Read Hmong Njua Teev Npe 33 Bible Online

Teev Npe 33 - Hmong Njua bible

Teev Npe 33

¹Txij ntawm nuav moog yog qha txug tej thaaj chaw kws cov Yixalayees tsuam yeej ua ntu zug taug kev nraag tebchaws Iziv lug kws yog Mauxes hab Aloos obtug ua ob tug coj taagnrho puab txhua xeem huv tuabsi.

²Mauxes teev tej thaaj chaw kws cov Yixalayees tsuam yeej ua ntu zug lug, lawv le tug TSWV tau saamfwm rua Mauxes lawm.

³Cov Yixalayees sawv kev tawm nraag Iziv lug yog lub ib hlis ntuj nub kaum tsib kws yog tom qaab nub kws puab ua Kevcai Hlaa Dlhau. Tug TSWV tsomkwm puab tawm huv lub nroog Lamexes lug taabmeeg cov Iziv,

⁴thaus cov Iziv taabtom log puab tej tub hlub kws tug TSWV muab tua tuag taag lawm. Tub yog le nuav, tug TSWV txhaj qha has tas, nwg yog tug muaj fwjchim luj dlua cov Iziv tej vaajtswv huv tuabsi.

⁵Cov Yixalayees sawv kev huv lub nroog Lamexes lug hab tsuam yeej su rua ntawm Xukaus.

⁶Puab sawv kev ntawm Xukaus lug tsuam yeej rua ntawm Ethas kws nyob ntawm ntug taj suabpuam.

⁷Puab tawm huv Ethas rov moog rua ntawm Pis Hahilaus kws nyob ntawm Npa-aas Xefoos saab nubtuaj, hab puab tsuam yeej ze rua ntawm Midaules.

⁸Puab sawv kev ntawm Pis Hahilaus hab lug hlaa Havtxwv Lab moog rua tom taj suabpuam Ethas; tom qaab kws puab lug tau peb nub ke lawm, puab txhaj lug tsuam yeej rua ntawm Malahas.

⁹Thaus puab sawv kev ntawm Malahas lug rua ntawm Elimes, puab txhaj tsuam yeej rua qhov ntawd, rua qhov nyob ntawd muaj kaum ob lub qhovdlej hab xyaa caum tsob toovlaaj.

¹⁰Puab sawv kev ntawm Elimes lug tsuam yeej ze rua ntawm ceg Havtxwv Lab.

¹¹Puab sawv kev ntawm Elimes lug tsuam yeej rua ntawm taj suabpuam Xees.

¹²Ces puab sawv kev ntawm taj suabpuam Xees lug tsuam yeej rua ntawm Daufekas,

¹³hab tom qaab ntawd puab lug tsuam yeej rua tom Aluses,

¹⁴dlhau qhov ntawd lug, puab txhaj lug tsuam yeej rua ntawm Lefidees, qhov chaw kws tsi muaj dlej rua cov tuabneeg haus.

¹⁵Thaus puab sawv kev ntawm Lefidees hab tsuam yeej ua ntu zug lug txug rua ntawm lub Roob Haules: puab lug nyob rua ntawm taj suabpuam Xinais, Kinpaus Hata-avas, (lossis “Cov Tuabneeg Nqhes Dlej Tej Qhov Ntxaa”), Haxelaus, Lithamas, Limoos Peles, Linpanas, Lixas, Kehelathas, lub Roob Sefeles, Haladas, Makhelaus, Tahas, Telas, Mithakas, Hasemaunas, Mauxelaus, Npenes Ya-akaas, Haules Hankinkas, Yanpathas, Alaunas, Exi-oosnkenpes, ntawm taj suabpuam Xees, (kws yog Kades) hab lug rua ntawm lub Roob Haules kws nyob ntawm nrimteb Edoos.

³⁸Tug povthawj Aloos nce moog rua sau lub Roob Haules lawv le tug TSWV tau saamfwm. Aloos tuag rua sau lub roob ntawd, thaus nwg noobnyoog muaj ib puas neeg nkaum peb xyoos rua nub xab ib lub tsib hlis ntuj xyoo plaub caug tom qaab cov Yixalayees tsiv nraag tebchaws Iziv lug.

⁴⁰Cov Alas tug vaajntxwv kws kaav lub tebchaws Kana-aas saab qaabteb nov has tas, cov Yixalayees taabtom sawv kev lug lawm.

⁴¹Thaus cov Yixalayees sawv kev ntawm Roob Haules lug rua ntawm lub taj Mau-am, puab tsuam yeej ua ntu zug lawv le tej chaw nuav: Xalemaunas, Punoos, Aunpaus, ntawm Anpalees kws puamtsuaj taag huv tebchaws Mau-am, Dinpoos Nkas, Alemoos Dilathayees, ntawm lub Roob Anpalees kws nyob ze lub Roob Nenpaus, hab tom lub taj Mau-am ntawm ntug Dlej Yauladees kws nyob ncaaj lub nroog Yelikaus, huv lub Haav Npethes Yesimaus hab lub Haav Akaxias kis nruab nraab.

⁵⁰Thaus nyob huv lub taj Mau-am ntawm ntug Dlej Yauladees kws nyob ncaaj lub nroog Yelikaus, tug TSWV has rua Mauxes has tas,

⁵¹“Koj yuavtsum qha tej lug nuav rua cov Yixalayees has tas, ‘Thaus mej hlaa tug Dlej Yauladees moog rua tim tebchaws Kana-aas,

⁵²mej yuavtsum muab taagnrho cov tuabneeg kws ibtxwm nyob huv lub tebchaws ntawd lawv tsiv moog kuas taag. Muab puab tej mlom pobzeb, mlom hlau hab puab tej chaw teev dlaab tsoo kuas puamtsuaj taag huv tuabsi.’

⁵³Txeeb lub tebchaws ntawd lug rua mej hab muab mej cov tuabneeg faib moog nyob kuas thoob plawg huv lub tebchaws ntawd, rua qhov kuv muab lub tebchaws ntawd rua mej lawm.

⁵⁴Muab lub tebchaws rhu ntawv faib rua tej xeem hab tej cuab kwvtij, tej thaaj aav kws dlaav, muab rua tej cuab kwvtij coob hab tej thaaj aav kws nqaim muab rua tej cuab kwvtij tsawg.

⁵⁵Tabsis yog mej tsi muab cov tuabneeg kws ibtxwm nyob huv lub tebchaws ntawd lawv tawm, cov tuabneeg kws mej tseg ca yuav ua kev nyuaj sab rua mej ib yaam le tug saus kws nyob huv mej qhovmuag hab tej maab xuavpaug kws nyob ntawm mej ib saab, hab puab yuav tawmtsaam mej.

⁵⁶Yog mej tsi lawv puab tawm, kuv yuav ua kuas mej puamtsuaj lawv le kuv tub npaaj yuav ua rua puab, kuas puab raug kev puamtsuaj.”