Read Hmong Njua Teev Npe 35 Bible Online

Teev Npe 35 - Hmong Njua bible

Teev Npe 35

¹Thaus tseem nyob huv lub taj ntawm tug Dlej Yauladees kws ncaaj lub nroog Yelikaus, tug TSWV has rua Mauxes has tas,

²“Koj ca le has rua cov Yixalayees, kuas puab muab tej aav kws puab tau lug ua puab tug lawm qee lub nroog hab tej tshaav zaub kws nyob ibncig ntawm tej nroog ntawd rua cov Levis.

³Tej nroog ntawd yuav ua cov Levis tug, hab puab yuav nyob qhov ntawd moog le. Tej tshaav zaub los yuav ua tshaav rua puab tej nyuj hab lwm yaam tsaj huv tuabsi.

⁴Lub tshaav zaub pib ntawm tug ntsaa yeej moog, kuas ib saab twg muaj ob puas tsib caug dlaaj,

⁵yog le ntawd, mej ntsuag kuas dlaav xwmfaab xwmmeem, ib meem twg kuas muaj tsib puas dlaaj, txhaj txaus ua lub nroog rua huv plawv.

⁶Mej yuavtsum muab rau lub nroog rua cov Levis, ca rua cov tuabneeg tua tuabneeg tau tsiv moog cawm sav. Mej yuavtsum muab plaub caug ob lub nroog ntxiv rua puab hab,

⁷taagnrho kuas muaj plaub caug yim lub nroog, nrug rua puab tej tshaav tsaj huv tuabsi.

⁸Cov nroog kws cov Yixalayees muab ua cov Levis tug, tej xeem coob muab ntau lub nroog rua, tej xeem tsawg muab tsawg lub nroog rua.”

⁹Tug TSWV has rua Mauxes has tas,

¹⁰“Koj qha rua cov Yixalayees has tas, ‘Thaus puab hlaa tug Dlej Yauladees moog txug rua huv tebchaws Kana-aas lawm,

¹¹mej xaiv ib cov nroog ca rua cov tuabneeg kws tua tuabneeg tau tsiv moog cawm sav.

¹²Qhov ntawd yuav ua ib qhov chaw rua tug tuabneeg kws tua tuabneeg tau tsiv moog nraim tug tuag tej kwvtij kws nrhav nwg tua povtseg pauj tug tuag lawm. Kuas tug kws yuam kev tua tuabneeg ntawd tsi raug tua tuag ua ntej luas coj nwg moog cuag cov tu plaub ntug txav txim rua nwg.’

¹³Xaiv rau lub nroog,

¹⁴peb lub rua tim tug Dlej Yauladees saab nubtuaj hab peb lub rua huv tebchaws Kana-aas.

¹⁵Cov nroog nuav yuav ca ua ib cov nroog cawm sav lossis nraim cev rua cov Yixalayees hab cov tuabneeg txawv tebchaws kws nrug mej nyob ib ntus lossis nyob moog le. Yog leejtwg tua ib tug twg tuag, tug ntawd ca le tsiv moog nkaum rua huv cov nroog ntawd ib lub.

¹⁶“Yog leejtwg lossis ib tug tuabneeg twg siv tej cuabyeej kws yog hlau lossis pobzeb lossis ntoo tua ib tug tuabneeg tuag, nwg yog tug muaj txim tua tuabneeg hab yuavtsum muab nwg tua kuas tuag pauj tug ntawd.

¹⁹Tug tuag ntawd cov kwvtij txheeb ze muab tug txivneej kws tua tuabneeg ntawd tua kuas tuag. Thaus nwg nrhav tau tug tuabneeg ntawd, ces nwg ca le muab tua kuas tuag.

²⁰“Yog tug txivneej twg ntxub luas hab muab tug ntawd tua kws yog muab nwg thawb qaug lossis muab ib yaam dlaabtsi ntaus tug ntawd tuag,

²¹lossis yog muab nrig ntaus, nwg yog tug muaj txim tua tuabneeg, hab ca le muab nwg ntaus kuas tuag. Tug tuag ntawd tug kwvtij txheeb ze muab tug txivneej kws tua tuabneeg ntawd tua kuas tuag. Thaus nwg nrhav tau tug kws tua tuabneeg ntawd, nwg ca le muab ntaus kuas tuag.

²²“Tabsis yog tug txivneej twg tua ib tug tuabneeg twg tuag kws tsi yog nwg tug yeebncuab, tsi has muab thawb qaug lossis laim tej yaam dlaabtsi moog raug tuag.

²³Lossis yog tug txivneej ntawd tsi ua tuab zoo saib, nwg laim pobzeb moog raug ib tug tuabneeg twg tuag kws tsi yog nwg tug yeebncuab, hab tsi yog nwg txhobtxwm ntaus.

²⁴Yog muaj tej plaub ntug zoo le has nuav, ca cov pejxeem ua cov txav txim rua tug kws tua tuabneeg tuag ntawd kuas lawv le puab pum zoo, mas tsi pub ua lawv le tug tuabneeg tuag ntawd cov kwvtij xaav ua pauj.

²⁵Cov pejxeem kws tuaj tu plaub, yuavtsum paab tug tuabneeg kws tua tuabneeg ntawd kuas dlim ntawm tug tuag cov kwvtij kws yuav muab nwg tua pauj, hab puab muab nwg tso rov qaab moog tom lub nroog cawm sav kws nwg tsiv moog nkaum. Nwg yuavtsum nyob tod txug thaus tug Povthawj Hlub kws muab roj pleev hab txhawb meejthawj tuag lawm tsaiv, nwg maam rov qaab lug.

²⁶Yog tug txivneej kws tua tuabneeg ntawd ca le txhobtxwm tawm huv lub nroog cawm sav kws nwg tsiv moog nkaum ntawd,

²⁷hab yog tug tuag ntawd cov kwvtij pum nwg hab muab nwg tua tuag lawm, ces qhov kws ua pauj le ntawd tsi yog txim tua tuabneeg.

²⁸Tug txivneej kws tua tuabneeg ntawd yuavtsum nyob tuabywv huv lub nroog cawm sav moog txug thaus tug Povthawj Hlub tuag lawm, tom qaab ntawd nwg maam le rov lug tsev tau.

²⁹Txuj kevcai tswjfwm nuav muab cob rua koj hab koj cov xeebntxwv kws yuav faib moog nyob rua txhua qhov chaw.

³⁰“Yog leejtwg laam tau laam tua tuabneeg, yuavtsum muab tug ntawd tua povtseg yog has tas muaj ob leeg lossis coob tshaaj ntawd ua timkhawv; yog muaj ib tug ua timkhawv xwb, tej lug timkhawv tsi tau txaus muab tug tuabneeg ntawd tua povtseg.

³¹Leejtwg tua tuabneeg, yuavtsum muab nwg tua pauj. Muab nyaj txhwv nwg lub txim tua tuabneeg ntawd tsi tau.

³²Yog tug tuabneeg ntawd tsiv moog nkaum rua huv lub nroog cawm sav lawm, tsi xob ca nwg them nyaj kuas muab nwg tso rov lug tsev ua ntej kws tug Povthawj Hlub tuag.

³³Yog mej ua le nuav, ces yog mej txhobtxwm ua kuas lub tebchaws kws mej nyob ntawd tsi huv. Tua tuabneeg tuag ua rua lub tebchaws tsi huv, hab tsi muaj ib yaam dlaabtsi yuav ntxuav tau kuas lub tebchaws nuav huv, tsuas yog muab tug tuabneeg tua tuabneeg ntawd tua povtseg nkaus xwb.

³⁴Mej tsi xob ua rua lub tebchaws tsi huv, rua qhov kuv yog mej tug TSWV hab kuv nrug nraim tsaav tuabneeg Yixalayees nyob.”