Read Hmong Njua Teev Npe 7 Bible Online

Teev Npe 7 - Hmong Njua bible

Teev Npe 7

¹Nub kws Mauxes tsaa lub Tsevntaub kws yog qhov chaw nrug tug TSWV sis ntsib tav lawm, nwg muab lub Tsevntaub hab tej cuabyeej, lub thaaj hab tej cuabyeej ua kevcai fij.

²Ces cov Yixalayees tej thawjcoj, cov thawjcoj ntawm tej tsev tuabneeg, hab cov thawjcoj ntawm tej xeem yog cov kws sau npe,

³coj puab tej khoom fij tuaj pub rua tug TSWV le nuav: rau lub tsheb nyuj hab kaum ob tug txiv nyuj, ob tug thawjcoj koom ib lub tsheb nyuj hab ib leeg ib tug txiv nyuj. Tom qaab kws puab coj tuaj fij rua tug TSWV taag lawm,

⁴tug TSWV has rua Mauxes has tas,

⁵“Ca le txais tej khoom fij nuav ntawm puab, txhaj tau coj moog siv ua num huv tug TSWV lub Tsevntaub sis ntsib; hab muab tej khoom nuav cob rua cov Levis lawv le teg num kws puab yuavtsum tau ua.”

⁶Yog le ntawd, Mauxes txhaj muab cov tsheb nyuj hab cov txiv nyuj cob rua cov Levis.

⁷Nwg muab ob lub tsheb hab plaub tug txiv nyuj rua cov Nkesoos,

⁸hab muab plaub lub tsheb nyuj hab yim tug txiv nyuj rua cov Melalis. Taagnrho tej num kws puab ua, Aloos tug tub Ithamas qha le caag puab yuavtsum ua kuas tav le ntawd.

⁹Tabsis Mauxes tsi muab tsheb nyuj lossis txiv nyuj rua cov Kauhas, rua qhov lub luag num kws puab ua, tsuas yog kwv tej khoom dlawbhuv sau xubpwg xwb.

¹⁰Cov thawjcoj tseem nqaa khoom tuaj ua kevcai fij lub thaaj huv tuabsi hab. Thaus puab npaaj tau tej khoom ntawd txhij coj tuaj fij rua ntawm lub thaaj,

¹¹tug TSWV has rua Mauxes has tas, “Koj qha rua puab has tas muab kaum ob nub rua puab fij puab tej khoom rua lub thaaj, kuas ib tug thawjcoj tuaj ib nub.”

¹²Nub ib yog Amithais tug tub Nasoos kws yog tug thawjcoj xeem Yudas muab nwg cov khoom moog fij;

¹³cov khoom kws nwg nqaa moog fij yog ib lub phaaj nyaj nyaav peb choj hab ob laag, ib lub taig nyaj nyaav ib choj hab yim laag, lawv le numtswv txuj cai kom tseg, lub phaaj hab lub taig ntawd puavleej ntim tej tseem moov nplej kws ntse roj rua lawm puv nkaus coj moog fij;

¹⁴ib lub taig kub nyaav plaub laag, ntim moov tshuaj tsw qaab puv nkaus;

¹⁵caab ib tug ntsuag nyuj, ib tug laug yaaj, hab ib tug thaav yaaj noobnyoog ib xyoos, coj moog tua hlawv fij;

¹⁶caab ib tug laug tshis coj moog tua fij dlaws txim;

¹⁷hab ob tug txiv nyuj, tsib tug laug yaaj, tsib tug laug tshis, hab tsib tug thaav yaaj noobnyoog ib xyoos coj moog fij ua kev sis raug zoo. Cov khoom fij nuav puavleej yog Aminadas tug tub Nasoos cov.

¹⁸Nub ob yog Zuag tug tub Nethanees kws yog tug thawjcoj xeem Ixakhas, muab nwg cov khoom moog fij;

¹⁹cov khoom kws nwg nqaa moog fij yog ib lub phaaj nyaj nyaav peb choj hab ob laag, ib lub taig nyaj nyaav ib choj hab yim laag lawv le numtswv txuj cai kom tseg, lub phaaj hab lub taig ntawd puavleej ntim tej tseem moov nplej kws ntse roj rua lawm puv nkaus coj moog fij;

²⁰ib lub taig kub nyaav plaub laag kws ntim moov tshuaj tsw qaab puv nkaus;

²¹caab ib tug ntsuag nyuj, ib tug laug yaaj, hab ib tug thaav yaaj noobnyoog ib xyoos, coj moog tua hlawv fij;

²²caab ib tug laug tshis coj moog tua fij dlaws txim;

²³hab ob tug txiv nyuj, tsib tug laug yaaj, tsib tug laug tshis, hab tsib tug thaav yaaj noobnyoog ib xyoos, coj moog tua fij ua kev sis raug zoo. Cov khoom fij nuav puavleej yog Zuag tug tub Nethanees cov.

²⁴Nub peb yog Heloos tug tub Eli-as kws yog tug thawjcoj xeem Xenpuloos, muab nwg cov khoom moog fij;

²⁵cov khoom kws nwg coj moog fij yog ib lub phaaj nyaj nyaav peb choj hab ob laag, ib lub taig nyaj nyaav ib choj hab yim laag, lawv le numtswv txuj cai kom tseg, lub phaaj hab lub taig ntawd puavleej ntim tej tseem moov nplej kws ntse roj rua lawm puv nkaus coj moog fij;

²⁶ib lub taig kub nyaav plaub laag kws ntim moov tshuaj tsw qaab puv nkaus;

²⁷caab ib tug ntsuag nyuj, ib tug laug yaaj, hab ib tug thaav yaaj noobnyoog ib xyoos, coj moog tua hlawv fij;

²⁸caab ib tug tshis coj moog tua fij dlaws txim;

²⁹hab ob tug txiv nyuj, tsib tug laug yaaj, tsib tug laug tshis, hab tsib tug thaav yaaj noobnyoog ib xyoos, coj moog fij ua kev sis raug zoo. Cov khoom fij nuav puavleej yog Heloos tug tub Eli-as cov.

³⁰Nub plaub yog Sede-us tug tub Elixus kws yog tug thawjcoj xeem Lunpees, muab nwg cov khoom moog fij;

³¹cov khoom kws nwg coj moog fij yog ib lub phaaj nyaj nyaav peb choj hab ob laag, ib lub taig nyaj nyaav ib choj hab yim laag lawv le numtswv txuj cai kom tseg, lub phaaj hab lub taig ntawd puavleej ntim tej tseem moov nplej kws ntse roj rua lawm puv nkaus coj moog fij;

³²ib lub taig kub nyaav plaub laag kws ntim moov tshuaj tsw qaab puv nkaus;

³³caab ib tug ntsuag nyuj, ib tug laug yaaj, hab ib tug thaav yaaj noobnyoog ib xyoos, coj moog tua hlawv fij;

³⁴caab ib tug laug tshis coj moog tua fij dlaws txim;

³⁵hab ob tug txiv nyuj, tsib tug laug yaaj, tsib tug laug tshis, hab tsib tug thaav yaaj noobnyoog ib xyoos, coj moog fij ua kev sis raug zoo. Cov khoom fij nuav puavleej yog Sede-us tug tub Elixus cov.

³⁶Nub tsib yog Xulisadais tug tub Selumiyees kws yog tug thawjcoj xeem Xime-oos, muab nwg cov khoom moog fij;

³⁷cov khoom kws nwg coj moog fij yog ib lub phaaj nyaj nyaav peb choj hab ob laag, ib lub taig nyaj nyaav ib choj hab yim laag, lawv le numtswv txuj cai kom tseg, lub phaaj hab lub taig ntawd puavleej ntim tej tseem moov nplej kws ntse roj rua lawm puv nkaus coj moog fij;

³⁸ib lub taig kub nyaav plaub laag kws ntim moov tshuaj tsw qaab puv nkaus;

³⁹caab ib tug ntsuag nyuj, ib tug laug yaaj, hab ib tug thaav yaaj noobnyoog ib xyoos, coj moog tua hlawv fij;

⁴⁰caab ib tug laug tshis coj moog tua fij dlaws txim,

⁴¹hab ob tug txiv nyuj, tsib tug laug yaaj, tsib tug laug tshis hab tsib tug thaav yaaj noobnyoog ib xyoos, coj moog fij ua kev sis raug zoo. Cov khoom fij nuav puavleej yog Xulisadais tug tub Selumiyees cov.

⁴²Nub rau yog Deyees tug tub Eli-axas kws yog tug thawjcoj xeem Khas, muab nwg cov khoom moog fij;

⁴³cov khoom kws nwg coj tuaj fij yog ib lub phaaj nyaj nyaav peb choj hab ob laag, ib lub taig nyaj nyaav ib choj hab yim laag lawv le numtswv txuj cai kom tseg, lub phaaj hab lub taig ntawd puavleej ntim tej tseem moov nplej kws ntse roj rua lawm puv nkaus coj moog fij;

⁴⁴ib lub taig kub nyaav plaub laag kws ntim moov tshuaj tsw qaab puv nkaus;

⁴⁵caab ib tug ntsuag nyuj, ib tug laug yaaj, hab ib tug thaav yaaj noobnyoog ib xyoos, coj moog tua hlawv ua khoom fij;

⁴⁶caab ib tug laug tshis coj moog tua fij dlaws txim;

⁴⁷hab ob tug txiv nyuj, tsib tug laug yaaj, tsib tug laug tshis, hab tsib tug thaav yaaj noobnyoog ib xyoos, coj moog fij ua kev sis raug zoo. Cov khoom fij nuav puavleej yog Deyees tug tub Eli-axas cov.

⁴⁸Nub xyaa yog Amihus tug tub Elisamas kws yog tug thawjcoj xeem Efalayees, muab nwg cov khoom moog fij;

⁴⁹cov khoom kws nwg coj moog fij yog ib lub phaaj nyaj nyaav peb choj hab ob laag, ib lub taig nyaj nyaav ib choj hab yim laag, lawv le numtswv txuj cai kom tseg, lub phaaj hab lub taig ntawd puavleej ntim tej tseem moov nplej kws ntse roj rua lawm puv nkaus coj moog fij;

⁵⁰ib lub taig kub nyaav plaub laag kws ntim moov tshuaj tsw qaab puv nkaus;

⁵¹caab ib tug ntsuag nyuj, ib tug laug yaaj, hab ib tug thaav yaaj noobnyoog ib xyoos, coj moog tua hlawv fij;

⁵²caab ib tug laug tshis coj moog tua fij dlaws txim;

⁵³hab ob tug txiv nyuj, tsib tug laug yaaj, tsib tug laug tshis hab tsib tug thaav yaaj noobnyoog ib xyoos, coj moog fij ua kev sis raug zoo. Cov khoom fij nuav puavleej yog Amihus tug tub Elisamas cov.

⁵⁴Nub yim yog Pedaxes tug tub Nkamaliyees kws yog tug thawjcoj xeem Manaxes, muab nwg cov khoom moog fij;

⁵⁵cov khoom kws nwg coj moog fij yog ib lub phaaj nyaj nyaav peb choj hab ob laag, ib lub taig nyaj nyaav ib choj hab yim laag, lawv le numtswv txuj cai kom tseg, lub phaaj hab lub taig ntawd puavleej ntim tej tseem moov nplej kws ntse roj rua lawm puv nkaus coj moog fij;

⁵⁶ib lub taig kub nyaav plaub laag kws ntim moov tshuaj tsw qaab puv nkaus;

⁵⁷caab ib tug ntsuag nyuj, ib tug laug yaaj hab ib tug thaav yaaj noobnyoog ib xyoos, coj moog tua hlawv fij;

⁵⁸caab ib tug laug tshis moog tua fij dlaws txim;

⁵⁹hab ob tug txiv nyuj, tsib tug laug yaaj, tsib tug laug tshis hab tsib tug thaav yaaj noobnyoog ib xyoos, coj moog fij ua kev sis raug zoo. Cov khoom fij nuav puavleej yog Pedaxes tug tub Nkamaliyees cov.

⁶⁰Nub cuaj yog Nkide-aunis tug tub Anpidaas kws yog tug thawjcoj xeem Npeenyamees, muab nwg cov khoom moog fij;

⁶¹cov khoom kws nwg coj moog fij yog ib lub phaaj nyaj nyaav peb choj hab ob laag, ib lub taig nyaj nyaav ib choj hab yim laag, lawv le numtswv txuj cai kom tseg, lub phaaj hab lub taig ntawd puavleej ntim tej tseem moov nplej kws ntse roj rua lawm puv nkaus coj moog fij;

⁶²ib lub taig kub nyaav plaub laag kws ntim moov tshuaj tsw qaab puv nkaus;

⁶³caab ib tug ntsuag nyuj, ib tug laug yaaj hab ib tug thaav yaaj noobnyoog ib xyoos, coj moog tua hlawv ua khoom fij;

⁶⁴caab ib tug laug tshis moog tua fij dlaws txim;

⁶⁵hab caab ob tug txiv nyuj, tsib tug laug yaaj, tsib tug laug tshis hab tsib tug thaav yaaj noobnyoog ib xyoos, coj moog fij ua kev sis raug zoo. Cov khoom fij nuav puavleej yog Nkidi-aunis tug tub Anpidas cov.

⁶⁶Nub kaum yog Amisadais tug tub Ahi-exes kws yog tug thawjcoj xeem Daas, muab nwg cov khoom moog fij;

⁶⁷cov khoom kws nwg coj moog fij yog ib lub phaaj nyaj nyaav peb choj hab ob laag, ib lub taig nyaj nyaav ib choj hab yim laag, lawv le numtswv txuj cai kom tseg, lub phaaj hab lub taig ntawd puavleej ntim tej tseem moov nplej kws ntse roj rua lawm puv nkaus coj moog fij;

⁶⁸ib lub taig kub nyaav plaub laag kws ntim moov tshuaj tsw qaab puv nkaus;

⁶⁹caab ib tug ntsuag nyuj, ib tug laug yaaj hab ib tug thaav yaaj noobnyoog ib xyoos, coj moog tua hlawv fij;

⁷⁰caab ib tug laug tshis moog tua fij dlaws txim;

⁷¹hab caab ob tug txiv nyuj, tsib tug laug yaaj, tsib tug laug tshis hab tsib tug thaav yaaj noobnyoog ib xyoos, coj moog fij ua kev sis raug zoo. Cov khoom fij nuav puavleej yog Amisadais tug tub Ahi-exes cov.

⁷²Nub kaum ib yog Aukhalas tug tub Pankiyees kws yog tug thawjcoj xeem Aseles, muab nwg cov khoom moog fij;

⁷³cov khoom kws nwg coj moog fij yog ib lub phaaj nyaj nyaav peb choj hab ob laag, ib lub taig nyaj nyaav ib choj hab yim laag, lawv le numtswv txuj cai kom tseg, lub phaaj hab lub taig ntawd puavleej ntim tej tseem moov nplej kws ntse roj rua lawm puv nkaus coj moog fij;

⁷⁴ib lub taig kub nyaav plaub laag kws ntim moov tshuaj tsw qaab puv nkaus;

⁷⁵caab ib tug ntsuag nyuj, ib tug laug yaaj, hab ib tug thaav yaaj noobnyoog ib xyoos, coj moog tua hlawv fij;

⁷⁶caab ib tug laug tshis moog tua fij dlaws txim;

⁷⁷hab caab ob tug txiv nyuj, tsib tug laug yaaj, tsib tug laug tshis hab tsib tug thaav yaaj noobnyoog ib xyoos, coj moog fij ua kev sis raug zoo. Cov khoom fij nuav puavleej yog Aukhalas tug tub Pankiyees cov.

⁷⁸Nub kaum ob yog Enas tug tub Ahilas kws yog tug thawjcoj xeem Nathalis, muab nwg cov khoom moog fij;

⁷⁹cov khoom kws nwg coj moog fij yog ib lub phaaj nyaj nyaav peb choj hab ob laag, ib lub taig nyaj nyaav ib choj hab yim laag, lawv le numtswv txuj cai kom tseg, lub phaaj hab lub taig ntawd puavleej ntim tej tseem moov nplej kws ntse roj rua lawm puv nkaus coj moog fij;

⁸⁰ib lub taig kub nyaav plaub laag kws ntim moov tshuaj tsw qaab puv nkaus;

⁸¹caab ib tug ntsuag nyuj, ib tug laug yaaj, hab ib tug thaav yaaj noobnyoog ib xyoos moog tua hlawv fij;

⁸²caab ib tug laug tshis moog tua fij dlaws txim;

⁸³hab caab ob tug txiv nyuj, tsib tug laug yaaj, tsib tug laug tshis hab tsib tug thaav yaaj noobnyoog ib xyoos, coj moog fij ua kev sis raug zoo. Cov khoom fij nuav puavleej yog Enas tug tub Ahilas cov.

⁸⁴Ntawm nuav yog cov khoom fij kws cov Yixalayees cov thawjcoj, coj moog fij thaus ua kevcai fij lub thaaj, kaum ob lub phaaj nyaj, kaum ob lub taig nyaj, kaum ob lub taig kub,

⁸⁵ib lub phaaj nyaj twg nyaav peb choj hab ob laag, ib lub taig nyaj twg nyaav ib choj hab yim laag, taagnrho cov phaaj hab cov taig nyaj nyaav rau caum choj, lawv le numtswv txuj cai kom tseg.

⁸⁶Kaum ob lub taig kub kws ntim moov tshuaj tsw qaab puv nkaus, ib lub twg nyaav plaub laag, lawv le numtswv txuj cai kom tseg, taagnrho cov taig kub ntawd nyaav plaub caug yim laag.

⁸⁷Xaam taagnrho cov tsaj kws caab moog tua hlawv fij yog kaum ob tug txiv nyuj, kaum ob tug laug tshis, kaum ob tug thaav yaaj noobnyoog ib xyoos, nrug rua puab tej moov nplej kws coj moog ua khoom fij;

⁸⁸hab taagnrho puab tej tsaj kws caab moog fij ua kev sis raug zoo yog neeg nkaum plaub tug txiv nyuj, rau caum tug laug yaaj, rau caum tug laug tshis, rau caum tug thaav yaaj noobnyoog ib xyoos. Cov nuav yog tej khoom kws coj moog fij tom qaab ua kevcai fij lub thaaj taag lawm.

⁸⁹Thaus Mauxes moog nrug tug TSWV thaam huv tug TSWV lub Tsevntaub sis ntsib, nwg nov tug TSWV has lug rua nwg sau lub hau Phijxaab kws ntim Vaajtswv tej lug cog tseg, nruab nraab ntawm ob tug qhelunpees.