Read Hmong Njua Teev Npe 5 Bible Online

Teev Npe 5 - Hmong Njua bible

Teev Npe 5

¹Tug TSWV has rua Mauxes has tas,

²“Koj has rua cov Yixalayees kuas ca le ntab txhua tug tuabneeg kws mob ruas lossis mob ua kua paug rua huv nwg lub cev hab txhua tug tuabneeg kws ua rua nwg tsi huv kws yog moog tuav tej tuabneeg tuag, kuas tawm huv lub yeej moog.

³Muab taagnrho tej tuabneeg tsi huv ntab tawm moog kuas taag, nyob tsaam puab ua rua lub yeej kws yog qhov chaw kws kuv nrug mej nyob ntawd tsi huv lawm.”

⁴Cov Yixalayees txawm ua le ntawd; puab txhaj muab cov tuabneeg kws tsi huv ntab tawm huv lub yeej moog taag lawm. Puab ua lawv le tug TSWV saamfwm rua Mauxes ntaag.

⁵Tug TSWV has rua Mauxes has tas,

⁶“Koj ca le has rua cov Yixalayees has tas, ‘Thaus ib tug txivneej lossis ib tug quaspuj twg ua txhum rua ib tug twg, ces yog nwg ua tsi ncaaj rua tug TSWV, hab nwg yog tuabneeg muaj txim,

⁷nwg yuavtsum leeg lub txim kws nwg ua txhum ntawd, hab them nyaj neeg nkaum feem pua ntxiv rua tug kws nwg ua txhum rua lawm.

⁸Tabsis yog tug tuabneeg ntawd tuag lawm, hab tsi muaj ib tug kwvtij txheeb ze yuav them cov nyaj ntawd rua, ces cov nyaj ntawd yog tug TSWV tug, yuavtsum muab rua tug povthawj. Hab muab ib tug laug yaaj rua tug povthawj tua fij ua kevcai dlaws txim.

⁹Txhua yaam khoom kws cov Yixalayees muab pub tshwjxeeb rua tug TSWV puavleej yog tug povthawj kws puab muab cob rua ntawd tug.

¹⁰Txhua tug povthawj yuavtsum khaws tej khoom kws luas muab pub rua nwg lawm ca ua nwg tug.’ ”

¹¹Tug TSWV has rua Mauxes has tas,

¹²“Koj has rua cov Yixalayees has tas, yog tug txivneej twg tug quaspuj moog ua txhum hab ua tsi ncaaj rua nwg

¹³kws yog moog ntxag lwm tug txivneej nraim nkoog kws nwg tug quasyawg tsi pum, hab nwg tau ua tej kev txhum kws tsi muaj leejtwg paub, tsi muaj leejtwg ua timkhawv hab nteg tsi tau;

¹⁴yog nwg yeej tau ua tsi ncaaj, txhaj ua rua nwg tug quasyawg khib hab tsi ntseeg nwg lossis yog tug quaspuj tsi tau ua txhum, tabsis tug quasyawg laam khib hab tsi ntseeg sab xwb,

¹⁵ces nwg yuavtsum coj nwg tug quaspuj moog cuag tug povthawj. Hab nwg yuavtsum nqaa ob choj moov nplej moog ua khoom fij, tabsis tsi xob muab roj laub rua lossis tsi xob muab moov tshuaj tsw qaab nphoo rua, rua qhov yog cov moov nplej kws fij vim txujkev khib sab, ua kuas qhov tseeb tawm tuaj rua suavdlawg paub.

¹⁶“Tug povthawj yuavtsum coj tug quaspuj ntawd moog sawv ntawm lub thaaj hauv ntej.

¹⁷Nwg yuavtsum muab cov dlej dlawbhuv laub rua huv lub taig aav hab muab mivntsiv moov aav huv lub plaag Tsevntaub kws yog tug TSWV qhov chaw sis ntsib nphoo rua huv cov dlej ntawd.

¹⁸Ces tug povthawj yuavtsum muab tug quaspuj ntawd tug ku taujhauv dlaws hab muab cov moov nplej kws fij ntawd rua nwg tuav ntawm teg. Tug povthawj tuav rawv lub taig dlej ab dlej dlaw kws raug foom tsi zoo ntawm nwg teg.

¹⁹Ces tug povthawj yuavtsum kuas tug quaspuj ntawd lug tsaa teg coglug taabmeeg tug povthawj le nuav: ‘Yog koj yeej tsi tau ua txhum kev nkauj kev nraug, cov dlej kws foom tsi zoo nuav yuav tsi ua rua koj raug kev puamtsuaj.

²⁰Tabsis yog koj saib tsi taug koj tug quasyawg, koj tau moog ua txhum kws yog nrug lwm tug txivneej pw kws tsi yog koj tug quasyawg,

²¹thov kuas tug TSWV ua rua koj lub npe raug foom tsi zoo taabmeeg koj tsaav tuabneeg. Hab thov kuas nwg ua rua koj chaw xis qhuav hab ua rua koj lub tsev mivnyuas o.

²²Thov kuas cov dlej ab dlej dlaw kws koj haus moog rua huv koj lub plaab lawm, ua rua koj lub tsev mivnyuas o hab koj chaw xis qhuav.’ “Tug quaspuj ntawd yuavtsum txaus sab teb has tas, ‘Kuv yeej zoo sab; Amees! Thov kuas tug TSWV ua le ntawd ntaag.’

²³“Ces tug povthawj yuavtsum muab tej lug foom tsi zoo ntawd sau rua huv ntawv hab muab coj moog yaug rua huv cov dlej ab dlej dlaw ntawd.

²⁴Hab nwg yuavtsum muab cov dlej ab dlej dlaw kws ris cov lug foom tsi zoo ntawd rua tug quaspuj haus, hab cov dlej ab dlej dlaw kws ris cov lug foom tsi zoo yuav nkaag moog rua huv nwg lub cev hab yuav ua mob phem rua nwg.

²⁵Ces tug povthawj yuavtsum muab cov moov nplej kws yog khoom fij tshem txujkev khib ntawm tug quaspuj teg lug, hab nqaa moog rua tom lub thaaj muab yom fij rua tug TSWV.

²⁶Ces tug povthawj yuavtsum yawm ib phoov teg cov moov nplej ntawd coj moog hlawv rua sau lub thaaj fij ua kev ncu txug. Thaus kawg tug povthawj kuas tug quaspuj ntawd haus cov dlej ab dlej dlaw.

²⁷Yog nwg yeej ua txhum hab ua tsi ncaaj rua nwg tug quasyawg lawm tag, thaus nwg haus cov dlej kws ris cov lug foom tsi zoo ntawd moog rua huv nwg lub cev lawm, yuav ua rua nwg lub cev mob heev; nwg lub tsev mivnyuas yuav o hab nwg chaw xis yuav qhuav, hab nwg lub npe los yuav raug foom tsi zoo taabmeeg nwg tsaav tuabneeg.

²⁸Tabsis yog tug quaspuj ntawd yeej tsi tau ua txhum hab nwg yog tuabneeg ncaaj nceeg, nwg yuav dlim lub txim ntawd hab tseem muaj taug mivnyuas.

²⁹“Tej kws has taag lug nuav yog txuj kevcai tu plaub ntug ntawm txujkev sis khib, thaus tug quaspuj kws tseem nyob huv nwg tug quasyawg kev tswjfwm los nwg ca le moog ntxag hluas nraug hab ua txhum lawm,

³⁰lossis thaus tug quasyawg ntawd khib nwg tug quaspuj, vim tsi ntseeg tug quaspuj sab, ces nwg yuavtsum coj tug quaspuj moog sawv taabmeeg tug TSWV, hab tug povthawj yuavtsum ua lawv le txuj kevcai nuav txhua nqai.

³¹Tug quasyawg yuav tsi raug txim dlaabtsi, tabsis yog tug quaspuj muaj txim tag, nwg yuav tau ris lub txim ntawd.”