Read Hmong Njua Teev Npe 8 Bible Online

Teev Npe 8 - Hmong Njua bible

Teev Npe 8

¹Tug TSWV has rua Mauxes has tas,

²“Koj qha rua Aloos has tas thaus twg nwg coj xyaa lub teeb moog txawb rua ntawm tug ncej txawb teeb, nwg yuavtsum txawb kuas cov teeb ntawd ci pum kev moog rua tom hauv ntej.”

³Aloos ua lawv le ntawd, nwg txhaj muab cov teeb moog txawb rua ntawm tug ncej txawb teeb tig taagnrho rua tom hauv ntej.

⁴Tug ncej txawb teeb ntawd sau lub hau lug ti nkaus huv tug taw puavleej yog muab cov tseem kub ntaus ua, lawv le tug qauv kws tug TSWV qha rua Mauxes lawm.

⁵Tug TSWV has rua Mauxes has tas,

⁶“Muab cov Levis cais tawm ntawm cov Yixalayees lub chaw nyob hab muab puab ua kevcai ntxuav kuas huv

⁷lawv le nuav: muab dlej nchus rua puab ua kevcai ntxuav hab kuas puab chais puab tej plaub thoob plawg ib ce hab kuas puab ntxhua puab tej rig tsho. Ces puab txhaj yuav huv.

⁸Ces kuas puab caab ib tug ntsuag nyuj hab nqaa ib cov moov nplej kws tub ntse roj txiv ntoo rua lawm tuaj; hab koj muab dlua ib tug ntsuag nyuj tuaj tua fij dlaws txim.

⁹Ces kuas cov Yixalayees tuaj txoos ua ke hab kuas cov Levis moog sawv tom hauv ntej tug TSWV lub Tsevntaub sis ntsib.

¹⁰Cov Yixalayees yuavtsum tsaa teg rua sau cov Levis taubhau,

¹¹hab ca Aloos muab cov Levis kws yog cov Yixalayees yaam khoom tshwjxeeb fij rua kuv, kuas puab tau ua kuv teg num.

¹²Cov Levis yuavtsum tsaa teg rua sau ob tug txiv nyuj taubhau; muab ib tug tua fij dlaws txim hab muab ib tug tua hlawv fij ua kevcai ntxuav kuas cov Levis huv.

¹³“Muab cov Levis fij pub tshwjxeeb rua tug TSWV, hab tsaa Aloos hab nwg cov tub ua cov saib puab.

¹⁴Koj ca le muab cov Levis cais tawm ntawm cov Yixalayees moog nyob rua ib qho, cov Levis yog kuv tug lawm.

¹⁵Tom qaab kws koj muab cov Levis ua kevcai ntxuav hab muab puab fij lawm, puab txhaj tsimnyog ua kuv teg num huv lub Tsevntaub sis ntsib.

¹⁶Puab yog cov dlawbhuv kws cov Yixalayees muab pub rua kuv, kuv txhaj yuav puab ua kuv tug hloov cov Yixalayees thawj tug tub hlub chaw.

¹⁷Cov Yixalayees tej tub hlub hab puab tej tsaj txhu thawj tug mivnyuas kws yog tug txiv puavleej yog kuv tug, vim thaus u kuv tua cov Iziv tej tub hlub lawm.

¹⁸Nwgnuav kuv txhaj xaiv cov Levis lug hloov cov Yixalayees tug tub hlub chaw,

¹⁹hab kuv muab cov Levis cob rua Aloos hab nwg cov tub, ib yaam le puab yog cov Yixalayees cov khoom pub kws coj moog ua num huv lub Tsevntaub sis ntsib hloov cov Yixalayees chaw hab tiv thaiv cov Yixalayees ntawm txujkev puamtsuaj nyob tsaam puab txaav moog ze Chaav Dlawbhuv.”

²⁰Yog le ntawd, Mauxes, Aloos hab taagnrho cov Yixalayees txhaj muab cov Levis ua kevcai fij lawv le tug TSWV tau saamfwm rua Mauxes lawm.

²¹Cov Levis puavleej ua kevcai ntxuav puab hab muab puab tej rig tsho coj moog ntxhua, hab Aloos muab puab ua kevcai fij pub tshwjxeeb rua tug TSWV. Dlua le ntawd, nwg tseem ua kevcai dlaws txim rua puab kuas huv.

²²Tom qaab kws cov pejxeem ua txhua yaam rua cov Levis lawv le tej kws tug TSWV tau has rua Mauxes lawm. Cov Levis txhaj tau moog ua num huv lub Tsevntaub sis ntsib kws yog Aloos hab nwg cov tub ua cov saib.

²³Tug TSWV has rua Mauxes has tas,

²⁴“Txhua tug Levis kws noobnyoog neeg nkaum tsib xyoos yuavtsum tau ua num huv tug TSWV lub Tsevntaub sis ntsib,

²⁵hab yuavtsum ca tug kws nwg noobnyoog tsib caug xyoo lawm moog su.

²⁶Tom qaab ntawd, nwg yuavtsum paab nwg cov kwvtij Levis ua puab tej num huv tug TSWV lub Tsevntaub sis ntsib, tabsis nwg tsi xob ua ib yaam num kws yog nwg tuab leeg ua xwb. Ntawm nuav yog lub luag num kws koj muab cob rua cov Levis ua.”