug tub hlub, Anpihus, Ele-axas hab Ithamas.

³Puavleej muab puab txhawb meejthawj ua povthawj,

⁴tabsis Nadas hab Anpihus obtug raug tua tuag thaus kws tug TSWV tsi tau has kuas obtug rauv tawg hlawv khoom fij rua tug TSWV tom taj suabpuam Xinais. Obtug tsi tau muaj mivnyuas, yog le ntawd, Ele-axas hab Ithamas txhaj tau ua ob tug povthawj rua Aloos pum taag Aloos tam neej.

⁵Tug TSWV has rua Mauxes has tas,

⁶“Coj xeem Levis txaav lug rua tom hauv ntej nuav hab tsaa puab ua Aloos kws yog tug povthawj cov tubkhai.

⁷Puab yuav ua tej num huv tug TSWV lub Tsevntaub sis ntsib hab ua cov povthawj lub luag num hab ua num rua cov pejxeem suavdlawg.

⁸Puab ua cov saib taagnrho tej khoom siv huv tug TSWV lub Tsevntaub sis ntsib hab ua num rua cov Yixalayees.

⁹Hab koj yuavtsum muab cov Levis cob rua Aloos hab nwg cov tub; puab yog cov kws xaiv ntawm cov Yixalayees lug muab rua Aloos taagnrho.

¹⁰Koj yuavtsum tsaa Aloos hab nwg cov tub ua cov povthawj tuav lub luag num; yog leejtwg xaav txeeb ua, ca le muab tug ntawd tua kuas tuag.”

¹¹Tug TSWV has rua Mauxes has tas,

¹²“Kuv xaiv cov Levis tawm ntawm cov Yixalayees lug hloov taagnrho cov Yixalayees cov tub hlub chaw. Cov Levis yeej yog kuv tug,

¹³rua qhov txhua tug tub hlub puavleej yog kuv tug. Thaus kuv tua cov Iziv tej tub hlub, kuv yeej tshwj taagnrho cov Yixalayees tej tub hlub ua kuv tug, tsi has tuabneeg lossis tsaj txhu. Puab puavleej yog kuv tug. Kuv yog tug TSWV.”

¹⁴Tug TSWV saamfwm rua Mauxes tom taj suabpuam Xinais has tas,

¹⁵“Koj yuavtsum sau cov Levis npe lawv le puab tej caajceg hab tej tsev tuabneeg, txhua tug txivneej kws noobnyoog ib hlis rov sau yuavtsum sau npe huv tuabsi,.”

¹⁶Ces Mauxes txawm ua lawv le tug TSWV tau has tseg.

¹⁷Levis muaj peb tug tub hu ua: Nkesoos, Kauhas hab Melalis, puab yog yawmkoob rua puab xeem hab puab caajceg.

¹⁸Nkesoos muaj ob tug tub hu ua: Linpenis hab Sime-is;

¹⁹Kauhas muaj plaub tug tub hu ua: Alamas, Ixahas, Henploos hab Uxiyees;

²⁰hab Melalis muaj ob tug tub hu ua: Mahalis hab Musis. Puab cov nuav yog Levis caajceg, lawv le puab cov yawmkoob.

²¹Linpenis hab Sime-is cuab kwvtij nuav yog caajceg ntawm Nkesoos tsev tuabneeg.

²²Suav taagnrho cov txivneej kws noobnyoog ib hlis rov sau muaj xyaa txheeb tsib puas leej.

²³Cuab kwvtij nuav puab tsaa tsevntaub nyob rua tom qaab lub Tsevntaub sis ntsib saab nubpoob,

²⁴Tug thawj kws coj Nkesoos caajceg yog Layees tug tub Eli-axas.

²⁵Puab lub luag num yog ua cov tu tug TSWV lub Tsevntaub sis ntsib, cov ntaub vuv saab huv, cov ntaub vuv saab nrau, cov ntaub thaiv qhovrooj,

²⁶cov ntaub xov vaaj ncig lub Tsevntaub, lub tshaav puam, lub thaaj, hab dlaim ntaub roojvaag kws xov saab nrau lub tshaav puam. Puab ua cov saib taagnrho tej hlua hab txhua yaam ntawd huv tuabsi.

²⁷Alamas, Ixahas, Henploos hab Uxiyees puab cuab kwvtij nuav yog Kauhas caajceg.

²⁸Suav taagnrho cov txivneej kws noobnyoog ib hlis rov sau, muaj yim txheeb rau pua leej.

²⁹Cuab kwvtij nuav puab tsaa tsevntaub txuas nkaus ntawm lub Tsevntaub sis ntsib saab nraag,

³⁰tug thawj kws coj Kauhas caajceg, yog Uxiyees tug tub Elixafas.

³¹Puab lub luag num yog tu lub Phijxaab kws ntim Vaajtswv tej lug cog tseg, lub rooj, tug ncej txawb teeb, cov thaaj, tej khoom kws cov povthawj siv nyob huv Chaav Dlawbhuv, dlaim ntaub thaiv lub qhovrooj kws moog rua huv Chaav Dlawbhuv Kawg Nkaus, hab puab ua cov kws tu txhua yaam khoom siv rua tej ntawd.

³²Tug thawjcoj cov Levis yog tug povthawj Aloos tug tub Eli-axas. Nwg ua tug saib cov tuabneeg kws ua num huv Chaav Dlawbhuv.

³³Mahalis hab Musis obtug cuab kwvtij yog Melalis caajceg.

³⁴Suav taagnrho cov txivneej kws noobnyoog ib hlis rov sau muaj rau txheeb ob puas leej.

³⁵Puab cuab kwvtij nuav tsaa tsevntaub nyob rua ntawm lub Tsevntaub sis ntsib saab peg, cuab kwvtij nuav tug thawjcoj yog Anpihais tug tub Xuliyees.

³⁶Puab lub luag num yog ua cov saib tug laajkaab kws xov ncig lub Tsevntaub sis ntsib, tej nqaaj laajkaab, tej ncej laajkaab, tej tag taw laajkaab, hab txhua yaam khoom kws siv rua tej ntawd.

³⁷Dlua le ntawd puab tseem ua cov saib tej ncej, tej faab, tej ntsa hab tej hlua kws xov ncig lub tshaav puam huv tuabsi.

³⁸Mauxes, Aloos hab Aloos cov tub tsaa puab tej tsevntaub nyob rua ntawm tug TSWV lub Tsevntaub saab nubtuaj. Puab lub luag num yog ua cov sawv cev ntawm cov pejxeem Yixalayees nyob huv Chaav Dlawbhuv. Yog muaj leejtwg laam moog ua teg num ntawd yuav raug tua tuag.

³⁹Mauxes suav cov txivneej Levis kws noobnyoog ib hlis rov sau lawv le tug TSWV tau saamfwm rua nwg lawm, muaj neeg nkaum ob txheeb leej.

⁴⁰Tug TSWV has rua Mauxes has tas, “Suav taagnrho cov Yixalayees tej tub hlub kws noobnyoog ib hlis rov sau hab sau puab tej npe kuas taag huv tuabsi.

⁴¹Muab taagnrho cov Levis rua kuv hloov cov Yixalayees tej tub hlub chaw, hab cov Levis tej tsaj txhu hloov cov Yixalayees tej tsaj txhu thawj tug mivnyuas kws yog tug txiv chaw.”

⁴²Yog le ntawd, Mauxes txhaj sau taagnrho cov Yixalayees tej tub hlub npe, lawv le tug TSWV tau saamfwm rua nwg lawm.

⁴³Hab txhua tug tub hlub kws noobnyoog ib hlis rov sau, sau tau npe taagnrho muaj neeg nkaum ob txheeb ob puas xyaa caum peb leeg.

⁴⁴Tug TSWV has rua Mauxes has tas,

⁴⁵“Nwgnuav ca le muab cov Levis fij rua kuv hloov taagnrho cov Yixalayees tej tub hlub chaw, hab muab cov Levis tej tsaj txhu fij rua kuv hloov cov Yixalayees tej tsaj txhu chaw.

⁴⁶Vim cov Yixalayees cov tub hlub coob tshaaj cov Levis ob puas xyaa caum peb leeg lawm, mas mej yuavtsum txhwv cov tshaaj ntawd rov qaab.

⁴⁷Ib tug tub twg yuavtsum yog tsib choj nyaj, lawv le numtswv kevcai,

⁴⁸hab muab cov nyaj nuav rua Aloos hab nwg cov tub.”

⁴⁹Yog le ntawd, Mauxes txhaj khaws cov nyaj kws cov Yixalayees coj tuaj txhwv puab cov tub hlub kws cov Levis hloov tsi taag ntawd ca.

⁵⁰Nwg khaws cov nyaj kws cov Yixalayees coj tuaj txhwv puab cov tub hlub tau ib txheeb peb puas rau caum tsib choj, lawv le numtswv kevcai.

⁵¹Mauxes txhaj muab cov nyaj nuav coj moog rua Aloos hab nwg cov tub, lawv le tug TSWV tau saamfwm rua Mauxes lawm.