Read Hmong Njua Teev Npe 6 Bible Online

Teev Npe 6 - Hmong Njua bible

Teev Npe 6

¹Tug TSWV saamfwm rua Mauxes has tas,

²“Koj muab txuj kevcai nuav qha rua cov Yixalayees. Txhua tug txivneej lossis quaspuj kws nwg tau coglug tshwjxeeb ua Naxis hab muab nwg fij rua tug TSWV,

³mas nwg yuavtsum caiv tsi xob haus cawv txiv maab hab cawv ntsim. Nwg yuavtsum tsi xob haus tej cawv kws muab kua txiv maab ua lossis tsi xob noj tej txiv maab qhuav hlo le.

⁴Thaus nwg tseem ua Naxis, nwg tsi xob noj tej khoom kws yog muab kua txiv maab ua, txawm yog tej noob lossis tej tawv txiv maab los tsi xob saaj.

⁵Thaus kws nwg tseem nyob huv qhov kws coglug ua Naxis, nwg tsi xob txav nwg cov plaubhau lossis chais nwg cov fwjtxwv. Nwg yuavtsum ua tuabneeg dlawbhuv moog txug thaus lub sijhawm kws nwg ua kevcai tav lawm, hab nwg yuavtsum tseg nwg cov plaubhau kuas ntev.

⁶“Thaus lub sijhawm kws nwg ua kevcai fij nwg rua tug TSWV, nwg yuavtsum tsi xob moog ze tej tuabneeg tuag.

⁷Txawm yog nwg nam nwg txiv, nwg kwv nwg tij lossis cov muam tuag los nwg yuavtsum tsi xob moog ze, yuav ua rua nwg lub cev tsi huv, rua qhov lub cim kws muab nwg cais fij rua Vaajtswv nyob sau nwg taubhau.

⁸Thaus kws nwg tseem ua Naxis, nwg yeej yog tug tuabneeg dlawbhuv rua ntawm tug TSWV.

⁹“Yog muaj ib tug tuabneeg ca le tuaj tuag rua ntawm tug Naxis ib saab, ua rua nwg cov plaubhau dlawbhuv tsi huv lawm, nwg yuavtsum tog xyaa nub tom qaab, nwg chais nwg cov plaubhau hab cov fwjtxwv, nwg txhaj rov ua tau tug tuabneeg dlawbhuv.

¹⁰Nub yim nwg yuavtsum nqaa ib nkawm nquab taug lossis ib nkawm nquab nyeg tuaj rua tug povthawj ntawm tug TSWV lub Tsevntaub sis ntsib lub qhovrooj.

¹¹Tug povthawj muab ib tug fij dlaws txim hab muab ib tug hlawv ua khoom fij, ua kevcai ntxuav nwg, rua qhov nwg tau chwv tug tuabneeg tuag lawm. Nub ntawd nwg yuavtsum ua kevcai ntxuav nwg cov plaubhau kuas huv

¹²hab nwg rov muab nwg fij rua tug TSWV thaus lub sijhawm kws nwg tseem ua Naxis hab caab ib tug thaav yaaj noobnyoog ib xyoos tuaj tua ua khoom fij dlaws txim. Tsi suav lub sijhawm qub kws thaus nwg xub ua, rua qhov nwg tau ua rua nwg tsi huv lawm.

¹³“Ntawm nuav yog txuj kevcai rua tug Naxis, thaus lub sijhawm kws nwg ua kevcai txwm noobnyoog lawm. Nwg yuavtsum moog rua tom tug TSWV lub Tsevntaub sis ntsib lub qhovrooj

¹⁴hab coj peb tug tsaj kws tsi muaj ib qhov phem le moog fij rua tug TSWV: ib tug thaav yaaj noobnyoog ib xyoos moog hlawv fij, ib tug nwm yaaj noobnyoog ib xyoos moog fij dlaws txim, hab ib tug laug yaaj moog fij ua kev sis raug zoo.

¹⁵Nwg yuavtsum nqaa ib tawb ncuav kws tsi xyaw keeb moog fij hab: muab ib co puab ua tej lub ncuav tuab tuab xyaw roj txiv ntoo hab muab ib co puab ua tej lub ncuav nyag nyag pleev roj txiv ntoo, hab muab ib co moov nplej hab cawv txiv maab tuaj fij ntxiv.

¹⁶“Tug povthawj ca le coj taagnrho tej khoom nuav moog fij rua tug TSWV, muab ibtxha fij dlaws txim hab muab ibtxha hlawv ua khoom fij rua tug TSWV.

¹⁷Nwg yuavtsum muab tug laug yaaj hab tawb ncuav kws tsi xyaw keeb fij rua tug TSWV ua kev sis raug zoo; hab nwg muab cov moov nplej hab cov cawv txiv maab fij nrug ua ke.

¹⁸Tug Naxis yuavtsum chais nwg cov plaubhau rua ntawm tug TSWV lub Tsevntaub sis ntsib lub qhovrooj hab muab nwg cov plaubhau coj moog hlawv rua huv lub cubtawg kws taabtom hlawv cov khoom fij ua kev sis raug zoo.

¹⁹“Ces thaus kws muab ceg teg yaaj hau sav lawm, tug povthawj yuavtsum muab ceg teg yaaj ntawd coj moog tso nrug lub ncuav tuab hab lub ncuav nyag kws muab huv lub tawb lug, cob rua tug Naxis txhais teg.

²⁰Ces tug povthawj yuavtsum muab cov khoom nuav moog yom fij rua tug TSWV, nrug lub hauv nrob hab cegqaab yaaj kws muab yom fij ua tug povthawj tug lawv le txuj kevcai; cov khoom fij nuav yog cov dlawbhuv rua tug povthawj. Tom qaab ntawd tug Naxis, maam le haus tau cawv.

²¹“Ntawm nuav yog txuj kevcai kws tug Naxis yuavtsum coj. Tabsis yog tug Naxis twg tau coglug tseg yuav muab khoom fij tshaaj le cov Naxis txuj kevcai coglug tseg, mas nwg yuavtsum ua kuas tav lawv le nwg tau coglug tseg lawm.”

²²Tug TSWV saamfwm rua Mauxes has tas,

²³“Koj qha rua Aloos hab nwg cov tub siv tej lug nuav foom koob moov rua cov tuabneeg Yixalayees:

²⁴Thov tug TSWV foom koob moov rua mej hab tsomkwm mej;

²⁵Thov tug TSWV ua sab dlawb sab zoo rua mej hab hlub mej;

²⁶Thov tug TSWV tsaa qhovmuag saib mej hab pub rua mej muaj kev kaaj sab lug.”

²⁷Hab tug TSWV has tas, “Yog puab tuav kuv lub npe foom koob moov rua cov Yixalayees, kuv txhaj yuav foom koob moov rua puab.”