Read Hmong Njua Teev Npe 32 Bible Online

Teev Npe 32 - Hmong Njua bible

Teev Npe 32

¹Xeem Lunpees hab xeem Khas muaj tsaj txhu coob heev. Thaus puab pum lub tebchaws Yaxes hab lub tebchaws Nkile-as kws yog qhov chaw zoo ua tshaav tsaj rua puab tej tsaj,

²puab txhaj moog cuag Mauxes, Ele-axas hab cov thawjcoj, puab thov has tas,

³“Tug TSWV paab cov Yixalayees tua tau cov nroog nuav: lub nroog Atalaus, lub nroog Dinpoos, lub nroog Yaxes, lub nroog Nilas, lub nroog Hesenpoos, lub nroog Ele-ales, lub nroog Simas, lub nroog Nenpaus hab lub nroog Npe-oos kws yog lub tebchaws kws zoo ua tshaav tsaj, hab peb muaj tsaj txhu coob kawg le.

⁵Yog meb pum zoo, thov muab lub tebchaws nuav pub rua peb ua peb tug, hab thov tsi xob ca peb hlaa tug Dlej Yauladees moog nyob saab tid.”

⁶Mauxes teb Khas hab Lunpees cov xeebntxwv has tas, “Mej xaav nyob ntawm nuav hab ca mej cov kwvtij Yixalayees moog ntaus rog xwb los?

⁷Ua le caag mej yuav khuv ca mej cov kwvtij Yixalayees muaj kev tu sab rua qhov kws hlaa tug Dlej Yauladees moog rua tim lub tebchaws kws tug TSWV muab rua puab?

⁸Mej ua ib yaam le thaus kuv tso cov kws yog mej txiv tawm huv lub nroog Kades Npane-as moog soj lub tebchaws lug txug hab puab ua ntaag.

⁹Puab moog txug tim lub Haav Esekaus hab moog pum lub tebchaws ntawd taag lawm, tabsis thaus puab rov qaab lug, puab ua rua cov pejxeem taag kev ca sab, puab txhaj tsi xaav moog rua huv lub tebchaws kws tug TSWV muab rua puab lawm.

¹⁰Nub ntawd tug TSWV txhaj chim heev hab nwg tau coglug tseg le nuav:

¹¹‘Vim puab tsi muab sab npuab kuv, mas txhua tug txivneej kws noobnyoog neeg nkaum xyoo rov sau kws kuv coj nraag tebchaws Iziv lug, yuav tsi tau moog nyob huv lub tebchaws kws kuv coglug rua Anplahaas, Ixaj hab Yakhauj puab lawm.’

¹²Cov lug nuav yog has rua txhua tug huv tuabsi, tsuas yog tshuav Yefunes tug tub Kalej kws yog cov Kenais hab Noos tug tub Yausuas nkaus xwb txhaj yuav tau moog nyob huv lub tebchaws ntawd; rua qhov obtug yeej ibtxwm fwm tug TSWV.

¹³Tug TSWV chim heev rua cov tuabneeg ntawd, nwg txhaj ua rua puab ncig moog ncig lug tau plaub caug xyoo rua tom taj suabpuam, ua rua tam tuabneeg kws tsi txaus sab rua nwg ntawd tuag taag huv tuabsi lawm.

¹⁴Hab taamsim nuav mej sawv lug hloov cov kws yog mej txiv chaw, mej cov tuabneeg txhum kws yog tam nuav, taabtom ua rua tug TSWV txujkev chim lug raug cov Yixalayees dlua.

¹⁵Yog nwgnuav xeem Lunpees hab xeem Khas tsi kaam ua lawv le tug TSWV has, nwg yuav rov muab cov tuabneeg nuav tso tseg ib zag ntxiv rua ntawm taj suabpuam nuav, hab mej yuav ua rua cov tuabneeg nuav raug kev puamtsuaj dlua.”

¹⁶Puab txaav zog lug rua ntawm Mauxes hab has tas, “Thov ca peb muab pobzeb lug txhim nkuaj kaw peb tej yaaj hab ua nroog rua peb tej quaspuj mivnyuas nyob ntawm nuav tsaiv.

¹⁷Ces peb yuav nrug peb cov kwvtij Yixalayees moog ntaus rog hab nas tsaam ua ntej moog txug thaus puab tau moog nyob huv lub tebchaws kws yog puab tug. Lub sijhawm ntawd peb tej quaspuj mivnyuas yuav nyob huv tej nroog kws txhim ntsaa zeb, kuas puab txhaj nyob tso sab lug tsi ntshai cov tuabneeg huv lub tebchaws nuav.

¹⁸Peb yuav tsi rov qaab lug tsev moog txug thaus cov Yixalayees tau lub tebchaws kws hom tseg rua puab lug ua puab tug lawm tsaiv.

¹⁹Peb yuav tsi nrug puab faib ib qho aav kws nyob ntawm tug Dlej Yauladees saab tid rua peb, rua qhov peb tub tau thaaj chaw kws nyob ntawm tug Dlej Yauladees saab nubtuaj nuav ua peb tug lawm.”

²⁰Mauxes teb has tas, “Yog mej txaus sab ua lawv le kws mej has tag, ces mej ca le npaaj cuabyeej kuas txhij moog ntaus rog taabmeeg tug TSWV.

²¹Taagnrho mej cov tubrog ca le hlaa tug dlej Yauladees moog rua saab tid taabmeeg tug TSWV, moog txug thaus tug TSWV tua yeej nwg cov yeebncuab,

²²hab txeeb tau lub tebchaws lug nyob lawm. Tom qaab ntawd, mej maam rov qaab lug, rua qhov mej yuav ua kuas tav lawv le mej tshuav tug TSWV hab mej cov kwvtij Yixalayees nqe.

²³Tabsis yog mej tsi ua lawv le mej coglug tseg, kuv qha rua mej has tas, mej ua txhum rua tug TSWV ntaag. Yog mej tsi ua le ntawd, mej yuav raug txim vim mej tej kev txhum.

²⁴Yog le ntawd, ca le txhim nroog rua mej nyob hab txhim nkuaj kaw mej tej yaaj, tabsis ncu ntsoov ua lawv le tej lug kws mej tau cog tseg lawm!”

²⁵Xeem Khas hab xeem Lunpees teb has tas, “Peb cov kws yog koj tubkhai, peb yuav ua le koj has ntaag.

²⁶Peb tej quaspuj hab mivnyuas, tej nyuj hab tej yaaj, yuav nyob huv lub nroog Nkile-as nuav.

²⁷Tabsis taagnrho peb cov txivneej kws yog koj cov tubkhai yuav npaaj moog ntaus rog taabmeeg tug TSWV. Peb yuav hlaa tug dlej Yauladees moog rua saab tid hab ntaus rog lawv le koj has.”

²⁸Yog le ntawd, Mauxes txhaj muab tej lug saamfwm nuav rua Ele-axas, Yausuas hab cov Yixalayees lwm tug thawjcoj has tas:

²⁹“Yog xeem Khas hab xeem Lunpees hlaa tug dlej Yauladees moog ntaus rog lawv le tug TSWV tej lug saamfwm hab yog puab paab mej tua kuas yeej lub tebchaws ntawd, ces mej ca le tu lub tebchaws Nkile-as rua puab nyob ua puab tug.

³⁰Tabsis yog puab tsi hlaa tug dlej Yauladees hab tsi nrug mej moog ntaus rog, ces puab yuav tau nrug mej nyob lub tebchaws Kana-aas ib yaam le mej tau hab.”

³¹Xeem Khas hab xeem Lunpees teb has tas, “Lawv le tug TSWV tau saamfwm rua koj cov tubkhai nuav lawm, peb yuav ua le ntawd ntaag.

³²Peb yuav hlaa tug dlej Yauladees moog rua tim lub tebchaws Kana-aas taabmeeg tug TSWV hab moog ntaus rog, kuas peb txhaj tau tug Dlej Yauladees saab nubtuaj nuav ua peb tug.”

³³Yog le ntawd, Mauxes txhaj muab cov Amaules tug Vaajntxwv Xihoos lub nroog hab cov Npasaas tug vaajntxwv Aunkas lub nroog, taagnrho lub tebchaws nrug tej nroog hab ib cheebtsaam kws nyob puagncig tej nroog ntawd tu rua xeem Khas, xeem Lunpees hab xeem Manaxes ib nraab rua puab nyob ua puab tug.

³⁴Xeem Khas txhaj rov txhim khu dlua puab tej nroog rua huv Dinpoos, Atalaus, Alu-es,

³⁵Etelas Saufas, Yaxes, Yaunpehas,

³⁶Npethes Nilas hab Npethes Halaas.

³⁷Xeem Lunpees txhaj rov txhim khu dlua puab tej nroog rua huv Hesenpoos, Ele-ales, Kili-athas,

³⁸Nenpaus, Npa-aas Me-oos, (lub npe nuav tub hloov lawm), hab Xinpemas. Puab tis dlua npe tshab taagnrho rua tej nroog kws puab txhim khu dlua tshab nuav huv tuabsi.

³⁹Makhis cuab kwvtij kws yog xeem Manaxes, moog txeeb tau lub tebchaws Nkile-as, puab kaav hlo lub tebchaws ntawd hab muab cov Amaules kws ibtxwm nyob huv lub tebchaws ntawd lawv tawm tsiv huv tuabsi lawm.

⁴⁰Yog le ntawd, Mauxes txhaj muab lub tebchaws Nkele-as rua Makhis cuab kwvtij, ces puab txhaj nyob huv lub tebchaws ntawd lawm.

⁴¹Yailes kws yog xeem Manaxes moog tua hab txeeb tau lub puav zog, hab nwg tis npe rua cov zog ntawd hu ua, “Yais cov zog.”

⁴²Naunpas moog tua hab txeeb tau lub nroog Kenas hab tej zog miv kws nyob ibncig ntawd, hab nwg muab lub nroog ntawd tis npe hu ua Naunpas, lawv le nwg lub npe ntaag.