Read Hmong Njua Teev Npe 31 Bible Online

Teev Npe 31 - Hmong Njua bible

Teev Npe 31

²“Koj ca le rau txim rua cov tuabneeg Midias pauj tej kws puab tau ua rua tsaav tuabneeg Yixalayees taag lug lawm. Ces tom qaab kws koj ua tej ntawd tav lawm koj yuav tuag moog.”

³Yog le ntawd, Mauxes txawm has rua cov pejxeem has tas, “Ca le npaaj cuabyeej kuas txhij moog ntaus rog, mej muaj cuabkaav tua yeej cov Midias hab rau txim rua puab pauj tej kws puab tau ua rua tug TSWV.

⁴Tso ib xeem Yixalayees twg ib txheeb leej moog ntaus rog.”

⁵Yog le ntawd, ib xeem twg txhaj xaiv tau ib txheeb leej, suav taagnrho kaum ob xeem ntawd xaiv tau kaum ob txheeb tug txivneej moog ntaus rog.

⁶Mauxes tso puab moog ntaus rog, tug povthawj Ele-axas tug tub Finehas ua tug coj, nwg yog tug kws coj tej khoom dlawbhuv hab cov raaj xyu kws tshuab txhib tua rog.

⁷Puab tua cov Midias lawv le tug TSWV saamfwm rua Mauxes, puab muab cov txivneej tua tuag taag huv tuabsi,

⁸hab tseem tua cov Midias tsib tug vaajntxwv kws yog Evis, Lekees, Xules, Hules hab Lenpas tuag huv tuabsi. Hab puab tseem tua Npe-aus tug tub Npala-aas tuag lawm hab.

⁹Cov Yixalayees txhaj nteg tau taagnrho cov Midias cov quaspuj hab mivnyuas, tej nyuj, tej yaaj hab fuab taagnrho puab tej nyaj txag qoobloo lug,

¹⁰hab muab puab tej nroog tej yeej hlawv kub nyab taag.

¹¹Puab sau taagnrho tej khoom kws puab fuab tau, cov tuabneeg kws puab nteg tau hab tej tsaj txhu huv tuabsi

¹²coj lug cob rua Mauxes, Ele-axas hab cov pejxeem Yixalayees huv lub yeej ntawm taj Mau-am kws nyob ntawm tug ntug Dlej Yauladees kws ncaaj lub nroog Yelekaus.

¹³Mauxes, Ele-axas hab cov thawjcoj ntawm cov pejxeem txhaj tawm moog rua nrau ntug yeej, moog tog cov tubrog rov qaab lug.

¹⁴Mauxes chim heev rua cov thawj tubrog kws kaav pawg txheeb hab kaav pawg pua kws rov tom tshaav rog lug.

¹⁵Mauxes nug puab has tas, “Vim le caag mej tseem yuav tseg cov quaspuj nuav ua dlaabtsi?

¹⁶Ncu ntsoov has tas, puab tub yog cov quaspuj kws coj lawv le Npala-aas tej lug qha thaus nyob tom Pe-aus. Hab puab tub coj cov tuabneeg moog ua tsi ncaaj hab muab tug TSWV tso tseg, vim le ntawd, tug TSWV tsaav tuabneeg txhaj raug tej kaab mob phem.

¹⁷Taamsim nuav ca le muab txhua tug mivnyuas tub tua povtseg kuas taag hab muab cov quaspuj kws mej nrug pw lawm tua povtseg huv tuabsi,

¹⁸tabsis tseg cov hluas nkauj hab cov nkaujxwb kws tsi tau ntxag dlua hluas nraug rua mej xwb.

¹⁹Nwgnuav mej txhua tug kws tau tua ib tug twg tuag lossis tau cev teg tuav tej tuabneeg tuag lawm, yuavtsum nyob saab nrau ntug yeej xyaa nub. Nub peb hab nub xyaa ua kevcai ntxuav mej hab cov quaspuj kws mej nteg tau lug ntawd tsaiv.

²⁰Hab mej yuavtsum ua kevcai ntxuav rua tej khaub dluag txhua dlaim hab txhua yaam kws yog muab tawv tsaj, plaub tshis lossis ntoo ua huv tuabsi.”

²¹Ele-axas kws yog tug povthawj has rua cov kws rov tom tshaav rog lug has tas, “Ntawm nuav yog tej kevcai kws tug TSWV tau muab cob rua Mauxes.

²²Kub, nyaj, tooj, hlau, txhuas, tooj dlawb

²³hab txhua yaam kws thev taug suavtawg, mej yuavtsum coj moog hlawv huv qhovcub hab muab dlej ntxuav txhaj huv. Hab yaam twg kws thev tsi taug suavtawg, mej yuavtsum muab dlej ntxuav txhaj huv.

²⁴Nub xyaa mej ca le muab mej tej rig tsho ntxhua; mej txhaj huv hab txhaj lug tau rua huv lub yeej.”

²⁵Tug TSWV has rua Mauxes has tas,

²⁶“Koj hab Ele-axas moog nrug cov thawjcoj ntawm cov pejxeem suav txhua yaam kws mej moog fuab tau lug, suav tej tuabneeg kws mej nteg tau lug hab tej tsaj txhu huv tuabsi.

²⁷Hab muab tej khoom kws fuab tau lug nuav faib ua ob pawg, muab ib pawg rua cov tubrog, muab ib pawg rua cov pejxeem.

²⁸Pawg kws yog cov tubrog tug, yuavtsum muab ib leeg ntawm tsib puas leej kws raug nteg lug coj moog ua se them rua tug TSWV, hab tej nyuj, tej neeg luav, tej yaaj hab tej tshis los ua ib yaam nkaus le ntawd.

²⁹Muab tej ntawd rua tug povthawj Ele-axas ib yaam le muab ua khoom pub tshwjxeeb rua tug TSWV.

³⁰Pawg kws yog cov pejxeem tug, muab ib leeg ntawm tsib caug leej kws raug nteg lug hab tej nyuj, tej neeg luav, tej yaaj hab tej tshis los ua ib yaam nkaus le ntawd. Muab rua cov Levis kws yog cov tu tug TSWV lub Tsevntaub.”

³¹Mauxes hab Ele-axas obtug ua lawv le tug TSWV tau saamfwm rua obtug lawm.

³²Taagnrho tej kws cov tubrog moog fuab tau lug hab cov kws tseg ca rua puab: muaj rau pua xyaa caum tsib txheeb tug yaaj hab tshis,

³³xyaa caum ob txheeb tug nyuj,

³⁴rau caum ib txheeb tug neeg luav,

³⁵hab peb caug ob txheeb tug ntxhais nkaujxwb kws tsi tau ntxag dlua hluas nraug le.

³⁶Hab ib nraab kws muab faib rua cov tubrog, suav tau peb puas peb caug xyaa txheeb tsib puas tug yaaj hab tshis,

³⁷cov kws muab rhu moog rua tug TSWV yog rau pua xyaa caum tsib tug;

³⁸peb caug rau txheeb tug nyuj, cov kws muab rhu moog rua tug TSWV yog xyaa caum ob tug;

³⁹peb caug txheeb tsib puas tug neeg luav, cov kws muab rhu moog rua tug TSWV yog rau caum ib tug;

⁴⁰kaum rau txheeb tug ntxhais nkaujxwb, cov kws muab rhu moog rua tug TSWV muaj peb caug ob leeg.

⁴¹Yog le ntawd, Mauxes txhaj coj cov se nuav moog rua Ele-axas muab pub tshwjxeeb rua tug TSWV, lawv le tug TSWV tau has rua Mauxes lawm.

⁴²Tej khoom kws cov tubrog moog fuab tau lug Mauxes muab ib nraab faib rua cov pejxeem,

⁴³cov kws faib rua cov pejxeem muaj peb puas peb caug xyaa txheeb tsib puas tug yaaj hab tshis,

⁴⁴peb caug rau txheeb tug nyuj,

⁴⁵peb caug txheeb tsib puas tug neeg luav,

⁴⁶hab kaum rau txheeb tug ntxhais nkaujxwb.

⁴⁷Pawg nuav Mauxes rhu ib leeg ntawm tsib caug leej kws raug nteg lug, hab tej tsaj txhu los rhu ib yaam nkaus le ntawd, coj moog rua cov Levis kws tu tug TSWV lub Tsevntaub, lawv le tug TSWV tau has rua Mauxes lawm.

⁴⁸Ces cov thawj tubrog txhaj moog cuag Mauxes

⁴⁹hab tshaab xu rua nwg has tas, “Peb cov kws yog koj tubkhai, suav cov tubrog kws nyob huv peb kev tswjfwm tsi muaj ib tug pluj le.

⁵⁰Yog le ntawd peb txhaj nqaa tej saw kub, tej paugteg, tej saw teg, tej nplhaib hab tej paug kws peb fuab tau lug huv tuabsi tuaj. Peb coj tej ntawd tuaj fij rua tug TSWV theej peb lub txhoj.”

⁵¹Mauxes hab Ele-axas txhaj txais tej kub hab tej saw ntawd.

⁵²Taagnrho tej khoom kws cov thawj tubrog coj tuaj ntawd nyaav tshaaj plaub puas choj.

⁵³Cov tubrog ca puab yuav tej kws puab fuab tau lug.

⁵⁴Yog le ntawd, Mauxes hab Ele-axas coj tej kub ntawd moog tso rua huv lub Tsevntaub sis ntsib, tug TSWV txhaj tsomkwm cov Yixalayees.