Read Hmong Njua Teev Npe 30 Bible Online

Teev Npe 30 - Hmong Njua bible

Teev Npe 30

¹Mauxes qha tej lug nuav rua cov thawjcoj ntawm txhua xeem Yixalayees has tas:

²Thaus muaj ib tug tuabneeg twg coglug muab ib yaam dlaabtsi rua tug TSWV lossis coglug rua tej yaam dlaabtsi lawm, nwg tsi xob thim nwg tej lug cog tseg ntawd, tabsis nwg yuavtsum ua txhua yaam lawv le nwg tau coglug lawm.

³Ib tug ntxhais twg thaus nwg tseem ua hluas nkauj nrug nwg nam nwg txiv nyob, yog nwg tau coglug yuav muab ib yaam dlaabtsi rua tug TSWV lossis coglug yuav ua ib yaam dlaabtsi lawm,

⁴yog nwg txiv nov tej lug cog tseg ntawd, nwg txiv tsi txwv nwg tej lug cog tseg ntawd, ces nwg yuav tau ua txhua yaam kuas tav lawv le nwg tau coglug tseg lawm.

⁵Tabsis yog thaus nwg txiv nov nwg tej lug cog tseg ntawd, nwg txiv txwv tsi pub ua le ntawd, ces nwg muab tej lug cog tseg ntawd tso tseg hab tsi xob ua. Tug TSWV txhaj yuav zaam nwg lub txim, rua qhov nwg txiv tsi pub nwg ua.

⁶Yog muaj ib tug ntxhais twg kws tsi tau yuav quasyawg coglug tseg, vim nwg tsi ua tuab zoo xaav lossis tsi ceevfaaj lossis nwg coglug yuav ua ib yaam dlaabtsi, nwg maam yuav quasyawg,

⁷yog nwg tug quasyawg tsi txwv thaus nov nwg cov lug cog tseg ntawd, mas tug quaspuj yuav tau ua txhua yaam lawv le nwg tau coglug tseg lawm.

⁸Tabsis thaus tug quasyawg nov tej lug cog tseg ntawd, yog tug quasyawg txwv tsi pub nwg ua lawv le nwg coglug tseg, ces tug quaspuj tsi taag yuav ua lawv le tej lug kws nwg tau cog tseg ntawd. Tug TSWV txhaj yuav zaam nwg lub txim.

⁹Ib tug puj ntsuag lossis ib tug puj nrauj twg, tau coglug tseg le caag lawm, nwg yuav tau ua kuas tav lawv le tej lug kws nwg cog tseg ntawd.

¹⁰Yog tug quaspuj kws nwg tub yuav quasyawg lawm, tau coglug tseg yuav ua ib yaam dlaabtsi,

¹¹yog has tas nwg tug quasyawg tsi txwv thaus tug quasyawg nov nwg tej lug cog tseg ntawd, nwg yuav tau ua kuas tav txhua yaam lawv le nwg tau coglug tseg lawm.

¹²Tabsis yog nwg tug quasyawg txwv tsi pub nwg ua tej ntawd, nwg tsi taag yuav ua le nwg tau coglug lawm. Ces tug TSWV txhaj yuav zaam nwg lub txim, rua qhov nwg tug quasyawg txwv tsi pub nwg ua.

¹³Nwg tug quasyawg muaj cai muab tej lug kws nwg tau cog tseg ntawd xuam povtseg.

¹⁴Tabsis yog tug quasyawg nov tug quaspuj tej lug cog tseg, ib nub dlhau ib nub tsi has dlaabtsi le, ces tug quaspuj yuavtsum ua txhua yaam le nwg tau coglug tseg. Vim tug quasyawg yeej tsi txwv nub kws nwg nov lug lawm.

¹⁵Tabsis yog has tas tom qaab ntawd, tug quasyawg maam rhuav nwg tug quaspuj tej lug cog tseg, nwg yuav tau ris nwg tug quaspuj lub txim, vim nwg tug quaspuj tsi tau ua kuas cov lug cog tseg ntawd tav.

¹⁶Tej nuav yog tej kevcai kws tug TSWV muab cob rua Mauxes, has txug tej lug cog tseg ntawm tej ntxhais kws tseem nrug nwg nam nwg txiv nyob lossis tug ntxhais kws tub yuav quasyawg lawm.